Read Ngaju ESTER 2 Bible Online

ESTER 2 - Ngaju bible

ESTER 2

¹Pire-pire katahie tinai, aloh raja jari dia sangit tinai, ie magon harajur manirok gawin Ratu Wasti tuntang tukas je jari manjato akae.

²Awi te kare oloh pintar-harati je tokep dengan raja manenga tirok kilau toh, “Je kahalape, keleh inggau bawi tabela je bahalap ampie akan Tuan Raja.

³Keleh Tuan Raja mangkat kare pagawai intu hapus propinsi hong karajaan toh uka manggau kare oloh bawi je bahalap palus mimbit ewen urase akan istana bawi intu Susan toh. Hagai, pejabat khusus je jadi kapala huma serok istana bawi, kareh maurus ewen tuntang manenga akan ewen ramon kahalap oloh bawi.

⁴Limbah te keleh Tuan Raja mintih oloh bawi je paling eka karajin Tuan Raja tuntang mawi ie jadi ratu kilau gantin Ratu Wasti.” Raja manarima tirok te tuntang malaluse.

⁵Intu lewu Susan te aton ije biti oloh Yehudi arae Mordekhai anak Yair. Ie turonan Kis tuntang Simei bara suku Benyamin.

⁶ Mordekhai jari inawan metoh Yerusalem impakalah awi Nebukadnesar raja Babel. Mordekhai jadi tawanan akan Babel hayak dengan Yoyakin raja Yuda, tuntang are tawanan je beken.

⁷Ie aton paharie ije tato, ije biti oloh bawi je bahalap ampin mata baue tuntang bahalap biti berenge, arae Ester, tuntang arae hong basa Ibrani iete Hadasa. Oloh bakas Ester jari matei. Ie jadi anak duan Mordekhai tuntang ihagae sama kilau anak ayue kabuat.

⁸Limbah perentah raja insanan, are oloh bawi imumpong intu Susan tuntang Ester aton marak ewen te. Ie palus iimbit akan istana raja tuntang inyarah akan Hagai pamimpin istana bawi.

⁹Hagai kagum mite Ester tuntang rajin dengae. Bajeleng ie manenga ramon kahalap oloh bawi hayak panginan je patut akae. Ester iindah akan eka je paling bahalap intu istana bawi te tuntang uju biti oloh bawi je paling apik intu istana raja inenga gawi uka maharago ie.

¹⁰Awi peteh Mordekhai, Ester dia mansanan arepe je ie te oloh Yehudi.

¹¹Genep andau Modekhai tanjo-tanjong intu parantaran baun istana bawi te uka misek ampin Ester tuntang taloh je kareh manjadi dengae.

¹²Manumon atoran, kare oloh bawi inenga ramon kahalap katahin ije nyelo: katahin jahawen bulan mahapan minyak campur manyan, tuntang jahawen bulan limbah te mahapan minyak campur kare taloh beken. Limbah te gagenep oloh bawi dinon gilir akan manaharep raja Ahasweros.

¹³Metoh ije biti bawi manaharep raja, ie tau mahapan en bewei manumon karajie.

¹⁴Ie iimbit akan istana raja bamalem, tuntang andau jewue ie iimbit akan istana beken, tuntang iharago awi Saasgas, ije biti pejabat khusus raja je tantai maharago kare gundik raja. Oloh bawi te dia akan manaharep raja tinai, kacuali amon raja nahuang dengae tuntang mantehau ie hayak manyewut arae.

¹⁵Palus sampai gilir Ester akan manaharep raja. — Ester te anak Abihail tuntang ie hampahari ije tato dengan Mordekhai je jari manduan ie manjadi kilau anak ayue kabuat; Ester ingilak genep bitin oloh je manampayah ie. Metoh ie haguet manaharep Raja, Ester hapakaian manumon atoh tuntang tirok Hagai, kapala istana bawi.

¹⁶Kalote hong nyelo kaujue kahum Ahasweros marentah, maka hong bulan sapuluh, iete bulan Tebet, Ester iimbit manaharep raja Ahasweros intu istana raja.

¹⁷Ie manyanang tuntang manenga kahanjak akan raja labih bara kare oloh bawi je beken. Awi te ie paham inyinta awi raja. Palus raja mangkepan makota karajaan intu takolok Ester tuntang mawi ie jadi ratu mangganti Ratu Wasti.

¹⁸Limbah te raja mawi pesta hai kilau tanda akan mahormat Ester tuntang marawei kakare pagawai tuntang oloh hai ayue. Ie mansanan andau malayan[3] akan hapus karajaan tuntang mambagi-bagi are toto panenga.

¹⁹Katika te Mordekhai jari iangkat awi raja jadi pagawai karajaan.

²⁰Ester hindai kea mansanan arepe je ie te oloh Yehudi, awi ingahana Mordekhai. Ester manumon auh Mordekhai sama kilau ie metoh korik tuntang ihaga awi paharie ije tato te.

²¹Hong sinde andau metoh Mordekhai bagawi intu istana, due biti pejabat khusus ain raja, iete Bigtan tuntang Teres, pakat handak mampatei Raja Ahasweros, awi ewen paham basingi dengae.

²²Rencana te ingatawan awi Mordekhai tuntang ie bajeleng manyampaie akan Ester. Palus Ester manyarita akan raja taloh je ingatawan awi Mordekhai.

²³Perkara te iriksa, palus tarang je auh te puna toto. Kadadue oloh te ihukum gantong. Kajadian te incatet hong buku sejarah karajaan tumon parentah raja.