Read Ngaju EKSODUS 20 Bible Online

EKSODUS 20 - Ngaju bible

EKSODUS 20

¹Balalu Hatalla hakotak, jetoh kare auh Ayue,

²“Aku toh TUHAN, Hatallam je mimbit ikau balua bara Misir ekam ihajipen.

³Ela manyembah kare Hatalla beken. Sembah Aku bewei.

⁴ Ela manampa akam kabuat hampatong je manumon taloh en bewei je aton intu langit, intu petak atawa intu huang danum penda petak.

⁵ Ela manyembah hampatong tumon te, awi Aku toh TUHAN, Hatallam. Aku dia handak inyama dengan en bewei. Kare oloh je manyingi Aku ihukum-Ku sampai turonan je katelo tuntang kaepat.

⁶Tapi Aku mamparahan sintang-Ku akan bakoya-koyan turonan bara kare oloh je sinta Aku tuntang manumon parentah-Ku.

⁷ Ela manyewut arang-Ku bararangai, awi aku TUHAN, Hatallam, mahukum eweh bewei je mahapan arang-Ku sala.

⁸ Haga andau Sabat tuntang hormat andau te kilau andau je barasih.

⁹ Aku manenga akam jahawen andau uaka bagawi,

¹⁰tapi andau je kauju te andau malayan je baya tantai akang-Ku. Hong andau te ela aton je bagawi, aloh ikau, aloh kare anakm, kare jipem, meto ayum atawa oloh bangsa beken je melai intu lewum.

¹¹ Katahin jahawen andau, Aku, TUHAN, manampa petak, langit, tasik, tuntang uras je aton intu huange. Tapi intu andau je kauju aku malayan. Jete bukue Aku, TUHAN, mamberkat andau Sabat tuntang mawie baya tantai akang-Ku.

¹² Hormat bapam tuntang indum, mangat ikau belom sanang tuntang panjang umur intu lewu je handak inengaku akam.

¹³ Ela mampatei.

¹⁴ Ela habandong.

¹⁵ Ela manakau.

¹⁶ Ela mansanan taloh je dia toto tahiu oloh beken.

¹⁷ Ela mipen taloh je ayun oloh beken: huma, sawae, kare jipee, metoe, kalidaie, atawa taloh en bewei je ayue.”

¹⁸ Metoh kare oloh mahining nyaho tuntang auh tarompet, hayak mite kilat tuntang bukit je hasep, ewen hagenjeh mikeh tuntang mendeng bara kejau.

¹⁹Koan ewen dengan Moses, “Ikau ih je hakotak dengan ikei, ikei handak mahininge; tapi ela je Hatalla je hakotak dengan ikei, kareh ikei matei.”

²⁰Tombah Moses, “Ela mikeh. Hatalla dumah baya handak mancoba keton mangat keton tetep manumon auh Ayue, tuntang dia badosa.”

²¹Tapi kare oloh te tetep mendeng bara kejau; baya Moses je manokep baunandau je kaput intu eka Hatalla aton.

²²TUHAN marentah Moses mansanan akan bangsa Israel, “Keton jari mite kilen ampie Aku, TUHAN, hakotak dengan keton bara langit.

²³Ela manampa akan keton kare hampatong perak atawa amas akan inyembah taloh je beken bara Aku.

²⁴Tampa akang-Ku ije mesbeh bara petak. Balalu luput intu hete tabirim tuntang sapim akan parapah je ingehu tuntang parapah hapa badamai dengang-Ku. Intu genep eka je inukas-Ku akam kilau eka sombayang akang-Ku, Aku handak dumah tuntang mamberkat ikau.

²⁵ Amon ikau manampa akang-Ku ije mesbeh bara batu, ela manampa bara batu je imahat. Awi amon ikau mahapan pahat manyila batu, mesbeh te dia tau tinai ihapan akang-Ku.

²⁶Ela mamangun mesbeh je gantong sampai musti indai mahapan tangga, mangat ela gitan kahawem.”