Read Ngaju NEHEMIA 9 Bible Online

NEHEMIA 9 - Ngaju bible

NEHEMIA 9

¹Hong tanggal due puluh epat bulan te kea, rayat Israel hapumpong. Ewen puasa uka mamparahan kanyasal tagal kare dosan ewen. Ewen mamisah arepe bara uras oloh bangsa beken. Kilau tanda pehe atei, ewen mahapan tapih karong tuntang manawor petak akan hunjun takoloke. Limbah te ewen mendeng tuntang mangaku kare dosan ewen tuntang dosan tato hiang ewen.

³Kira-kira telo jam Buku hukum parentah TUHAN, Hatallan ewen, imbasa akan ewen, maka katahin telo jam tinai limbah te ewen mangaku kare dosan ewen. Limbah te ewen sontop tuntang mayembah TUHAN, Hatallan ewen.

⁴Intu hete aton mimbar akan kare oloh Lewi tuntang intu hunjue mendeng Yesua, Bani, Kadmiel, Sebanya, Buni, Serebya, Bani tuntang Kenani. Dengan auh hai ewen balakudoa manintu TUHAN, Hatallan ewen.

⁵Sombayang andau te inampara awi kare oloh Lewi toh iete: Yesua, Kadmiel, Bani, Hasabneya, Serebya, Hodia, Sebanya tuntang Petahya. Ewen hamauh, “Mendeng tuntang tara TUHAN Hatallan itah! Tenga tara Akae katatahie! Tara aran Aie je kontep katinduh-kahai, aran je tamam manangkalau bara kare auh tara!”

⁶Limbah te rayat Israel balakudoa kalotoh, “Ikau TUHAN, Ikau Je Tunggal; inampa Ayum bintang tuntang hapus langit, tuntang kea tasik tuntang petak hayak uras kare taloh huange, palus Ikau manenga pambelom tuntang ihaga Awim. Kare kuasa intu langit sontop tuntang mayembah Ikau, ewen sontop Akam tuntang mandeko utute awie imparunduk.

⁷ Ikau TUHAN, Hatalla, Ije Tunggal. Ikau mintih Abraham bara bentok bangsae. Ur hong Babel jari ilihie, awi Ikau kabuat je mangagalan ie. Balalu Ikau manenga aran taheta akae; Abraham, jete sewute bara katika te.

⁸ Ikau supa ie baketep dengam, tuntang panumon. Balalu Ikau mampendeng janji ije dehen dengae. Tanah Kanaan, Het tuntang Amori, Peris, Yebus tuntang Girgasi, uras te handak inengam akae, akan eka turonae melai. Limbah te Ikau malalus janjim te dengae, awi Ikau adil tuntang baketep.

⁹ Ikau mite kasusah tato hiang ikei hong katika je jari halau. Ikau mahining tangis intu Misir tuntang intu Tasik Raruju.

¹⁰ Taharep raja Misir Ikau mawi kare taloh heran malawan raja, tuntang kea taharep kare pagawai tuntang rayate, awi Ikau katawan kilen ampie ewen mangapehe ungkup Ayum. Awi te arana Ayum batarong hapanjung sampai andau toh.

¹¹ Hapa manampa jalan akan ungkup Ayum, Ikau mawi danum tasik hambilang hasansila. Ikau mampadimpah ewen mahalau palempang tasik je dia bisa. Kare oloh je manggoang ewen tangkelem intu danum handalem sama kilau batu leteng hong tasik je bakaike-ikeh.

¹² Hapan ije baunandau Ikau mangagalan ewen metoh handau. Tuntang hamalem impalawa Awim ewen hapan butop apui.

¹³ Hong Bukit Sinai Ikau mohon bara langit, balalu Ikau hakotak dengan ungkup Ayum. Tuntang manenga akan ewen atoran tuntang hukum parentah, je adil, bujur tuntang baguna.

¹⁴Andau Sabat je barasih patut ihaga awi ewen, tuntang mahalau Moses ikau manenga hukum parentah Aim.

¹⁵ Metoh ewen balau inenga Awim rote bara langit akan ewen. Tuntang bara batu je sintel tuntang batekang, danum tatamba teah belai balua manampusak Awim. Ikau menyoho ewen melai intu tanah je injanji Awim dengan ewen hapan sumpah.

¹⁶ Tapi tato hiang ikei bajoho tuntang parisang, tuntang kare hukum parentah Aim dia ewen manumoe.

¹⁷ Ewen dia manumon kare kahalap Aim ingalapean, ewen kalapean kare taloh heran je ilalus Awim. Dengan kajohoe ewen mintih kapalae, uka mimbit ewen haluli jadi jipen hong Misir. Tapi Ikau Hatalla je pamampun, panjang sabar, pamasi tuntang sintae jaton bara tikas. Asim paham hai Ikau dia malihi ewen.

¹⁸ Ewen mawi hampatong kilau sapi. Balalu ewen hamauh, ‘Toh Hatallam, je mimbit keton bara Misir, bara eka kahajipen.’ O Hatalla Ikau kabuat je inawah ewen!

¹⁹ Tapi Ikau dia malihi ewen intu padang pasir te, awi kontep asin Aim. Butop baunandau dia Ikau manduae haluli, je mamparahan jalan akan ewen handau hamalem.

²⁰Huang kataun Aim ikau majar ewen. Ewen kuman tuntang mihopjaton bara katapas.

²¹Katahin epat puluh nyelo intu padang je tunis benyem, Ikau manyukop taloh ije imerlu ewen. Pakaian ewen dia puji rusak, tuntang pain ewen dia puji pehe atawa kembang.

²² Ikau manenga akan ewen kamanang bara kare bangsa tuntang kare karajaan, je intu saran helat watas tanah ewen. Heshbon, lewun raja Sihon induan ewen; Basan lewun raja Og ielai ewen.

²³ Ikau manjadian turonan ewen kilan bintang intu langit. Ikau manenga tanah eka ewen melai, petak je jari injanji Awim akan tato hiang ewen.

²⁴ Turonan ewen mampakalah tanah Kanaan; oloh je melai hete impakalah Awim. Akan ungkup Ayum Ikau manenga kuasa uka mawi gawi manumon kahandak ewen, taharep bangsa Kanaan tuntang kare rajae.

²⁵ Ungkup Ayum marabut kare kota eka ewen bakalindong, petak basiwoh tuntang huma kontep panatau. Kare kalin danum tuntang tahasak induan ewen, kabon anggor, batang saitun tuntang kare bua je beken. Ewen basepu-seput awi ewen kuman tumon kahandak belaie. Kare panengan Aim je bahalap jari kamean ewen kamangate.

²⁶ Tapi ungkup Ayum malekak arepe bara Ikau tuntang malawan Ikau, ewen manalikut hukum parentah tuntang atoran Ayum, mampatei karenabi je mampingat ewen, je balaku ewen mules talih Ikau, Hatallae. O TUHAN gagenep Ikau inawah awi ewen,

²⁷maka Ikau manyarah ewen akan musohe je dengan kakarase manguasa tuntang mangepehe ewen. Tapi hong kajake, ewen mantehau Ikau balaku awat, tuntang Ikau tombah auh ewen bara sorga. Hong asim je hai Ikau manenga kare pamimpin akan ewen, je maliwus ewen bara musoh.

²⁸Amon jari belom mangat, ewen mawi dosa tinai. Tuntang haluli Ikau manalua musoh mampakalah ewen. Tapi amon ewen hobah tuntang manyasal, ewen mantehau Ikau balaku inyalamat. Hong sorga Ikau mahining, tuntang raju-rajur Ikau mandohope, awi Ikau masi tuntang paham kasayang Aim.

²⁹ Ikau mampingat ewen uka manumon ajar Aim tapi huang kajohoe ewen manolak kare hukum parentah Aim. Padahal, amon hukum parentah Ayum te ilalus, batantu pembelom ewen harajur huang kasanang. Ewen puna batekang ateie parisang dia maku manumon.

³⁰ Bara nyelo akan nyelo Ikau sabar mampingat ewen: mahalau kare nabi, Roh Ayum hamauh dengan ewen. Tapi ungkup Ayum te manutup pindinge, balalu Ikau manyarah ewen akan kakare bangsa bara kakare tanah.

³¹Tapi, awi asin Aim je tangkalau kahaie, Ikau malihie atawa mambinasae tuntang Ikau mangalapea ewen. Toto Ikau Hatalla je jaton eka tandinge, asin Aim tangkalau kahaie tuntang kontep angat kamasi.

³² O Hatalla, Hatallan ikei, je abas! Hatalla je hai tuntang indu ingikeh! Ikau baketep dengan janjin Aim; kare janjin Aim uras inggenep tuntang ilalus Awim. Bara metoh jaman raja Asur mahenyek ikei, sampai toh haream, kinjap toto ikei kapehe. Rajan ikei, imam, nabi tuntang kare oloh je ihormat intu marak bangsa ikei, tinai kea tato tuntang rayat jadi uras buah kejake. Ela kalapean kare kajake te! Ela Ikau menganae bara pangingat Aim!

³³Gawin Aim adil, Ikau mahukum ikei je badosa; Ikau harajur baketep aloh ikei kontep kasalan.

³⁴Kare tato, raja, imam tuntang oloh je ihormat intu bentok bangsae, malanggar hukum parentah Aim hayak manawah jete. Kare tingak tuntang hukum parentah je jari inenga Awim, dia ewen padulie tuntang dia ewen mahininge.

³⁵Ikau manenga akan kare raja je marentah ungkup Ayum, metoh ewen melai hong tanah je lombah tuntang basiwoh panengan Ayum. Tapi aloh kalote ewen dia maku malihi pambelome je papa, dia maku manempo Ikau tuntang sombayang.

³⁶Maka toh ikei toh manjadi rewar intu petak je inenga Awim kilau pusaka. Petak toh basiwoh kontep dengan hasil bara petak je sapunae ikei mangkeme kamangate.

³⁷Kakare hasil petak toh inyarah akan raja hong tanah toh. Kare oloh kuasa te iangkat Awim marentah ungkup Ayum kilau hukuman tagal dosan ikei intu taharep Ikau. Ewen marentah sakahandak ateie mawi ikei tuntang meto pambelom ayun ikei. Awi te toh ikei buah kajake, kontep kahetang tuntang kapehen atei!”

³⁸Hagalang kare kajadian te, ikei rayat Israel mampendeng janji je dehen tuntang inyurat, tuntang inenga cap bara pamimpin ikei, kare oloh Lewi tuntang ije biti imam ain ikei.