Read Ngaju EKSODUS 15 Bible Online

EKSODUS 15 - Ngaju bible

EKSODUS 15

¹ Palus Moses tuntang kare oloh Israel manyanyi nyanyi toh hapa manara aran TUHAN, “Aku handak manyanyi akan TUHAN, tagal Ie jari manang hai. Uras kuda dengan oloh je manongkange injakahe akan tasik.

² TUHAN pandohopku je abas; ie je manyalamat aku, Ie Hatallangku, aku handak manara aran Aie, Hatalla je inyembah tato hiangku, aku mampahai Ie.

³TUHAN te pangkalima je gagah, TUHAN, jete aran Aie.

⁴Tantara Misir tuntang kakare karetae injakahe akan tasik. Kare perwira je paling gagah leteng intu Tasik Raruju.

⁵Ewen inelen awi tasik je handalem, tuntang kilau batu leteng akan pendae.

⁶Kaabas Aim paham, mampahengan o TUHAN, Ikau mawi musoh lepah lingis.

⁷Hapan kuasan Aim je hai Ikau mambinasa kakare je malawan Ikau. Kasangit Aim hagandang sama kilau apui tuntang mangehu ewen sama kilau tampilai.

⁸Tasik ihimon Awim, danum hagalombang gantong, mendeng tagap kilau dinding, sampai penda tasik tau ihoroi.

⁹Koan musoh, ‘Ewen kareh inggoangku tuntang inyingkapku, injawutku padangku, tuntang impalomosku ewen. Palus kakare ramon ewen irampasku, imbagi-bagiku tuntang aku mangkeme kamangate sampai peda.’

¹⁰Tapi TUHAN baya hapan sinde nahaseng bewei ie mampadumah andau je basial akan Misir. Ewen leteng kilau timah je babehat huang danum hai je hamok hagalombang.

¹¹Hatalla je kueh je tau mananding Ikau, o TUHAN je pangkahai tuntang barasih? Eweh tau mawi taloh heran tuntang gawi hai kilau TUHAN?

¹²Ikau mantajok lengen Aim gantau, palus lilap musoh inelen petak.

¹³Ikau mimbit bangsa je jari inyalamat Awim toh, awi Ikau baketep dengan janjin Awim. Hapan kaabas hai ewen ingalindong Awim tuntang ingagalan Aim akan tanah Ayum je barasih.

¹⁴Kare bangsa mahining tuntang hagenjeh; oloh Pilistin tuntang kare kapal Edom tarewen.

¹⁵Oloh Moab je gagah harujut, oloh Kanaan mikeh.

¹⁶Ewen paham mikeh mite kaabas TUHAN. Metoh ungkup Ayum mahalau, musoh dia olih manahan; palus liwus bangsa je jari imbebas Awim.

¹⁷Palus Israel iagah Awim akan eka je iintih Awim akan eka Ikau melai. Ewen manetep intu bukit Ayum je barasih, intu huma je imangun Awim kabuat.

¹⁸Ikau je TUHAN, Raja, je marentah palus katatahie.”

¹⁹Katika oloh Israel dimpah tasik, ewen mananjong intu petak je teah. Tapi metoh kare kareta Misir dengan kuda tuntang oloh je manongkange tame akan huang tasik, TUHAN mawi danum mahasor haluli sampai ewen leteng.

²⁰Palus Miryam, ije biti nabi bawi, kaka Aron manduan tarabange, tuntang uras oloh bawi omba mamanto tarabang sambil manari.

²¹Miryam manyanyi akan ewen, “Nyanyi akan TUHAN, tagal Ie manang hai. Uras kuda tuntang oloh je manongkange injakahe akan huang tasik.”

²²Limbah te Moses mimbit bangsa Israel bara Tasik Raruju manintu padang pasir Sur. Katahin telo andau ewen mananjong mahoroi padang pasir, jaton sondau danum.

²³Palus ewen sampai ije eka arae Mara. [14] Tapi danum intu hete bapait toto, sampai dia olih iihop. Tagal te eka te inampa arae Mara, rimae bapait.

²⁴Palus kare oloh te bakotok dengan Moses tuntang misek, “Narai je kareh ihop itah?”

²⁵Moses balakudoa toto-toto intu TUHAN, palus TUHAN mamparahan akae ije katetek kayu. Kayu te injakah Moses akan danum, balalu danum te jadi batawah, sampai olih iihop. Intu eka te TUHAN manenga kare atoran akan ewen, tuntang intu hete kea Ie maningkes ewen.

²⁶Koan TUHAN, “Tumon auh-Ku toto-toto, tuntang lalus taloh je tumon tirok-Ku bahalap; tumon uras kare parentah-Ku. Amon keton mawie tumon te, keton dia ihukum-Ku hapan kare penyakit je iawi-Ku dengan oloh Misir. Aku toh TUHAN je mampakeleh ikau.”

²⁷Limbah te ewen sampai intu ije eka je arae Elim. Intu hete aton due walas tahasak danum tuntang uju puluh batang kayu korma. Ewen mampendeng kemahe tokep danum te.