Read Ngaju EKSODUS 26 Bible Online

EKSODUS 26 - Ngaju bible

EKSODUS 26

¹“Tampa Kemah[26] akangku bara sapuluh katetek benang lenan baputi lamos, inyulam mahapan wol biru, ungu tuntang bahandang. Nyulam benang te tumon gambar kerub. [27]

²Genep katetek musti sama kahaie, kapanjange due walas meter tuntang kalombahe due meter.

³Lime katetek benang te inontong jadi ije kalambar benang; lime katetek je beken inampa kalote kea.

⁴Tampa eka sangkawite bara benang biru intu saran due lambar benang te;

⁵lime puluh eka mangkawite intu genep lambar benang.

⁶Tampa lime puluh kawit amas akan hapa manambing kadadue lambar benang te mangat tau impahinje.

⁷Akan sapau kemah te tampa sawalas katetek benang bara bulon kambing.

⁸Genep katetek sama ukurae, kapanjange telo walas meter, kalombahe due meter.

⁹Lime katetek inambing jadi ije kalambar. Jahawen katetek je beken inampa kalote kea. Tambing je kajahawen ilipet due mangat manutup hila baun kemah.

¹⁰Masang lime puluh galang eka manyangkawit sapau je intu saran lambar je solake tuntang limepuluh galang eka manyangkawit intu saran lambar je kaduee.

¹¹Tampa lime puluh kawit bara tambaga tuntang ngawit jete intu galang sangkawit te mangat due lambar sapau te tau inambing jadi sapau kemah.

¹²Satengah tetek benang je kalabie jete hapa manutup hila likut kemah.

¹³Kalabien benang je kalombahe limepuluh sentimeter hasansila je sama dengan kapanjang kemah inalua nantahulei hapa manutup balikat kemah te.

¹⁴Tampa due tutup akan hila luar kemah, ije bara upak tabiri hatue je impahandang tuntang ije tinai bara upak lamos.

¹⁵Tampa kare karangka kemah je mendeng hambujur bara kayu panaga.

¹⁶Genep rangka kagantonge epat meter, kalombahe 66 sentimeter.

¹⁷Intu genep rangka aton due pasak je ije kapasang, sampai kare rangka te tau inontong.

¹⁸Akan silae hila salatan kemah, tampa due puluh rangka,

¹⁹dengan epat puluh lapike bara perak; due intu penda genep rangka akan due pasake.

²⁰Akan silae hila utara kemah, tampa due puluh rangka

²¹dengan epat puluh lapike bara perak, due intu penda genep rangka.

²²Akan silae hila likut kemah iete hila barat, tampa jahawen rangka,

²³due rangka akan genep putinge.

²⁴Kare rangka putinge inontong intu hila paie, palus sampai hila hunjue. Due-due rangka je mawi putinge musti iawi kalote.

²⁵Balalu samadiai aton hanya rangka dengan jahawen walas lapik perak, due intu penda genep rangka.

²⁶Tampa lime walas kayu hamparang bara kayu panaga, lime akan rangka intu ije balikat kemah,

²⁷lime akan balikat je beken, tuntang lime tinai akan balikat kemah silan likut hila barat.

²⁸Kayu hamparang je bentok imasang setengah rangka kagantonge, bara tapakan akan tapakan kemah te.

²⁹Rangka kemah tuntang kare kayu hamparang te ingalukop dengan amas. Kare galang hapa manahan kayu te inampa bara amas.

³⁰Pendeng kemah te tumon taloh je imparahang-Ku akam intu hunjun bukit toh.

³¹Tampa dinding-benang bara benang baputi halus je inampa bara wol biru, ungu tuntang bahandang. Sulam benang te dengan gambar kerub. [28]

³²Koak dinding benang te intu epat tihang kayu panaga je ingalukop hapan amas, dengan kawit amas hayak imasang hunjun epat lapik perak.

³³ Andak dinding benang te intu penda baris kawit intu sapau Kemah. Hong likut dinding-benang te iandak Patin Janji je basuang due-due batu te. Dinding benang te mamisah Kamar Ije Barasih bara Kamar Ije Barasih Haliai.

³⁴Andak tutup Patin Janji te intu hunjun patie.

³⁵Meja parapah andak intu luar Kamar Ije Barasih Haliai intu hila utara; tantahan sumbo intu hila salatan huang kemah te.

³⁶Tampa dinding-benang akan bauntonggang kemah bara benang baputi halus je inampa bara wol biru, ungu tuntang bahandang, ihias dengan sulam.

³⁷Akan dinding-benang te inampa lime tihang bara kayu panaga je ingalukop dengan amas tuntang inontong hapan lime kawit amas. Tampa lime lapik bara tambaga akan kare tihang te.”