Read Ngaju NEHEMIA 2 Bible Online

NEHEMIA 2 - Ngaju bible

NEHEMIA 2

¹Hong sinde andau, epat bulan limbah te, iete hong bulan Nisan, metoh raja Artahsasta kuman, aku manyarongan anggor akae hayak ampin baungku masem. Hindai puji ampin baungku kilau hong andau te.

²Awi te ie misek, “Mbuhen ikau ampim paham pehe atei padahal ikau dia haban? Batantu aton taloh je inirokm.” Aku tarewen,

³ palus tombah, “Keleh Raja belom sampai katatahie! Kilen tau rewarm dia pehe atei, amon lewu eka kubur tato hiangku toh tisa buringe bewei tuntang kare lawange jari lepah kinan apui.”

⁴Raja misek, “Jadi, narai kahandakm?” Huang ateiku aku balakudoa manintu Hatalla ja kuasa hong sorga,

⁵palus aku hamauh dengan raja, “Amon Raja manyoho tuntang nahuang malalus palakun rewarm, soho aku akan tanah Yuda uka mamangun haluli lewu eka kuburan tato hiang rewarm.”

⁶Palus raja je kanjerae mondok dengan Ratu, manarima palakungku. Ie misek kilen katahie aku kareh melai intu hete tuntang hamparea haluli. Balalu sanangku akae tanggal je jari inukasku.

⁷Limbah te aku balaku surat akan kare gubernur intu propinsi Euprat Barat,[3] mangat ewen dia manderoh jalanangku sampai akan Yuda.

⁸Beken bara te aku kea balaku surat akan Asap, pangawas padang kayu ain karajaan, uka ie manyadia kayu akan lawang kota tokep Human TUHAN, tuntang akan dinding lewu tuntang huma je akan ielai awiku. Raja malalus uras taloh je ilaku awiku te, awi Hatalla mandohop aku.

⁹Hayak dengan pire-pire perwira tuntang tantara bakuda, je hapan parentah raja magah aku, aku palus haguet akan Euprat Barat. Intu hete surat raja te inyampaiku akan kare gubernur.

¹⁰Tapi metoh Sanbalat, oloh Ben-Horon, tuntang Tobia, ije biti pagawai bara Amon, mahining aku dumah akan kaperluan bangsa Israel, ewen paham sangit.

¹¹Aku sampai intu Yerusalem, palus malayan kaheka telo andau.

¹²Katahin te aku dia mansanan akan ewe-eweh tahiu Hatalla je manenga pangarinah akangku uka mamangun haluli lewu Yerusalem. Andau jewue metoh hamalem aku mimbit pire-pire kawalku haguet akan luar lewu. Beken bara kalidai je inongkang awiku, ikei dia mimbit meto beken je inongkang.

¹³Andau magon hamalem, metoh ikei malihi lewu mahalau Lawang Janah intu hila Barat. Ikei manintu hila Salatan akan Lawang Rutik, mahalau Tahasak Naga. Hong pangguet te aku mariksa kare karusak hong dinding lewu, tuntang gitangku kea kare lawang je jari lepah kinan apui.

¹⁴Limbah te bara hila timor lewu ikei palus akan utara akan Lawang Danum tuntang talagan Raja. Tapi intu hete jaton eka mananjong akan kalidai je inongkangku te, awi lalau are tisan derep kota.

¹⁵Jadi, ikei mohon akan Janah Kidron tuntang marajur pangguet hong hamalem te, sambil mariksa dinding lewu. Limbah te ikei mambelok tuntang haluli akan lewu mahalau Lawang Janah.

¹⁶Jaton ije biti bara kare oloh bakas lewu katawan akan kueh aku haguet, tuntang narai je metoh irancana awiku. Awi sampai katika te aku hindai mansanan taloh en-en akan kare oloh sama bangsa ayungku, aloh akan kare imam aloh akan kare bakas lewu, atawa akan kare pagawai, tuntang eweh bewei je akan omba mamangun lewu Yerusalem.

¹⁷Tapi limbah te aku hamauh dengan ewen, “Tampayah ampin itah je susah toh! Yerusalem tisan lewu bakarak tuntang kare lawange lepah kinan apui. Ayo itah mamangun haluli kare dinding lewu Yerusalem uka itah dia inawah tinai.”

¹⁸Palus inyarita awiku akan ewen kilen ampie Hatalla mandohop aku tuntang narai je jari insanan raja akangku. Ewen tombah, “Ayo itah nampara mamangue!” Palus ewen tata-tatap akan nampara bagawi.

¹⁹Metoh rencana ikei te ingatawan awi Sanbalat, Tobia tuntang Gesem, ije biti oloh Arab, ewen manantawe tuntang hababaka ikei. Koan ewen, “Narai je handak iawi keton? En keton handak malekak arep keton bara kuasan raja balalu malawan raja?”

²⁰Aku tombah, “Hatalla je kuasa hong sorga kareh mawi gawin ikei aton hasile. Ikei kare reware tuntang ikei akan nampara mamangun. Tapi keton jaton hak atawa tempon taloh en-en intu Yerusalem. Tinai amon oloh bapander tahiu Yerusalem, aran keton mahin dia akan inyewut.”