Read Ngaju EKSODUS 11 Bible Online

EKSODUS 11 - Ngaju bible

EKSODUS 11

¹TUHAN hamauh dengan Moses, “Aku handak malaboh ije calaka tinai akan raja Misir tuntang rayat, ayue. Limbah te, ie handak malapas keton haguet. Sampai keton uras iharake bara hetoh.

²Tagal te, sanan akan bangsa Israel; soho ewen balaku hiasan amas tuntang perak bara oloh tetangga ewen.”

³TUHAN mawi oloh Misir masi dengan oloh Israel. Moses jadi oloh je paham ihormat awi kare pajabat tuntang hapus rayat Misir.

⁴Moses hamauh dengan raja, “Kalotoh koan TUHAN, ‘Lakau bentok alem aku kareh mangumbang tanah Misir.

⁵Genep anak bakas hatue kareh matei, nampara bara anak raja Misir sampai dengan anak ain jipen bawi je manggiling gandom. Anak je solake inakan bara kakare meto matei kea.

⁶Hong hapus Misir kareh ihining auh tangis tatum je hai, je baya puji sinde te manjadi dia puji helo tuntang dia puji tinai limbah te.

⁷Tapi intu marak Israel, aloh olon atawa meto dia ingapehe. Te keton kareh katawan je Aku, TUHAN, mangabeken oloh Misir bara oloh Israel.’ ”

⁸Kajariaee Moses hamauh, “Uras pagawai Tuangku kareh dumah tuntang sontop intu taharepku hayak balaku mangat aku tuntang bangsa ayungku malihi lewu toh. Limbah te aku haguet.” Moses balait toto palus raja ilihie.

⁹TUHAN hamauh dengan Moses, “Raja dia baka paduli auhm, mangat Aku tau mawi labih are taloh heran hong tanah Misir.”

¹⁰Moses tuntang Aron mawi uras taloh heran te intu taharep raja. Tapi TUHAN mawi ie badungil, sampai ie dia maku manyoho oloh Israel malihi lewue.