Read Ngaju NEHEMIA 5 Bible Online

NEHEMIA 5 - Ngaju bible

NEHEMIA 5

¹Pire-epire katahie limbah te are oloh Yehudi, aloh oloh hatue aloh oloh bawi, manampara bakotok tahiu kare oloh bangsa ayue.

²Aton je hamauh, “Anakku are. Ikei perlu gandom mangat ikei tau belom.”

³Aton tinai je hamauh, “Aku tarapaksa manyanda tana, kabon anggor tuntang human ikei hapa mamili gandom mangat dia matei balau.”

⁴Tuntang aton tinai je hamauh, “Ikei jari minjam duit akan hapa mambayar pajak je inukas raja akan tana tuntang kabon anggor ikei.

⁵En ikei toh dia oloh Yehudi kea? En dia anak ikei sama dengan anak je beken? Aloh kalote ikei tarapaksa manalua anak ikei jadi jipen. Malahan aton anak bawi bujang ain ikei jari injual akan jadi jipen. Ikei jaton olih bahungap awi tana tuntang kabon anggor ayun ikei jari inyanda ikei.”

⁶Mahining auh kakotok ewen te aku sangit toto.

⁷ Palus aku mawi rencana. Impingatku kare oloh je ihormat tuntang kare pamimpin rayat. Koangku, “Keton manindas kare paharin keton kabuat!” Limbah te aku mawi rapat akan oloh are uka manahiu taloh te,

⁸tuntang hamauh, “Hapan salepah kaabas itah jari manewus kare paharin itah oloh Yehudi je tarapaksa manjual arepe akan oloh bangsa beken. Tapi toh keton toh salenga mamaksa ewen manjual arepe akan keton, padahal keton kea oloh Yehudi!” Kare pamimpin te dia tau tombah aloh hapan ije kabawak kotak.

⁹Palus kuangku tinai, “Gawin keton te dia bahalap! Sapunae keton te musti belom mikeh dengan Hatalla. Tumon te musoh itah je dia manyembah TUHAN te dia keton manenga kesempatan uka manawah itah.

¹⁰Aku kabuat, kare paharingku tuntang kare kawal aingku jari mahanjaman duit tuntang gandom akan rayat. Ikei dia balakue haluli.

¹¹Keleh keton kea mambebas kare utang[9] rayat dengan keton te, aloh jete duit, gandom, anggor atawa undus saitun. Lian bajeleng kare tana, kabon anggor, kabon saitun tuntang human ewen!”

¹²Kare pamimpin tombah, “Nasehat te akan inumon ikei. Ikei akan malian urase tuntang dia akan balaku bayar en-en bara ewen.” Palus aku mantehau kare imam tuntang inyohoku kare pamimpin te sumpah intu taharep kare imam te, iete tahiu taloh je jari insanan ewen te toto-toto ilalus ewen.

¹³Limbah te aku mengkak pandingku[10] palus mangibase sambil hamauh, “Keleh tumon toh Hatalla mangibas genep oloh je dia malalus janjie. Oloh te manjadi oloh je belom susah, huma tuntang panataue kareh induan awi Hatalla!” Hapus pumpong tombah, “Amen” palus manara Hatalla. Balalu kare pamimpin te malalus janjin ewen.

¹⁴Aku jari manjadi gubernur Yuda duewalas nyelo katahie, iete nampara bara nyelo kaduepuluh sampai nyelo katelopuluh due raja Artahsasta marentah. Katahin te aku tuntang kare paharingku dia puji manduan tunjangan aingku kilau gubernur.

¹⁵Kare gubernur je helo bara aku, jadi tanggungan akan rayat awi ewen balaku 40 duit perak ije andau[11] akan panginan tuntang anggor. Tinai, kare pegawai ewen kea mambehat rayat. Tapi aku dia maku mawi gawi kalote awi aku mikeh dengan Hatalla.

¹⁶Kare kaabasku ihapaku mamangun dinding tuntang aku dia dinon petak aloh isut kilau upah, aloh uras pambantu aingku omba bagawi hong gawi mamangun te.

¹⁷Saratus lime puluh biti oloh Yehudi tuntang kare oloh je ihormat ewen bahut inyarongangku kuman hong humangku, tinai oloh maja tatame kea kare oloh maja bara bangsa beken je hakaliling ikei.

¹⁸Sining andau inyadia awiku dengan duitku kabuat ije kongan sapi, jahawen kongan tabiri je baseput tuntang are kongan manuk. Beken bara te genep sapuluh andau inyadiaku anggor. Aloh kalote aku dia maku balaku tunjangan jabatan gubernur, awi aku katawan tanggongan rayat jari babehat.

¹⁹Aku balaku, o Hatalla, ingat uras taloh je ilalusku akan bangsa toh, tuntang keleh mamberkat aku.