Read Ngaju EKSODUS 17 Bible Online

EKSODUS 17 - Ngaju bible

EKSODUS 17

¹ Palus salepah ungkup Israel malihi padang pasir Sin tuntang bindah bara ije eka akan eka beken tumon je irentah awi TUHAN. Hong sinde katika ewen mampendeng kemahe intu Rapidim, tapi intu hete jaton danum,

²palus ewen bakotok dengan Moses hayak hamauh, “Tenga akan ikei danum ihop.” Moses tombah, “Mbuhen keton bakotok tuntang maningkes TUHAN?”

³Tapi kare oloh te paham teah belaie toto tuntang ewen te magon bakotok dengan Moses. Koan ewen, “Mbuhen ikau mimbit ikei balua bara Misir? Mangat ikei, kare anak ikei tuntang meto ain ikei matei awi teah belaie?”

⁴Te Moses balakudoa intu TUHAN koae, “Narai je patut iawiku akan kare oloh toh? Item, ewen handak mamanting aku hapan batu.”

⁵Koan TUHAN dengan Moses, “Tehau pire-pire pamimpin, tanjong haya-hayak dengan ewen helo bara bangsa toh. Imbit kea sukah je ihapam mamukul Nil.

⁶Aku kareh mendeng intu hila baum hong hunjun batu hai intu Bukit Sinai. Hewes batu te, palus danume kareh balua sampai kare oloh te tau mihop.” Moses malaluse tumon auhe taharep matan kare pamimpin oloh Israel.

⁷Eka te inampa arae Masa[16] awi intu hete oloh Israel jari maningkes TUHAN metoh ewen misek, “En TUHAN aton mampahayak itah atawa dia?” Eka te inampa arae kea Meriba[17] awi intu hete oloh Israel bakotok.

⁸Oloh Amalek dumah tuntang mawi oloh Israel intu Rapidim.

⁹Koan Moses dengan Yosua, “Intih pire-pire oloh mangat malawan oloh Amalek. Jewu aku mendeng intu hunjun bukit, mimbing sukah je nyoho TUHAN aku mimbite.”

¹⁰Yosua malalus taloh je irentah akae. Ie haguet malawan oloh Amalek. Hemben te kea Moses, Aron tuntang Hur mandai akan hunjun tantan bukit.

¹¹Katahin Moses manggatang lengee, oloh Israel manang. Tapi amon Moses mampamohon lengee, oloh Amalek je manang.

¹²Metoh Moses heka, Aron tuntang Hur manduan ije batu mangat Moses tau mondok; Aron tuntang Hur mendeng intu hila sambil tuntang gantaun Moses hapan manyangga lengee mangat tetep hagatang sampai matanandau belep.

¹³Kajariae oloh Amalek impakalah awi Yosua.

¹⁴ Koan TUHAN dengan Moses, “Surat tahiu kamanang toh mangat tetep ingenang. Sanan akan Yosua, je aku kareh mampalomos oloh Amalek.”

¹⁵Palus Moses mampendeng ije mesbeh tuntang manampa arae “TUHAN te Banderangku.”

¹⁶Koan Moses, “Imbing ganto-gantong banderan TUHAN![18] TUHAN hakalahi malawan oloh Amalek sampai katatahie!”