Read Ngaju EKSODUS 28 Bible Online

EKSODUS 28 - Ngaju bible

EKSODUS 28

¹“Tehau Aron kakam dengan kare anake Nadab, Abihu, Eleasar tuntang Itamar, ngabeken ewen mangat tau bagawi kilau imam akang-Ku.

²Tampa pakaian Imam akan Aron, mangat aton gitan hormat akae.

³Tehau hapus tukang jahit je jari inengaku kapintar mitor. Soho ewen mawi pakaian Aron mangat ie tau ingabeken mangat bagawi kilau imam akang-Ku.

⁴Soho ewen mawi tutup usok, epod, jubah, kameja basulam, saruban tuntang peteng-kahang. Pakaian Imam te patut ewen manampae akan Aron, kakam, tuntang kare anake mangat tau bagawi kilau imam akang-Ku.

⁵Pakaian te musti ewen manampae bara benang wol biru, ungu tuntang bahandang, lawai amas tuntang benang lena baputi halus. Tinai epod musti ihias hapan sulam.

⁷Due tali hunjun baha hapa mameteng epod iitor intu sarae.

⁸Ije peteng kahang benang halus bara benang je sama iitor intu epod te mangat jadi ije.

⁹Duan due batu dalima. Gau ije biti tukang amas je pintar maukir intu batu te due walas aran anak Yakob hagilir tumon umure, jahawen intu genep batu. Palus due-due batu permata te musti imasang huang bingkai amas tuntang iingkes intu talin hunjun baha epod kilau tanda pampingat akan due walas suku Israel. Tumon te Aron mimbit aran ewen intu hunjun bahae, sampai aku, TUHAN, harajur mingat ewen. Beken bara due-due bingkai amas te,

¹³inampa kea due rantai bara amas tulen je inali kilau tali, imasang intu bingkai amas te.”

¹⁵“Tampa akan Imam Hai ije tutup usok akan indu hapan metoh ie handak mangatawan kahandak Hatalla. Taloh je ihapan uka manampa tutup usok tuntang sulame sama dengan taloh je ihapan manampa epod tuntang sulame.

¹⁶Tampae lapak epat hayak ilipet due, panjang tuntang kalombahe 22 sentimeter.

¹⁷Masang epat kabaris batu permata intu tutup usok te. Intu baris batu je solake batu delima, tupas tuntang baiduri.

¹⁸Intu baris je kaduee, jamrud, nilam tuntang intan.

¹⁹Intu baris je kateloe, lasuardi, akik tuntang kacubung.

²⁰Intu baris kaepate, pirus, yakut tuntang ratna campaka. Due walas permata te imeteng hapan amas.

²¹Intu genep permata iukir ije bara aran due walas anak Yakob kilau tanda pampingat akan kare suku Israel.

²²Tampa akan tutup usok te due rantai bara amas tulen je injalin jadi tali.

²³Tampa kea due galang amas tuntang masang intu kadadue tapakan hila hunjun tutup usok te,

²⁴palus namean due rantai amas te akan huang kare galang nah.

²⁵Kadadue tapakan je beken bara rantai te imeteng intu kadadue bingkai, mangat tutup usok te tau inontong dengan je silae intu hila baun tali hunjun bahan epod.

²⁶Tampa due galang amas tinai, palus masang intu tutup usok te intu tapakan penda hila huange je buah epod.

²⁷Limbah te tampa due galang amas tinai tuntang masang intu hila baun kadadue tali hunjun baha epod tokep tontong itore hila pendae isut, intu hila hunjun peteng kahang bara benang halus.

²⁸Galang tutup usok inontong dengan tali biru intu galang epod mangat tutup usok te tetep aton intu hunjun peteng kahang tuntang dia tau balekak.

²⁹Metoh Aron tame akan eka barasih, ie patut mimbit kare aran suku Israel je iukir intu tutup usoke, mangat Aku, TUHAN, harajur mingat ungkup ayung-Ku.

³⁰ Ingkes Urim tuntang Tumim[29] intu huang tutup usok te indu ihapan Aron amon ie manaharep Aku. Intu katika kalote ie patut harajur mahapan tutup usok, mangat ie tau mangatawan kahandak-Ku akan ungkup Israel.”

³¹“Jubah je ihapan intu hunjun epod urase inampa bara wol biru.

³²Tatas uyate indehen hapan pita benang mangat dia murah barabit.

³³Hakaliling saran pendae musti inampa hiasan kilau bua delima bara wol biru, ungu tuntang bahandang, inyangkelang awi garanuhing amas.

³⁵Jubah te musti ihapan Aron amon ie bagawi kilau imam. Metoh ie manaharep aku intu Kamar Ije Barasih atawa malihi eka te, kareh tarahining auh garanuhing te, mangat ie ela matei.

³⁶Tampa ije hiasan amas tulen, ukir bawak kotak toh: ‘Ingabeken tantai akan TUHAN.’

³⁷Peteng jete intu saruban hapan tali biru.

³⁸Hiasan amas te imasang Aron intu lingkauae, mangat Aku, tau manarima hapus parapah je imbit oloh Israel akang-Ku; aloh metoh mimbit parapah te ewen jari mawi kasalan.

³⁹Kameja ain Aron musti inampa bara benang lena halus. Tampa kea ije saruban bara benang halus tuntang peteng kahang je inyulam.

⁴⁰Tampa kemeja, peteng kahang tuntang saruban akan kare anak Aron mangat ewen te gitan kilau oloh je patut ihormat.

⁴¹Masang pakaian te intu Aron, paharim, tuntang kare anake. Minyak ewen hapan minyak saitun; hapan te ewen intahbis jadi imam tuntang ingabeken uka bagawi akangku.

⁴²Tampa akan ewen salawar pandak bara benang lena halus, kapanjange bara kahang sampai sapak hapan manutup bagian biti je dia patut inampayah.

⁴³Salawar te patut harajur ihapan ewen metoh tame akan Kemah-Ku atawa manokep mesbeh uka mawi sombayang kilau imam intu Kamar Ije Barasih. Mangat ewen dia matei awi gitan hila bitie je dia pantas inampayah. Atoran toh tetep ilalus awi Aron tuntang turonae.”