Read Ngaju EKSODUS 2 Bible Online

EKSODUS 2 - Ngaju bible

EKSODUS 2

¹Intu wayah te aton ije biti oloh hatue bara suku Lewi; ie kawin dengan bawin oloh suku te kea.

² Palus oloh bawi te manak ije biti anak hatue. Ie nampayah je awau te paham bahalap, ie manyahokae katahin telo bulan.

³Tapi awau te dia tau inyahokan tahi-tahi. Maka indu awau te manampa ije karanjang purun, hayak mandampule hapan gita mangat dia iname danum. Awau te iingkese intu huang karanjang te, palus iimbite akan Sungei Nil tuntang iingkese intu bentok karanjang purun hong saran sungei te.

⁴Kaka je bawi ain awau te mendeng bara kejau mangat mite en taloh je kareh manjadi dengan andie.

⁵Putri raja Misir balalu kea dumah, ie mohon mandoi akan batang; metoh te kare ayange tanjo-tanjong intu saran sungei. Salenga putri raja mite karanjang te intu bentok kare purun. Palus ie manyoho ije jipee je bawi manduae.

⁶Metoh putri raja mukei karanjang te, gitae aton awau intu huange, tuntang awau te metohe manangis. Putri raja masi dengae tuntang hamauh, “Jetoh anak oloh Ibrani.”

⁷Palus kaka awau te misek putri raja, “En maku tuan putri amon aku manggau ije biti bawin oloh Ibrani je tau patuso awau te?”

⁸“Tau ih,” tombah putri raja. Palus anak bawi te haguet mantehau indue kabuat.

⁹Koan putri raja dengan indu anak te, “Imbit awau toh, patuso ie akangku; kareh ikau inengaku upah.” Balalu imbite awau te tuntang impatusoe.

¹⁰ Katika awau te jari hai isut, indue manjuloke akan putri raja. Palus putri raja mawi awau te anak angkate. “Aku manampa arae Moses, [2] awi induangku ie bara danum,” koan putri raja.

¹¹ Katika Moses jari hai, ie haguet manyondau kare oloh bangsa ayue. Ie mite kilen ampie ewen imaksa malalus gawi je babeha-behat. Gitae kea ije biti oloh Misir mampatei ije biti oloh Ibrani.

¹²Moses manampayah hakaliling, awi gitae jaton oloh je manantuani ie, impateie oloh Misir te palus hantue inyahokae intu huang pasir.

¹³Andau jewue Moses mananjong tinai, palus gitae due biti oloh Ibrani hakalahi, “Mbuhen ikau mamukul jalaham?” Moses misek dengan oloh je sala te.

¹⁴Tombah oloh te, “Eweh je mangkat ikau jadi pamimpin tuntang hakim ikei? En ikau handak mampatei aku kea, kilau oloh Misir je impateim te?” Palus Moses mikeh tuntang manirok “Calaka, gawingku te jari ingatawan oloh.”

¹⁵ Metoh raja mahining tahiu kajadian te, ie manggau akal uka mampatei Moses. Tapi Moses hadari palus melai intu tanah Midian. Imam bara Midian je arae Yetro, aton uju anake bawi. Sinde andau metoh Moses mondok tokep ije kalin danum, te dumah uju anak bawi ain Yetro handak masip danum tuntang manyuang sarangan danum ihop kawan kambing tuntang tabirin bapa ewen.

¹⁷Tapi pire-pire sakatik maharak kare anak bawi te. Palus Moses dumah mandohop ewen tuntang mampihop meto ain ewen.

¹⁸Metoh buli, bapa ewen misek, “Mbuhen keton capat toto buli andau toh?”

¹⁹Tombah ewen, “Aton ije biti oloh Misir je mandohop ikei bara kapapan kare sakatik beken. Ie mahin masip danum akan ikei, tuntang mampihop meto ain ikei.”

²⁰“Intu kueh ie metoh toh?” Yetro misek dengan kare anake. “Mbuhen keton malihi oloh te? Keleh haguet mimbit ie kuman dengan itah.”

²¹Moses maku melai intu hete. Limbah te Yetro mangawin anake je arae Sipora dengan Moses.

²²Sipora manak ije biti anak hatue. Inampae aran anake te Gersom,[3] awi tirok Moses, “Aku oloh tamuei hetoh.”

²³Banyelo-nyelo limbah te raja Misir matei. Tapi bangsa Israel magon mungoh awi ewen ingapehe, sampai ewen mangkariak balaku awat. Kariak ewen sampai Hatalla.

²⁴ Hatalla mahining auh ewen, tuntang Ie mingat janjin Aie dengan Abraham, Isaak tuntang Yakob.

²⁵Ie mite kare oloh Israel ingapehe, palus Ie manukas mandohop ewen. [4]