Read Ngaju ESTER 1 Bible Online

ESTER 1 - Ngaju bible

ESTER 1

¹ Ahasweros raja Persia marentah bara lewu je bagare Susan. Karajaan ayue te hai toto, manampara bara India sampai Sudan, je imbagie manjadi 127 propinsi.

³Intu nyelo je kateloe kahum ie jadi raja, Raja Ahasweros mawi pesta hai akan pagawai ayue bara je pangkate gantong sampai je randah. Kalote kea kare pangkalima parang oloh Persia tuntang Media, kakare gubernur tuntang oloh je gantong pangkate bara propinsi uras dumah manalih pesta te.

⁴Jahawen bulan katahie raja mamparahan panatau istanae tuntang katamam hayak kaandal karajaan ayue.

⁵Limbah te raja malalus pesta tinai akan kakare rayat intu Susan, aloh tatau aloh je belom susah. Pesta te ilalus ije minggo katahie tuntang ilalus hong parantaran taman istana ain raja.

⁶Parantaran istana ihias mahapan dinding benang bara benang lenan biru tuntang baputi, imeteng dengan lawai lenan lamos tuntang inyangkawit intu kare tisin perak je ingkepan intu kare tihang marmar. Intu pendae oloh mingkes kare bale-bale amas tuntang perak intu hunjun laseh je ihias hapan marmar baputi, kristal bahandang, upak mutiara je malinyau tuntang batu pirus biru.

⁷Raja manyadia anggor je are je inyarongan hapan kare sangkir amas je sepsimpan ampin tampae.

⁸Kare oloh je omba pesta dia inikas belaie mihop anggore tapi dia kea imaksa mihop. Raja jari manenga parentah akan kare pagawai istana, uka gagenep oloh je dumah manalih pestae inyarongan tumon kanahuang ayu-ayue.[1]

⁹Metoh te, Wasti, kabalin raja, mawi pesta kea akan kare oloh bawi intu istana.

¹⁰Hong andau je kaujue, raja miho-mihop sampai mangkeme paham kahanjake. Awi te ie mantehau uju pejabat khusus je jadi pelayan ayue kabuat; kare ewen te iete, Mehuman, Bista, Harbona, Bigta, Abagta, Setar tuntang Karkas.

¹¹Ie manyoho ewen mimbit Ratu Wasti intu taharepe dengan makota karajaan hunjun takoloke. Ratu te bahalap toto tuntang raja handak mamparahan kahalape akan kare oloh hai tuntang kakare oloh je omba pesta.

¹²Tapi metoh kare pejabat te manyampai peteh raja akan Ratu Wasti, ratu dia maku dumah, sampai mawi raja sangit toto.

¹³Raja bahut balaku tirok bara kare oloh je pintar-harati tahiu atoran tuntang hadat. Awi te ie mantehau kare oloh pintar-harati je tau manenga tirok akae je katawan narai je patut ilalus hong perkara je tumon te.

¹⁴Kare oloh pintar-harati je kinjap intehaue iete: Karsena, Setar, Admata, Tarsis, Meres, Marsena tuntang Memukan. Ewen te kare oloh Persia tuntang Media je mimbing pangkat pangkagantonge huang karajaan.

¹⁵Koan raja dengan ewen uju te, “Aku jari manyoho kare pejabat khusus ayungku manalih Ratu Wasti uka balaku ie dumah talih aku. Tapi ie dia maku. Manumon atoran, narai tindakan je musti ilalus itah dengae?”

¹⁶Palus koan Memukan dengan raja tuntang kare oloh hai, “Tagal gawie te dia baya Tuan Raja bewei je jari inawah Ratu Wasti, malengkan uras kare pagawai Tuan Raja, tuntang genep oloh hatue je aton hong karajaan toh!

¹⁷Awi gawin ratu te ingatawan awi kakare oloh bawi, maka ewen kareh manawah genep banan ewen mije-mije. Ewen kareh hamauh je Tuan Raja jari marentah Ratu Wasti uka manalih ie, tapi Ratu dia maku dumah.

¹⁸Jadi, amon kare sawan oloh hai intu Persia tuntang Media mahining taloh te, batantu ewen bajeleng mansanae akan genep banan ewen. Kajariae, sawan oloh kareh malawan prentah banae tuntang banan oloh kareh malait sawae.

¹⁹Tagal te ikei balaku uka Tuan Raja mawi tukas je Ratu Wasti dia tau tinai manalih Tuan Raja. Tukas te jadi atoran intu Persia tuntang Media, tuntang dia tau imbalang tinai. Limbah te, tenga pangkat ratu je iimbing Ratu Wasti te akan oloh bawi beken je labih bahalap bara ie.

²⁰Amon auh tukas Tuan Raja te jari tayap akan hapus karajaan je lombah toh, genep sawan oloh kareh mahormat banae, aloh ie oloh tatau atawa oloh je belom susah.”

²¹Tirok Memukan te inarima awi raja tuntang kare oloh hai, palus raja bajeleng malaluse.

²²Ie mangirim surat parentah akan kakare propinsi karajaan, hong basa tuntang hurup ain genep propinsi te. Parentah te auhe iete[2] intu genep huma serok oloh, banan oloh bawi ih je patut jadi kapala, tuntang je patut matoh taloh handiai huang humae.