Read Ngaju EKSODUS 24 Bible Online

EKSODUS 24 - Ngaju bible

EKSODUS 24

¹Limbah te TUHAN hamauh dengan Moses, “Keleh mandai mangat manaharep Aku, ikau dengan Aron, Nadab tuntang Abihu, tuntang uju puluh pamimpin bangsa, palus sontop manyembah Aku bara kejau.

²Baya ikau kabuat tau dumah manokep Aku. Je beken dia usah toke-tokep. Labih tinai rayat dia tau mandai bukit toh.”

³Moses balaku haguet mansanan akan bangsa te kakare parentah tuntang atoran TUHAN. Ewen uras tombah haya-hayak, “Ikei handak malalus kakare taloh je insanan TUHAN.”

⁴Limbah te Moses manyurat uras parentah TUHAN. Hanjewu jewue ie mampendeng ije mesbeh dengan due walas tugu batu intu pain bukit te; genep tugu mawakil ije bara suku Israel.

⁵Palus Moses manyoho pire-pire oloh tabela; Ewen maluput parapah je ingehu akan TUHAN tuntang manyambalih pire-pire kongan sapi indu parapah akan kadamai.

⁶Belahe dahan sapi te induan Moses tuntang inusohe akan huang kare sangko. Belahe tinai inosohe akan hunjun mesbeh.

⁷Limbah te induae buku janji eka parentah TUHAN inyurat, palus imbasae hapan auh je hai akan bangsa te. Koan ewen, “Ikei handak manumon auh TUHAN tuntang malalus kare parentah Ayue.”

⁸ Palus Moses manduan daha je aton huang kare seng danum te tuntang mambirike akan hunjun rayat. Koae, “Daha toh mandehen janji je imeteng TUHAN dengan keton hagalang kare parentah Ayue.”

⁹Limbah te Moses, Aron, Nadab, Abihu tuntang uju puluh pamimpin te mandai bukit.

¹⁰Ewen mite Hatallan Israel mendeng intu hunjun taloh je kilau laseh bara batu nilam je biru kilau langit je barasih.

¹¹Kare pamimpin oloh Israel te jari mite Hatalla. Aloh kalote ewen dia impatei Awie. Limbah te ewen kuman mihop.

¹²Limbah te TUHAN hamauh dengan Moses, “Talih Aku intu hunjun bukit. Hete kareh inenga-Ku akam due batu je inyurat-Ku dengan kakare parentah ayung-Ku. Kakare parentah te inenga-Ku indu ajar akan bangsa te.”

¹³Palus Moses tuntang Yosua pembantue manatap arepe tuntang Moses mandai [23] bukit eka TUHAN melai te.

¹⁴Moses jari mameteh kare pamimpin Israel, “Entai intu kare kemah toh sampai aku haluli. Aron tuntang Hur aton dengan keton intu hetoh. Eweh aton pakarae, tau manaharep ewen mangat tau imutus.”

¹⁵Moses mandai bukit Sinai balalu ie inutup awi baunandau.

¹⁶Kalawan panumah TUHAN mohon akan hunjun bukit, gitan oloh Israel kilau apui je hanyala hunjun bukit. Jahawen andau katahie baunandau te manutup bukit te, tuntang hong andau je kaujue Hatalla mantehau Moses bara baun andau te.

¹⁸ Balalu Moses mandai tuntang tame akan huang baunandau te. Epat puluh andau epat puluh alem Moses melai hete.