Read Ngaju NEHEMIA 10 Bible Online

NEHEMIA 10 - Ngaju bible

NEHEMIA 10

¹Oloh je solake manekee iete gubernur Nehemia anak Hakhalya. Limbah te manuntut Sedekia. Limbah te je manekee kea iete:

²Kare imam Seraya, Asarya, Yeremia Pashur, Amarya, Malkia, Hatus, Sebanya, Malukh, Harim, Meremot, Obaja, Daniel, Gineton, Barukh, Mesulam, Abia, Miyamin, Maasa, Bilgai, tuntang Semaya.

⁹Kare oloh Lewi Yesua anak Asanya, Binui turonan jalahan Henadad, Kadmiel, Sebanya, Hodia, Kelita, Pelaya, Hanan, Mikha, Rehob, Hasabya, Sakur, Serebya, Sebanya, Hodia, Bani tuntang Beninu.

¹⁴Kare pamimpin bangsa Paros, Pahat-Moab, Elam, Satu, Bani, Buni, Asgad, Bebai, Adonia, Bigwai, Adin, Ater, Hiskia, Asur, Hodia, Hasum, Besai, Harip, Anatot, Nebai, Magpias, Mesulam, Hesir Mesesabeel, Sadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim tuntang Baana.

²⁸Ikei, rayat Israel, kare imam, kare oloh Lewi, kare oloh je manjaga lawang Human TUHAN, kare oloh je main musik, kea sawan ikei tuntang kare anak ikei je sukop kabakase aton kaharatie hayak uras oloh je baketep dengan hukum parentah Hatalla tuntang jari mamisah arep bara oloh bangsa beken je melai intu petak danum ikei.

²⁹Ikei uras mampahinje arep ikei dengan kare kapalan ikei hayak sumpah akan belom manumon hukum parentah Hatalla je jari inengae hajamban Moses, rewar Ayue. Keleh Hatalla manyapa ikei amon ikei dia malalus janji toh. Ikei sumpah akan manumon uras kare parentah, atoran, tuntang atoh TUHAN, Hatallan ikei.

³⁰ Ikei sumpah dia akan kawin dengan bangsa beken je melai intu petak danum ikei.

³¹ Amon aton bangsa beken je handak manjual gandom atawa taloh en bewei akan ikei hong andau Sabat atawa andau barasih je beken, ikei dia akan mamilie. Hong genep nyelo je kauju, ikei dia akan malan tuntang dia akan managih utang.

³² Sining nyelo genep bitin ikei akan manenga lime gram perak akan balanjan Human TUHAN.

³³Ikei akan manyadia kare kaperluan sombayang hong Human TUHAN, iete: rote tampayah, parapah gandom sining andau, meto akan parapah je ingehu sining andau, parapah barasih je beken, kare parapah ampun dosan Israel, tuntang uras taloh je imerlu hong Human TUHAN.

³⁴Ikei, rayat, kare imam tuntang kare oloh Lewi, manukas hapan tenong genep nyelo jalahan je kueh je manyadia kayu akan kare parapah akan TUHAN, Hatallan ikei, manumon atoh kare hukum parentah.

³⁵ Genep nyelo ikei mimbit akan Human TUHAN hasil gandom je solake tuntang kare bua je solake masak bara kare batang bua ain ikei.

³⁶ Ikei akan mimbit anak oloh hatue ain ikei je tambakase akan kare imam intu Human TUHAN uka manyarahe akan Hatalla, tumon atoh kare hukum parentah. Ikei kareh manyarah kea anak sapi, anak tabiri atawa anak kambing ikei je solake inakan.

³⁷ Ikei akan mimbit akan kare imam intu Human TUHAN kopeh tepong gandom je solake imutik genep nyelo, tuntang kea kare parapah beken bara anggor, undus saitun tuntang kare macam bua. Parapah sapersapuluh bara hasil tanan ikei akan iimbit ikei akan oloh Lewi je manduan kare parapah sapersapuluh intu kare lewu eka manggawi tana.

³⁸ Tapi ije biti imam turonan Aron musti mampahayak kare oloh Lewi te katika ewen manduan kare parapah te. Tuntang sapersepuluh bara uras parapah te musti imbit awi kare oloh Lewi te akan kamar eka mingkes bahata intu Human TUHAN.

³⁹Rayat oloh Israel tuntang kare oloh Lewi mimbit sumbangan je tetep bara gandom, anggor tuntang undus saitun akan kare kamar eka mingkes bahata eka mingkes kare pakakas Human TUHAN. Intu hete kea eka kare imam melai katika ewen malalus gawi, kare oloh je manjaga lawang Human TUHAN tuntang kare panyanyi. Ikei dia tau laya mahaga Human TUHAN ikei.