Read Ngaju NEHEMIA 6 Bible Online

NEHEMIA 6 - Ngaju bible

NEHEMIA 6

¹Sanbalat, Tobia, Gesem tuntang kare musoh ikei je beken mahining kabar tahiu ikei jari mangambuah dinding kota, tuntang uras petoke jari inutup, aloh metoh te ikei hindai mangkepan kare atep bauntongang akan kare lawang lewu.

²Sanbalat tuntang Gesem mangirim parawei akangku mangat dumah mawi pumpong dengan ewen intu ije bara kare kampong hong Janah Ono. Tapi aku katawan ewen puna handak mancalaka aku.

³Awi te aku mangirim panombah toh akan ewen, “Aku dia tau dumah awi malalus gawi mambatang. Gawi te akan tende amon aku malihie ganan manalih manyondau keton.”

⁴Sampai hangkaepat ewen mangirim parawei je sama akangku, tuntang sining parawei te dumah inengaku panombah je sama kilau te kea.

⁵Hong tingkat je kalime ije biti oloh ayun Sanbalat dumah tuntang manenga surat tabuka[12]

⁶je auh huang surat te kalutoh: “Gesem manoto aton kabar hong marak kare bangsa lakau hetoh, mansanan tahiu pahari tuntang uras oloh Yehudi marancana handak malapas arep keton. Jete bukue pahari mangambuah dinding lewu. Ie mansanan kea je pahari handak mangkat arep jadi raja Yuda.

⁷Pahari jari manunjok pire-pire nabi akan mangkat pahari intu Yerusalem. Kabar te batantu akan sampai raja. Awi te keleh dumah uka manahiu taloh te.”

⁸Tapi aku mangirim panombah tinai kilau toh, “Uras taloh je insanan pahari te dia toto tuntang ingara-ngarang awim kabuat.”

⁹Ewen mancoba mampikeh ikei mangat ikei mampatende gawi te. Aku balakudoa, “O Hatalla, paabas aku!”

¹⁰Lakau katika te kea aku haguet akan human Semaya anak Delaya tuntang eson Mehetabeel, awi ie bahalangan manalih aku. Koae dengangku, “Ayo kue haguet manyahokan intu Human TUHAN. Itah mangunci uras bauntonggange, awi aton oloh je handak mampatei ikau. Mikeh alem toh ikau kareh impatei.”

¹¹Tapi aku tombah, “Aku toh dia oloh je rajin babuhau. Kilau oloh je dia bapangkat imam aku dia tau tame hong Human TUHAN, kareh aku matei. Dia, aku dia maku!”

¹²Limbah mangumang taloh te, aku haron haratie je palakun Semaya te dia bara Hatalla, malengkan bara Tobia tuntang Sanbalat. Ewen jari manyogok Semaya uka manyampai tujum te akangku.

¹³Kahandak ewen iete uka aku mikeh tuntang manumon palakun ewen sampai mawi dosa. Tagal gawi te ewen dinon cara mamapa arangku sampai aku jadi tahiun oloh.

¹⁴Aku balakudoa, “O Hatalla, ingat taloh je ilalus awi Tobia tuntang Sanbalat te. Keleh mahukum ewen! Kalote kea nabi bawi je bagare Noaya tuntang kare nabi je beken je handak mampikeh aku.”

¹⁵Gawi mangambuah dinding te 52 andau katahie tuntang jadi lepah gawie hong tanggal 25 bulan Elul.

¹⁶Katika kare musoh ikei marak kare bangsa lakau hakaliling hete mahining taloh te, ewen mikeh impahawen, awi uras oloh katawan kare gawi te ilalus dengan pandohop Hatalla.

¹⁷Pandehan te kea kare pamimpin oloh Yehudi magon ih mawi surat habaleh surat dengan Tobia.

¹⁸Are oloh Yehudi bakawal dengan Tobia, awi ie te manantun Sekhanya anak Arah. Tinai Yohanan, anak Tobia, kawin dengan anak oloh bawi Mesulam anak Berekhya.

¹⁹Aloh Tobia harajur mangirim surat akangku uka mampikeh aku, tapi kare pamimpin oloh Yehudi te mamander intu taharepku kare kahalap Tobia. Beken bara te uras kare taloh je inyarita awiku akan ewen uras inyampai ewen akae.