Read Ngaju EKSODUS 19 Bible Online

EKSODUS 19 - Ngaju bible

EKSODUS 19

¹Limbah te bangsa Israel malihi Rapidim, palus hong tanggal ije bulan kateloe limbah ewen haguet bara Misir, ewen sampai intu padang pasir Sinai. Ewen mampendeng kemah intu pain Bukit Sinai.

³Moses balalu mandai bukit te mangat hasondau dengan Hatalla. TUHAN hakotak dengan Moses bara bukit te tuntang manyoho ie mansanan akan oloh Israel, turonan Yakob,

⁴“Keton jari mite en je iawi-Ku dengan oloh Misir; tuntang kilen ampie Aku mimbit keton talih Aku intu hetoh hapan kuasa je hai; iete kilau burong nasar mimbit anake hong hunjun palapase.

⁵ Toh amon keton manumon auh-Ku tuntang baketep dengan janjing-Ku, keton kareh iawi-Ku jadi ungkup-Ku kabuat. Hapus kalunen puna ayung-Ku, tapi keton kareh jadi bangsa ayung-Ku je eka kasayang-Ku,

⁶ tantai akang-Ku kabuat. Keton kareh bagawi akangku kilau kare imam.”

⁷Palus Moses mohon tuntang mantehau kare pamimpin uka hapumpong. Ie manyarita akan ewen taloh samandiai je irentah TUHAN akae.

⁸Uras ewen tombah haya-hayak, “Ikei handak malalus taloh handiai je insanan TUHAN.” Panombah te inyampai Moses akan TUHAN. Palus koan TUHAN dengan Moses, “Aku kareh dumah manalih ikau hasangkowong baunandau je bakapal; kare oloh kareh mahining Aku hakotak dengam, balalu nampara metoh te ewen harajur percaya dengam.

¹⁰Talih kare oloh te, soho ewen andau toh atawa jewu manatap arepe akan sombayang. Ewen patut mampukan pakaian ewen.

¹¹Limbah jewu ewen jari manyadia arepe. Hong andau te Aku handak mohon akan hunjun Bukit Sinai, eka kare oloh tau mite Aku.

¹² Nampa tanda hakaliling bukit toh indu helat je dia tau ihalau bangsa te. Ngahana bangsa te mandai bukit, manokepe mahin ela. Ewe-eweh je mahalau helat te, kareh ihukum matei.

¹³Oloh te musti imanting hapan batu atawa imanah, ie dia tau iimbing. Taloh toh iawi aloh dengan oloh atawa meto. Uras je mahalau helat te musti ihukum matei. Metoh auh tarompet je panjang tarahining, kare oloh te balalu mandai bukit.”

¹⁴Limbah te Moses mohon bara bukit tuntang manyoho kare oloh te manatap arepe uka sombayang. Koae, “Limbah jewu keton jari uras tatap, tuntang helo bara te keton dia tau hinje sawan keton.” Palus bangsa te nampara batatap hayak mampukan pakaian ewen.

¹⁶ Hong andau je kateloe, hanjewu, aton nyaho tuntang kilat. Baunandau je bakapal lembut intu hunjun bukit tuntang tarahining auh tarompet je hai toto. Uras oloh intu kare kemah hagenjeh mikeh.

¹⁷Moses mimbit ewen balua mangat hasondau dengan Hatalla. Ewen palus mendeng intu pain bukit te.

¹⁸Hapus Bukit Sinai inyangkulep asep, awi TUHAN mohon akan hunjue huang apui. Asep te mangambuar kilau asep bara tungku hai. Hapus bukit hongge paham.

¹⁹Auh tarompet sasar hai. Moses hakotak, Hatalla manombahe hapan auh nyahu.

²⁰TUHAN mohon akan tantan Bukit Sinai, tuntang mantehau Moses uka mandai akan bukit te,

²¹tuntang TUHAN hamauh dengae “Mohon tuntang pingat kare oloh te uka ewen ela manangkalau helat palus dumah mite Aku. Amon ewen mahin malanggare, are bara marak ewen kareh matei.

²²Kare imam je handak manokep Aku mahin patut marasih arep. Amon dia, ewen kareh ihukum awi-Ku.”

²³Koan Moses dengan TUHAN, “Kare oloh te dia tau mandai, awi ikau marentah ikei mangat mitong bukit toh kilau eka barasih hayak manantuani helat kalilinge.”

²⁴Tombah TUHAN, “Lius mohon palus haluli akan hetoh dengan Aron. Tapi kare imam tuntang rayat dia tau mahalau helat mangat dumah talih Aku. Amon ewen mahalaue ewen kareh ihukum-Ku.”

²⁵Palus Moses mohon manyondau bangsa te tuntang manampa peteh TUHAN akan ewen.