Read Ngaju EKSODUS 27 Bible Online

EKSODUS 27 - Ngaju bible

EKSODUS 27

¹“Tampa ije mesbeh bara kayu panaga. Lapak epat tampae kapanjange tuntang kalombahe uras 2,2 meter tuntang kagantonge 1,3 meter.

²Intu genep puting hunjue inampa kare tandok je leket intu mesbeh. Uras ingalukop hapan tambaga.

³Tampa kare ketel kawo, sendok kawo, kare mangkok, kare garpu tuntang eka apui. Uras pakakas te inampa bara tambaga.

⁴Tampa jawet kawat bara tambaga tuntang hapan epat galang eka kayu pikul intu epa-epat puting pendae.

⁵Kambo jawet kawat te satengah bara kambo mesbeh. Jawet kawat te intu mesbeh silan hila pendae.

⁶Tampa due kayu pikul bara kayu panaga ingalukop hapan tambaga;

⁷Namean akan huang kare galang intu due-due balikat mesbeh metoh meton mesbeh te.

⁸Tampa mesbeh te bara papan je buang silan huange, manumon atoh je imparahang-Ku akam intu hunjun bukit toh.”

⁹“Tampa sarambi kaliling kemah-Ku je ingarambang dinding-benang bara benang baputi halus. Intu hila salatan 44 meter kapanjange,

¹⁰inahan awi due puluh tihang tambaga, gagenep tihang ilapik tambaga, kawit tuntang eka mangkawite uras bara perak.

¹¹Tampa kalote kea intu hila utara.

¹²Intu hila barat, dinding-benang te 22 meter kapanjange, dengan sapuluh tihang tuntang sapuluh lapike.

¹³Intu hila timor te aton bauntonggange, panjang dinding-benang te 22 meter kea.

¹⁴Intu sambil gantau bauntonggang te imasang dinding-benang, je kapanjange uras 6,6 meter dengan telo tihang intu telo lapik.

¹⁶Akan bauntonggange imasang dinding-benang 9 meter kapanjange bara benang baputi halus je inampa bara wol biru, ungu tuntang bahandang, je inyulam. Hapa manahan dinding-benang bauntonggang te inampa epat tihang dengan epat lapik.

¹⁷Uras tihang kaliling sarambi te inontong hapan kawit perak; kawite bara perak tuntang lapike bara tambaga.

¹⁸Dinding-benang kaliling sarambi te kapanjange 44 meter, kalombahe 22 meter tuntang kagantonge 2,2 meter. Dinding-benang te inampa bara benang baputi halus tuntang lapike bara tambaga.

¹⁹Hapus pakakas je ihapan huang Kemah, tuntang kakare patok akan Kemah, tuntang je akan dinding benang inampa bara tambaga.”

²⁰“Soho oloh Israel mimbit undus saitun je pangkahalape akan sumbo intu huang Kemah-Ku mangat tau inotong tuntang hanyala harajur.

²¹Aron tuntang kare anake musti halaluan sumbo te bara halemei sampai hanjewu intu ekaku aton, intu luar dinding benang hong baun Patin Janji. Parentah te musti ilalus katatahie awi oloh Israel tuntang turonae.”