Read Ngaju EKSODUS 25 Bible Online

EKSODUS 25 - Ngaju bible

EKSODUS 25

¹TUHAN hamauh dengan Moses,

²“Soho oloh Israel mimbit parapah akang-Ku. Eweh je pahias, musti mimbit parapah

³bara: amas, perak tuntang tambaga;

⁴benang baputi halus, benang wol biru, ungu tuntang bahandang; benang bara bulun kambing;

⁵upak tabiri hatue je impahandang, upak lamos, kayu panaga;

⁶undus akan sumbo, rarampah akan undus upacara mandudus tuntang akan garo je mangat ewaue;

⁷macam-macam batu permata akan imasang intu epod[24] tuntang tusok usok Imam Hai.

⁸Soho bangsa te manampa ije kemah akang-Ku, mangat Aku tau melai bentok ewen.

⁹Kemah tuntang pakakase musti inampa ewen manumon taloh je kareh imparahang-Ku akam.”

¹⁰“Tampa ije pati bara kayu panaga je panjange 110 sentimeter, kalombahe sama dengan kagantonge iete 66 sentimeter.

¹¹Ngalukop hila huange tuntang hila luare mahapan amas tulen tuntang tampa bingkaie bara amas.

¹²Akan kayu hapa meton pati te, tampa epat galang amas tuntang ngawit intu kaepa-epat paie, due galang intu genep balikate.

¹³Tampa kea kayu pikule bara kayu panaga tuntang jete ingalukop dengan amas,

¹⁴palus namean kayu pikul te akan huang galange intu genep balikat pati te.

¹⁵Kayu pikul te musti tetep aton huang kare galang te, tuntang dia tau impalua.

¹⁶Palus huang pati te musti ingkes due kabindang batu dengan kare parentah je kareh inenga-Ku akam.

¹⁷ Tampa tutup pati te bara amas tulen, kapanjange 110 sentimeter tuntang kabukae 66 sentimeter.

¹⁸Tampa due kerub[25] bara amas tinih,

¹⁹ije intu genep tapakan tutup pati te. Kadadue kerub te musti impaleket jadi ije dengan tutupe,

²⁰tuntang awi hataharep dengan palapas je hambirang intu hunjun pati te.

²¹Ingkes kadadue batu te intu huang pati te tuntang masang tutupe intu hunjue.

²²Intu eka te Aku kareh hasondau dengam tuntang bara hunjun tutupe, helat due kerub te, ikau kareh inenga-Ku kare parentah-Ku akan bangsa Israel.”

²³“Tampa ije meja bara kayu panaga je kapanjange 88 sentimeter, kabukae 44 sentimeter, tuntang kagantonge 66 sentimeter.

²⁴Ingalukop hapan amas tulen tuntang masang ije bingkai amas hakalilinge.

²⁵Tampa les manyaroroi saran meja 7,5 sentimeter kalombahe; tuntang tenga batas amas hakaliling les saran meja te.

²⁶Tampa epat galang bara amas tuntang masang galang te intu epa-epat puting hong paie tokep sarae.

²⁷Galang te akan hapa manahan kayu pikule mangat meja te tau ieton.

²⁸Kayu pikul te musti inampa bara kayu panaga je ingalukop hapan amas.

²⁹Tampa kare piring, kare sangkir, kare kandi tuntang kare mangkok akan indu parapah danum anggor. Uras pakakas meja te musti inampa bara amas tulen.

³⁰ Meja te musti iandak intu baun Patin Janji; tuntang intu hujun meja te musti harajur aton rote parapah.”

³¹“Tampa tantahan sumbo bara amas tulen. Galange tuntang eka mimbinge inampa bara amas tinih; kare kambang hias, tamput kudope tuntang dawen kudope musti jadi ije dengan galange tuntang eka mimbinge.

³²Intu eka mimbinge te inampa jahawen cakang; telo cakang intu genep balikate.

³³Intu genep cakang inampa hiasan kilau epat kambang kanari dengan kudop tuntang dawen kudope.

³⁴Intu eka mimbinge inampa hiasan kambang kanari dengan kudope tuntang dawen kudope.

³⁵Intu penda genep pasangan cakang te inampa ije kudop.

³⁶Uras tantahan sumbo te dengan kare kudop tuntang kare cakange inampa bara ije katujur amas tinih tulen.

³⁷Tampa uju sumbo intu tantahan sumbo te tuntang masang bua-buah ampie sampai kalawae manaharep akan hila baun.

³⁸Tampa pakakas hapa marasih hampulor sumbo te tuntang talame uras bara amas tulen.

³⁹Keleh mahapan telo puluh lime kilo amas tulen akan hapa manampa tantahan sumbo te tuntang kakare macam pakakase.

⁴⁰ Ite titi-titip mangat tantahan sumbo te inampa manumon sonto je imparahang-Ku akam intu hunjun bukit toh.”