Read Ngaju EKSODUS 16 Bible Online

EKSODUS 16 - Ngaju bible

EKSODUS 16

¹Hapus oloh Israel haguet bara Elim, tuntang hong tanggal lime walas, bulan due limbah ewen malihi Misir, ewen palus sampai intu padang pasir Sin, helang Elim dengan bukit Sinai.

²Intu padang pasir te uras ewen bakotok dengan Moses tuntang Aron.

³Koan ewen, “Labih bahalap jaka ikei jari impatei TUHAN intu Misir. Intu hete paling dia ikei tau mondok kuman isin meto tuntang rote sampai besoh. Tapi keton mimbit ikei akan hetoh mangat ikei uras matei balau.”

⁴ Koan TUHAN dengan Moses, “Toh Aku handak mampamohon panginan je malabien karee kilau ujan akan keton samandiai. Sining andau keton patut manampunan panginan te sukup akan ije andau. Hapan cara te Aku handak mariksa ungkup-Ku mangat Aku tau katawan en ewen manumon kare parentah-Ku atawa dia.

⁵Hong andau je kajahawen ewen musti manampunan panginan te due lipet karee.”

⁶Palus Moses tuntang Aron hamauh dengan hapus oloh Israel, “Halemei kareh keton katawan je TUHAN mimbit keton balua bara Misir.

⁷Hanjewu jewu keton mite kalawan panumah TUHAN. TUHAN mahining auh keton balait intu Ie; yoh, intu TUHAN, karana ikei toh baya malalus taloh je irentah Awie.

⁸TUHAN kareh manenga akan keton isin meto hong halemei, tuntang rote hong hanjewu sampai keton besoh. Karana TUHAN jari mahining auh keton jari balait intu Ie. Toto, amon keton balait dengan ikei, keton balait dengan TUHAN.”

⁹Limbah te Moses hamauh dengan Aron, “Soho uras ewen manaharep TUHAN, awi TUHAN jari mahining kakotok ewen.”

¹⁰Metoh Aron hamauh dengan ewen samandiai, ewen mananture akan padang pasir, palus salenga kalawan TUHAN gitan huang baunandau.

¹¹Koan TUHAN dengan Moses,

¹²“Aku jari mahining kakotok oloh Israel. Sanan akan ewen je hong halemei ewen mandino panginan isin meto, tuntang hong hanjewu ewen mandino panginan rote sampai besoh. Te ewen te katawan aku toh TUHAN, Hatallan ewen.”

¹³Hong halemei, te dumah burong puyuh sampai are toto. Ewen mangontep hapus eka mampendeng kemah; tuntang hong hanjewu ambon balalu mohon intu kaliling kemah ewen.

¹⁴Metoh ambon te lilap, palus gitan intu hunjun padang pasir taloh je banipis kilau tisik tuntang lamos kilau ambon je baku.

¹⁵ Sana oloh Israel mitee, ewen dia katawan en jete. Ewen habambaleh misek, “Narai te?” Palus Moses hamauh dengan ewen, “Jete panginan je inenga TUHAN akan keton.

¹⁶TUHAN marentah mangat genep biti manampunan tumon kasukape, iete due liter akan genep biti.”

¹⁷Oloh Israel malalus te; tapi aton je manampunan labih bara due liter akan ije biti tuntang aton je kurang.

¹⁸ Metoh ewen manakare, maka oloh je manampunan are dia malabien, tuntang je manampunan isut, dia tapas. Genep biti manampunan manumon kasukope.

¹⁹Moses hamauh dengan ewen, “Eweh bewei dia tau mingkes panginan aloh isut akan andau jewue.”

²⁰Tapi pire-pire biti marak ewen dia paduli auh Moses balalu andau jewue panginan te horet tuntang ewau maram; palus Moses balait dengan ewen.

²¹Sining hanjewu ewen manampunan panginan te manumon kasukope; tuntang amon andau nampara balasot, panginan je tapalihi intu petak te lenyoh.

²²Hong andau je kajahawee ewen manampunan panginan te due lipet karee, iete epat liter akan ije biti. Uras pamimpin ewen dumah tuntang mansanan taloh te akan Moses.

²³ Koan Moses dengan ewen, “Toh parentah TUHAN. Jewu iete andau je inukas uka malayan, andau Sabat, andau je iluput akan TUHAN. Narai je handak inyehei keton andau toh, keleh keton manyeheie. Narai je handak iluntoh keton, keleh keton malontohe. Je labih bara kasukope andau toh, misah tuntang ingkes akan andau jewue.”

²⁴Palus panginan je malabien te iingkes ewen akan andau jewue, kilau je irentah Moses; panginan te dia babasi tuntang dia horet.

²⁵Moses hamauh, “Jetoh panginan keton akan andau toh, awi andau toh andau sabat, andau malayan hapa mahormat TUHAN. Keton dia baka sondau panginan te aloh isut intu luar kare kemah.

²⁶Jahawen andau katahie keton jari manampunan panginan, tapi andau je kaujue andau malayan, jaton panginan je mohon hong andau te.”

²⁷Hong andau je kauju pire-pire oloh Israel handak manampunan panginan. Tapi ewen dia sondau taloh en-en.

²⁸Palus TUHAN hamauh dengan Moses, “Sampai hamparea keton dia maku manumon kare parentah-Ku?

²⁹Ingat, Aku manenga akan keton andau toh uka malayan bara kare gawi. Tagal te hong andau je kajahawen Aku manenga panginan je sukop akan due andau. Hong andau je kauju genep biti patut melai intu kemahe, dia tau balua.”

³⁰Tagal te hong andau je kauju ewen dia bagawi.

³¹ Panginan te inampae arae manhu[15] awi oloh Israel. Ampie kilau bawak taloh je kori-korik baputi tuntang angate kilau wadai je inampa hapan mado.

³²Moses hamauh, “TUHAN manyoho itah manduan kurang labih due liter manhu uka ingkes akan turonan itah, mangat ewen tau mite panginan je inenga TUHAN akan itah intu padang pasir, metoh itah impalua bara Misir.”

³³ Moses hamauh dengan Aron, “Duan ije balanga, nyuang kurang labih due liter manhu, palus iandak intu taharep TUHAN indu ingkes akan turonan itah.”

³⁴Balalu Aron mingkes balanga te intu baun Patin Janji mangat iingkes manumon parentah TUHAN dengan Moses.

³⁵ Manhu te akan panginan oloh Israel katahin epat puluh nyelo limbah te, sampai ewen sampai intu Kanaan, eka ewen manetep. (

³⁶Takar akan taloh keang je ihapan oloh jaman jete, basuang due puluh liter.)