Read Ngaju NEHEMIA 4 Bible Online

NEHEMIA 4 - Ngaju bible

NEHEMIA 4

¹Metoh Sanbalat mahining ikei oloh Yehudi metoh mangambuah dinding lewu, ie sangit toto tuntang nampara mahalalea ikei.

²Intu baun kare kawale tuntang tantara Samaria, ie hamauh, “Narai je kanjeran iawi oloh Yehudi calaka te je dia ie tau mawi taloh en-en te? En ewen handak haluli mamangun lewu toh? Ngira ewen gawi te tau jadi hong jandau, baya dengan maluput parapah? En toyok rotik je jari bakehu te tau iawi ewen jadi batu akan dinding?”

³Palus Tobia je mendeng hong balikate hamauh kea, “Item dinding je imangun awi ewen! Aso parak kayu mahin olihe mampalongkange!”

⁴Balalu aku balakudoa, “O Hatalla, hining, kilen ampie ikei inawah. Keleh TUHAN manempak auh tawah toh akan takolok ewen kabuat. Nauhe kare taloh je ayun ewen irampok tuntang ewen kabuat akan iunda jadi tawanan akan lewun oloh bangsa beken.

⁵Ela mampun kapapan ewen tuntang ela mangalapean dosan ewen. Awi ewen jari manawah ikei je metoh mamangun toh.”

⁶Aloh kalote ikei dia tende mangambuah dinding te, tuntang dia tahi limbah te hapus dinding te jari ingambuah sampai satengah bara kagantong je sapunae, awi rayat bagawi hapan salepah kahias ateie.

⁷Metoh Sanbalat, Tobia tuntang kare oloh bara Amon tuntang Asdod hayak kare oloh Arab mahining gawi mangambuah dinding Yerusalem te sasar miar tuntang kare rumbak hong dinding jari nampara iatep, ewen sangit toto.

⁸Ewen pakat handak manyarang Yerusalem uka mawi kaderoh.

⁹Awi te ikei balakudoa intu Hatallan ikei tuntang manjaga lewu te handau hamalem.

¹⁰Tapi oloh Yuda nampara manyanyi auh lagu kakotok toh: “Kaabas ikei lepah akan mimbit taloh eton, tapi rotik magon are hatuyok. Dia sanggup angate itah bagawi kalotoh mamangun dinding lewu toh.”

¹¹Pandehan te kea musoh ikei mangarangka handak manyarang ikei manantekas, palus mampetei ikei sampai gawin ikei tende.

¹²Tapi oloh Yehudi je melai tokep ewen, pire-pire tingkat dumah talih ikei mansanan rancana ain musoh[7] te.

¹³Awi te aku mambagi-bagi padang, lunju tuntang panah akan rayat, palus aku mandak ewen manumon genep jalahae intu likut dinding, intu kare eka je hindai lepah ingambuah.

¹⁴Metoh aku mite rayat mikeh, aku hamauh dengan ewen, tuntang dengan kare oloh basewut tuntang kare pamimpin, “Ela mikeh dengan musoh! Ingat dengan TUHAN je abas tuntang hai, tuntang keleh bagawi toto akan kare paharim, kare anakm, sawam tuntang humam!”

¹⁵Kare musoh ikei mahining tahiu rencana ain ewen je jari ingatawan awi ikei. Palus ewen harue haratie tahiu Hatalla je jari mambalang rancana ewen te. Limbah te ikei handiai haluli bagawi mangambuah dinding te.

¹⁶Tapi nampara bara andau te baya saparo bara oloh ayungku je bagawi, tinai je saparo manjaga hayak mahapan baju parang tuntang pakakas parang iete, lunju, talawang tuntang panah. Kare pamimpin rayat manenga salepah dukungan akan rayat,

¹⁷je metoh mangambuah dinding te. Kare oloh je meton kare ramo hapa mamangun malalus gawi te hapan silan lenge, awi lenge je silae mimbing sanjata.

¹⁸Kare tukang batu bagawi sambil manangking padang intu kahange. Tukang mampahiau tarompet tanda bahaya, harajur aton intu hila balikatku.

¹⁹Palus aku hamauh dengan rayat, kare oloh je ihormat tuntang kare pamimpin, “Gawi toh jari lombah ekae sampai eka je kejau, sampai itah toh bagawi dia hakatokep tapi batatai huang hapus saran dinding lewu toh, ije biti kejau bara je beken.

²⁰Jadi amon keton mahining auh tarompet, keleh bakumpul bajeleng hong hakaliling ikei hetoh. Hatallan itah kareh parang akan itah.”

²¹Kalote ikei bagawi nampara bara tampalawei sampai kare bintang gitan intu langit. Saparo bara rayat mangambuah dinding, tinai je beken manjaga tuntang lunju intu lengee.

²²Katahin te uras oloh je bagawi tuntang oloh je mandohop ewen, inyohoku baramalem intu Yerusalem. Tumon te, hamalem ikei tau manjaga lewu, tuntang handau mamangun dindinge.

²³Aku kabuat, kare kawalku, oloh ayungku tuntang kare oloh je manjaga aku harajur mahapan pakaian hapa bagawi handau hamalem. Ikei harajur jaga-jaga, sambil mimbing sanjata. [8]