Read Ngaju EKSODUS 10 Bible Online

EKSODUS 10 - Ngaju bible

EKSODUS 10

¹TUHAN hamauh dengan Moses, “Lius manaharep raja. Aku jari mawi ie tuntang kare pagawai ayue badungil, mangat Aku tau malalus kare taloh heran intu bentok ewen,

²tuntang mangat ikau tau manyarita akan kare anak esom kilen ampie Aku mureh oloh Misir hapan kare taloh heran te. Te uras keton kareh katawan je Aku toh TUHAN.”

³Palus Moses tuntang Aron haguet manaharep raja tuntang hamauh dengae, “TUHAN, Hatallan oloh Ibrani, hamauh, ‘Sampai hamparea ikau dia maku mamenda Aku? Keleh soho ungkup-Ku haguet, mangat ewen tau sombayang manyembah Aku.

⁴Amon ikau magon kea mangahana, maka jewu impadumah-Ku sangkalap akan lewum.

⁵Hapus petak kareh ingalambo samasinde awi sangkalap je are toto te. Uras tisan pambulan, sampai kare batang-kayu je dia imbinasa awi ujan es, kareh impalepah awi sangkalap te.

⁶Istanam, kare human pagawai aim tuntang human rayat kareh kontep sangkalap. Calaka toh kareh labih paham bara taloh je puji ingkeme awi tato hiang keton.’ ” Limbah te Moses mules tuntang haguet.

⁷Palus kare pagawai hamauh dengan raja, “Sampai hamparea oloh te harajur manyusah itah? Nalua ih kakare oloh Ibrani te haguet mangat manyembah TUHAN, Hatallan ewen. Item lewun itah toh jari hancor!”

⁸Moses dengan Aron intehau haluli manaharep raja. Koan raja dengan ewen, “Keton tau haguet mangat manyembah TUHAN, Hatallan keton. Tapi eweh bara keton je handak haguet?”

⁹Tombah Moses, “Uras ikei, bakas tabela. Ikei mimbit uras anak ikei, uras sapi, tabiri, tuntang kambing ayun ikei. Awi ikei musti mawi pesta hai hapan mahormat TUHAN.”

¹⁰Koan raja, “Dia baka aku manyoho keton mimbit kare oloh bawi tuntang kare anak keton! Je ilaku keton te sama ih dengan maharap aku balaku TUHAN mamberkat keton. Jadi tarang akangku je keton aton kahandak je papa.

¹¹Dia! Baya oloh hatue bewei je tau haguet manyembah TUHAN, amon keton puna handak sombayang bewei!” Hapan auh te Moses tuntang Aron iharak bara istana.

¹²Palus TUHAN hamauh dengan Moses, “Tajok lengem akan hunjun tanah Misir, kare sangkalap kareh dumah tuntang kuman kare taloh imbul je batisa limbah ujan es.”

¹³Moses manggatang sukahe tuntang TUHAN mawi riwut timor manampur lewu te hapus andau tuntang hapus alem. Tokep hanjewu riwut te mimbit kare sangkalap je dia lue-luen karee,

¹⁴ sampai kontep hapus lewu. Hindai puji oloh mite sangkalap je kalote karee. Taloh kalote dia akan manjadi tinai.

¹⁵Hapus petak ingalambo sangkalap sampai babilem ampie. Ewen kuman en bewei je dia impalomos awi ujan es te, tamput kare bua intu upoe. Hapus tanah Misir jaton je bahijau je batisa intu kare batang-kayu atawa pambulan.

¹⁶Raja bajeleng mantehau Moses tuntang Aron palus hamauh, “Aku jari badosa intu taharep TUHAN, Hatallan keton tuntang intu taharep keton.

¹⁷Ampun dosangku sinde toh. Keleh balakudoa intu TUHAN, Hatallan keton, mangat Ie manduan bara Aku hukuman je mampatei toh.”

¹⁸Moses malihi raja tuntang balakudoa manintu TUHAN.

¹⁹Palus TUHAN mobah tintun riwut jadi riwut barat je paham toto, kare sangkalap te inampur riwut tuntang imbit akan Tasik Raruju. [9] Ije mahin jaton je tapalihi intu tanah Misir.

²⁰Tapi TUHAN mawi raja badungil, tuntang ie dia manalua oloh Israel haguet.

²¹TUHAN hamauh dengan Moses, “Tajok lengem, maka tanah Misir kareh buah taloh kaput pijem.”

²² Moses mantajok lengee akan hunjun, palus katahin telo andau hapus tanah Misir buah taloh kaput pijem.

²³Oloh Misir dia tau mite en-en tuntang katahin te jaton ije oloh je tau mananjong akan hete-hete. Tapi intu kare human oloh Israel tetep balawa.

²⁴Palus raja mantehau Moses tuntang hamauh, “Keton tau haguet manyembah TUHAN keton. Kare oloh bawi tuntang kare anak oloh tau omba. Tapi sapi, tabiri tuntang kambing keton dia tau iimbit.”

²⁵“Amon kalote Tuangku musti manenga akan ikei meto je tau akan indu parapah je ingehu akan TUHAN, Hatallan ikei.

²⁶Uras meto ain ikei patut ikei mimbite; ije kongan mahin dia ikei malihie. Bara meto te ikei mintih je kueh je tau iluput akan indu parapah akan TUHAN, Hatallan ikei. Harue intu kanih ikei kareh katawan meto kueh je handak iluput awi ikei.”

²⁷TUHAN mawi raja badungil, sampai ie dia maku manyoho bangsa Israel haguet.

²⁸Koan raja dengan Moses, “Lius haguet bara taharepku! Ela sampai ikau gitangku tinai! Amon sampai gitangku tinai baum, ikau kareh matei!”

²⁹“Kilau koan Tuangku,” koan Moses. “Tuangku batantu dia mite aku tinai.”