Read Ngaju EKSODUS 13 Bible Online

EKSODUS 13 - Ngaju bible

EKSODUS 13

¹TUHAN hamauh dengan Moses,

² “Luput akangku uras anak hatue je tambakase. Genep anak bakas hatue Israel, tuntang genep meto hatue je solake inakan, jete ayung-Ku.”

³Moses hamauh dengan bangsa ayue Israel, “Andau toh TUHAN malapas keton hapan kuasan Aie je hai, sampai keton tau balua bara Misir, eka keton ihajipen. Awi te, keleh mingat andau jetoh. Ela kuman rote je iragi.

⁴Andau toh, tanggal ije bulan Abib atawa bulan ije, keton malihi tanah Misir.

⁵Hapan sumpah TUHAN hanjanji dengan tato hiang keton uka manenga akan keton lewu bangsa Kanaan, Het, Amori, Hewi tuntang Yebusi. Limbah TUHAN mimbit keton akan tanah je tatau tuntang basiwoh te, genep nyelo hong bulan Abib, keton musti manguan gawi toh.

⁶Katahin uju andau keton musti kuman rote je dia iragi, tuntang huang andau je kaujue keton musti manampa pesta hapa mahormat TUHAN.

⁷Katahin uju andau keton dia tau kuman rote je iragi, tuntang intu hapus lewun keton dia tau aton ragi atawa taloh je mahapan ragi.

⁸Hong tamparan pesta te keton musti manyarita akan anak keton je hatue iete kakare taloh je ilalus keton toh tagal kakare taloh je jari ilalus TUHAN akan keton metoh keton malihi tanah Misir.

⁹Pesta toh indu pampingat akan keton kilau tanda je imeteng intu lenge atawa lingkau keton. Pesta toh mampingat keton mangat keton harajur manarima kasih tuntang bajar tahiu parentah TUHAN, awi TUHAN mampalua keton bara tanah Misir hapan kuasan Ayue je hai.

¹⁰Keleh malalus parentah toh genep nyelo intu katika je jari inukas.”

¹¹Moses hamauh dengan bangsa ayue Israel, “TUHAN kareh magah keton akan tanah Kanaan je injanji Awie hapan sumpah dengan keton tuntang tato hiang keton. Limbah tanah te jadi ayun keton,

¹² keton musti maluput genep anak hatue je tambakase tuntang genep meto hatuee je solake inakan. Uras jete ayun TUHAN;

¹³tapi genep kalidai hatuee je solake inakan patut inewus bara TUHAN je akan te keton maluput ije kongan anak tabiri akan gantie. Amon keton dia maku manewus kalidai te, uyate akan imelek. Genep anakm je hatue je solake inakan patut inewus.

¹⁴Amon hong rahian andau anakm misek en riman kakare taloh te, keton patut tombah kalotoh, ‘Hapan kuasa je hai TUHAN mimbit ikei balua bara tanah Misir, eka ikei ihajipen.

¹⁵Metoh raja Misir karas ateie tuntang dia maku malapas ikei haguet, TUHAN mapatei gagenep anak hatue je tambakase intu Misir, aloh anak olon atawa anak meto. Jete bukue itah maluput akan TUHAN genep meto hatue je solake inakan, tapi itah manewus kare anak je tambakase ain itah.’

¹⁶Jete jadi pampingat akan itah kilau tanda je imeteng intu lenge atawa lingkau itah. Tumon te itah kareh tetep impingat je TUHAN jari mampalua itah bara Misir hapan kuasa je hai.”

¹⁷Limbah raja Misir malapas bangsa Israel haguet, Hatalla dia mimbit ewen mahoroi kare jalan je mahalau tanah Pilistin, aloh jete jalan je pangkametase. Hatalla manirok, “Mikeh kareh oloh te manyasal amon katawan je ewen musti hakalahi, palus buli akan Misir.”

¹⁸Tagal te TUHAN mimbit ewen mahoroi jalan kaliling mahalau padang pasir manintu Tasik Raruju. [11] Metoh haguet bara Misir, kare oloh Israel te mimbit pakakas parange kilau handak kalahi.

¹⁹ Moses mimbit kare tulang Yosep, awi metoh ie magon belom Yosep manyoho oloh Israel sumpah je ewen nahuang malalus taloh te. Kalotoh peteh Yosep, “Metoh TUHAN malapas keton, keton musti mimbit hantungku bara eka toh.”

²⁰Oloh Israel haguet bara Sukot tuntang mampendeng kemahe intu lewu Etam, intu saran padang pasir.

²¹Amon katika handau TUHAN mananjong intu hila baun ewen hapan tihang baunandau tuntang amon hamalem ie mananselo ewen huang tihang apui hapan mamparahan jalan. Tumon te ewen tau manajong handau hamalem.

²²Janda-jandau tihang baunandau aton intu hila baun bangsa oloh te tuntang ije ale-alem tihang apui mampahayak ewen.