Read Ngaju NEHEMIA 8 Bible Online

NEHEMIA 8 - Ngaju bible

NEHEMIA 8

¹Hong bulan uju gagenep oloh Israel jari manetep intu lewun ayu-ayue. Hong tanggal ije bulan te ewen uras hapumpong intu Yerusalem, intu alun-alun intu hila baun Lawang Danum. Ewen balaku mangat Buku hukum parentah induan awi imam Esra, ije biti ahli hong hukum parentah je inenga TUHAN akan Israel hajamban Moses.

²Palus Esra mimbit buku huang pumpong taharep oloh hatue, oloh bawi tuntang anak oloh je sukup kabakase uka maharatie.

³Limbah te, bara hanjewu sampai bentok andau, Esra mambasa hukum parentah te akan ewen. Ewen uras manyeneh toto-toto.

⁴Esra mendeng intu hunjun mimbar kayu je jari inampa tantai akan kaperluan pumpong te. Intu silan hila gantaue mendeng kare oloh toh: Matica, Sema, Anaya, Uria, Hilkia tuntang Maaseya; tuntang silan hila sambile mendeng: Pedaya, Misael, Malkia, Hasum, Hasbadana, Sakharia tuntang Mesulam.

⁵Panggung eka Esra mendeng labih gantong bara kare oloh te, sampai ewen uras tau mite ie. Sana ie muap buku te, ewen uras mendeng.

⁶Esra hamauh, “Tara TUHAN, Hatalla ije hai!” Hapus rayat mangkat lenge ganto-gantong tuntang tombah, “Amen, amen!” Palus ewen sontop manyembah Hatalla.

⁷Limbah te ewen mendeng tuntang mendeng intu genep ekae, pandehan pipire oloh Lewi manarang hukum te akan ewen. Kare oloh Lewi te iete: Yesua, Bani, Serebya, Yamin, Akub, Sabetai, Hodia, Maaseya, Kelita, Asarya, Yosabad, Hanan tuntang Pelaya.

⁸Ewen manyalinan auh Hukum Parentah Hatalla[14] te ije kabagi ije kabagi hayak manarange[15] sampai rayat tau harati taloh je imbasa te.

⁹Mahining auh hukum parentah je imbasa te, rayat lenyoh ateie, palus manangis. Maka gubernur Nehemia tuntang Imam Esra ahli huang hukum parentah te, hayak kare oloh Lewi je manarang Hukum te, mansanan akan hapus rayat kalotoh, “Andau toh je tantai akan TUHAN, Hatallan keton, jadi ela pehe atei atawa manangis.

¹⁰Lius buli, kuman tuntang mihop dengan kahanjak. Tenga belahe bara panginan tuntang anggor keton akan ewen je huang katapas. Andau toh andau je tantai akan TUHAN itah, jadi ela pehe atei. Kahanjak je inenga TUHAN akan keton akan mampaabas keton.”

¹¹Tuntang oloh Lewi kea mampong rayat tuntang hamauh lula-luli, “Ela pehe atei hong andau je ingabeken akan TUHAN toh.”

¹²Balalu hapus rayat buli uka kuman mihop hayak mambagi-bagi panginan akan kare oloh beken. Ewen hanjak awi jari harati riman taloh je imbasa je ihining ewen te.

¹³Andau jewue kare pamimpin jalahan hapumpong, kalote kea kare imam tuntang kare oloh Lewi, palus manalih Esra uka bajar kare ajar hukum parentah TUHAN.

¹⁴ Ewen mandino intu hukum parentah je inenga TUHAN hajamban Moses, TUHAN manyoho ungkup Israel melai hong kare Tingkap Dawen pandehan katahin pesta Tingkap Dawen.

¹⁵Tagal te intu hapus Yerusalem intu kare lewu tuntang intu kare kampong, ewen mansanan hukum parentah toh,[16] “Lius akan bukit tuntang duan kare edan kayu alau, saitun, batang undus, palapah korma tuntang kare kayu je beken hapa mawi pasah tumon atoran hong Buku hukum parentah.”

¹⁶Palus rayat haguet manduan kare edan te. Ewen uras mawi kare kemah intu kare sapau je rata hong hunjun human ewen, intu watas baun humae, intu alun-alun hila baun Human TUHAN, intu alun-alun tokep Lawang Danum tuntang intu alun-alun tokep Lawang Epraim.

¹⁷Sahapus rayat je jari buli bara tawanan te mawi kare kemah te, palus melai intu hete. Jetoh pangkasolake taloh te ilalus bara jaman Yosua anak Nun, maka uras hanjak tuntang sanang.

¹⁸Uju andau katahie ewen pesta. Genep andau bagian buku hukum parentah Hatalla imbasa awi Esra. Intu andau je kahanya ilalus upacara mampahapuse, tumon atoran hukum parentah.