Read Ngaju NEHEMIA 13 Bible Online

NEHEMIA 13 - Ngaju bible

NEHEMIA 13

¹ Katika atoran Moses imbasa akan rayat, aton katarangan jetoh: ‘Oloh Amon tuntang Moab dia tau samasinde hewoi dengan ungkup Hatalla;

² awi metoh bangsa Israel mananjong balua bara Misir, due bangsa te dia manenga panginan tuntang danum akan bangsa te. Ewen manyewa Bileam haream mangat manyapa bangsa Israel. Tapi Hatallan itah jari mobah sapa te jadi berkat’.

³Metoh bangsa Israel mahining auh jete, ewen mamisah uras oloh bangsa beken bara marak bangsa Israel.

⁴Sahelo bara te Imam Elyasib je inyoho manantuani kare kamar eka kare ramo intu Human TUHAN, mangat toto ampie dengan Tobia.

⁵Elyasib manenga akan Tobia ije kamar hai je sapunae inyadia tantai akan mingkes parapah gandom, manyan, kare pakakas je ihapan intu Human TUHAN, parapah akan kare imam, sapersapuluh, gandom, anggor tuntang undus saitun, je kareh imbagi akan oloh Lewi, kare pamain musik tuntang kare oloh je manjaga lawang Human TUHAN.

⁶Metoh taloh te manjadi aku jaton hong Yerusalem, awi hong nyelo katelo puluh due pamarentahan Artahsasta,[22] raja Babel, aku haguet akan Babel akan malapur akan raja. Harue pire-pire katahie limbah te aku inyoho

⁷haluli akan Yerusalem. Sana sampai hetoh aku tarewen karana Elyasib jari manenga akan Tobia ije kamar intu Human TUHAN.

⁸Aku sangit toto tuntang mantarik uras ramon Tobia.

⁹Limbah te aku marentah mangat ilalus upacara mamparasih akan kare kamar te. Limbah te aku malian akan hete kare parapah gandom tuntang manyan hayak kare pakakas Human TUHAN.

¹⁰ Beken bara te, gitangku kare pamain musik tuntang kare oloh Lewi jari malihi Yerusalem tuntang haluli akan genep tanae awi rayat dia manyukup kaperluan ewen.

¹¹Palus aku maningak kare oloh je ihormat bentok bangsa ain ewen awi ewen jari manalua Human TUHAN dia iharago. Balalu aku mantehau haluli oloh Lewi tuntang kare pamain musik te tuntang inyohoku bagawi haluli tinai.

¹² Limbah te hapus rayat Israel nampara tinai manenga sapersapuluh gandom, anggor tuntang undus saitun, hayak mimbite akan kare kamar eka kare ramo.

¹³Aku manyoho kare oloh jetoh akan mangawas kare kamar eka kare ramo te: Imam Selemya, Sadok ije biti oloh ja paling mangatawan tahiu atoran tuntang hukum parentah TUHAN tuntang Pedaya oloh Lewi. Hanan anak Sakur tuntang eson Matanya inengaku gawi mandohp ewen. Katawangku kare oloh te tau imercaya akan maharago ampin bagin kare barang panginan te akan kare kawal ije eka bagawi dengae dengan bujur.

¹⁴O Hatallangku, ingat kare taloh je jari ilalusku akan Human Ayum tuntang kare taloh je ilalus intu hete.

¹⁵ Katika te aku mite hong andau Sabat pire-pire biti oloh intu Yuda mahamis anggor. Aton oloh beken tinai je mamuat gandom, anggor, bua ara tuntang kare ramo beken hunjun kalidaie tuntang mimbite akan Yerusalem.

¹⁶Pire-pire biti oloh bara Tirus je melai intu Yerusalem mimbit lauk tuntang sepsimpan ampin ramon dagang akan Yerusalem hong andau Sabat, uka injual akan oloh Yehudi.

¹⁷Aku maningak kare kapalan oloh Yuda tuntang koangku, “En keton dia haratie je keton mawi kapapa awi mamapa andau Sabat?

¹⁸Maka awi kare dosa kalotoh Hatalla jari mahukum tato hiang itah tuntang mampahancor lewu toh. En keton handiai handak mandahang kasangit Hatalla akan Israel dengan mamapa andau Sabat?”

¹⁹Awi te aku marentah uka genep tamparan andau Sabat, iete Jumahat hamalem, kare lawang lewu iatep bajeleng limbah kaput,[23] tuntang dia tau iuap sahelo bara andau Sabat halau, hong andau Sabtu hamalem. Iandakku pire-pire oloh ayungku intu kare lawang akan manjaga uka hong andau Sabat jaton ramon dagang je imbit tame akan huang lewu.

²⁰Tapi aton katikae pire-pire oloh dagang tuntang oloh je manjual kare ramo baramalem intu luar dinding hong andau Jumahat hamalem.

²¹Aku hamauh dengan ewen, “Ngahus ih keton mentai sampai hanjewu intu hete. Awas amon keton malaluse sinde tinai, aku kareh mawi toto-toto!” Bara katika te ewen dia puji dumah tinai hong andau Sabat.

²²Palus kare oloh Lewi inyohoku malalus upacara mamparasih arep tuntang manjaga kare lawang akan mangawas uka kare oloh mahormat andau Sabat. Aku balakudoa, “O Hatalla, keleh mingat aku tagal taloh te kea, tuntang pasi aku tumon sintan Aim ije hai.”

²³ Intu katika te gitangku kea are oloh Yehudi jari kawin dengan kare oloh bawin bangsa Asdod, Amon tuntang Moab.

²⁴Belahe bara kare anak ewen dia harati basa Yehudi, malengkan bara Asdod atawa basa bangsa je beken.

²⁵Aku maningak tuntang manyapa ewen. Aton ije imukul awiku atawa irunapku balaue. Limbah te inyohoku ewen sumpah tagal aran Hatalla, je ewen dengan kare anak ewen dia akan kawin dengan oloh bangsa beken tinai.

²⁶ Koangku, “En dia dosa jetoh kea je ilalus awi Raja Salomo? Jaton raja hong kalunen je labih hai bara ie. Hatalla masi ie tuntang mawi ie raja akan hapus Israel. Aloh kalote ie jari buah ucok awi kare oloh bawi bangsa beken uka mawi dosa.

²⁷Papa toto gawin keton! Keton bahanyi malawan Hatalla awi kawin dengan kare oloh bawi bangsa beken!”

²⁸ Yoyada iete anak Imam Hai Elyasib, tapi ije bara anak Yoyada jadi manantu ain Sanbalat bara lewu Bet-Horon. Awi te Yoyada iharakku bara Yerusalem.

²⁹Aku balakudoa, “O Hatallangku, ingat kilen ampie kare oloh te mamapa pangkat imam tuntang janjin Aim dengan kare imam tuntang kare oloh Lewi!”

³⁰Tumon te irasihku bangsa Israel bara uras oloh bangsa beken. Inukasku kare atoran akan kare imam tuntang kare oloh Lewi, sampai genep bitin ewen aton gawie kabuat.

³¹Iatorku kea uka intu kare katika je inukas, kayu pandok akan parapah tau inyadia tuntang rayat tau mimbit parapah hasil tana je solake. Kajariae aku balakudoa, “Hatallangku, ingat uras taloh handiai toh tuntang berkat aku.”