Read Ngaju NEHEMIA 1 Bible Online

NEHEMIA 1 - Ngaju bible

NEHEMIA 1

¹Jetoh laporan Nehemia anak Hakhalya tahiu kare gawie. Hong bulan Kislew intu nyelo kaduepuluh metoh raja Artahsasta marentah intu Persia, aku, Nehemia, aton intu Susan, lewu hai eka raja marentah.

²Metoh te, paharin Hanani, dumah bara Yuda hayak pire-pire biti oloh. Palus aku misek ewen tahiu ampin taloh hong Yerusalem tuntang kare oloh Yehudi je jari haluli bara tawanan intu[1] Babel.

³Ewen manyarita tahiu kare oloh je bihin jadi tawanan je jari haluli akan tanah te,[2] metoh te belom pehe tuntang inawah kare bangsa beken je aton lakau hete. Mahin tinai kare dinding lewu Yerusalem magon hancor tuntang kare lawange hindai ingambuah bara katika ingehu bihin.

⁴Mahining barita te aku sontop hayak manangis. Pire-pire andau katahie aku pehe atei. Aku harajur puasa sambil balakudoa manintu Hatalla,

⁵“O TUHAN, Hatalla je mimbing kuasa intu sorga. Ikau Hatalla je hai tuntang ikei manaharep Ikau kontep dengan kikeh. Ikau tetep baketep tuntang mimbing janjin Aim dengan kare oloh je sinta Ikau tuntang manumon hukum parentah Ayum.

⁶Ite aku, o TUHAN, tuntang hining lakudoa je inyampaiku intu taharep Aim handau hamalem tagal ungkup Israel, kare rewar Ayum te. Aku mangaku tahiu ikei, ungkup Israel jari badosa; aku tuntang kare tato hiangku jari badosa kea.

⁷Ikei jari darhaka taharep ikau tuntang malanggar kare hukum parentah Aim. Ikei dia malalus kare hukum parentah je jari inenga Awim akan ikei mahalau Moses, rewar Ayum te.

⁸ O TUHAN, ingat kare auh Aim je insanan Moses hapan hukum parentah Ayum, iete amon ikei, ungkup Israel, dia baketep intu Ikau, Ikau akan mawi ikei kasaburan marak kare bangsa beken.

⁹ Tapi amon ikei haluli tinai talih Ikau tuntang manumon kare hukum parentah Ayum, maka ikei je jari pisah darai te kareh imumpong Awim haluli, aloh ikei aton intu kare saran kalunen. Palus ikei ilian Awim akan eka je jari iintih Awim uka jadi eka sombayang Akam.

¹⁰TUHAN, ikei toh kare rewar Aim, ungkup Ayum kabuat je jari inyalamat Awim hapan kuasa tuntang kaabas Ayum ije hai.

¹¹Hining lakudoangku tuntang uras rewar Ayum je beken, je nahuang mahormat Ikau. Tenga pandohop Aim mangat hong andau toh rewar Ayum toh olih mandino asi bara raja.” Intu katika te aku jadi oloh je tukang manyadia taloh ihop akan raja.