Read Ngaju EKSODUS 30 Bible Online

EKSODUS 30 - Ngaju bible

EKSODUS 30

¹TUHAN hamauh tinai dengan Moses, “Tampa bara kayu ije mesbeh eka mamapui garo.

²Tampan mesbeh te lapak epat; kapanjange sama dengan kabukae iete 45 sentimeter, kagantonge 90 sentimeter. Intu epa-epat putinge tampa kare tandok je leket intu mesbeh te.

³Hila hunjue, tamput epa-epat dinding tuntang kare tandoke musti inantilap hapan amas tulen hayak inenga bingkai amas hakalilinge.

⁴Tampa due galang intu penda bingkai te hong due-due balikate hasansila hapa manahan kayu je hapa meton mesbeh te.

⁵Kayu je hapa meton te inampa bara kayu panaga hayak inantilap hapan amas.

⁶Andak mesbeh te intu hila luar benang je aton intu baun Patin Janji, intu eka Aku kareh hasondau dengam.

⁷Sining hanjewu, metoh Aron dumah manatap sumbo ie mamapui garo manyan intu hunjun mesbeh te.

⁸Taloh te ilaluse kea metoh ie manotong sumbo amon halemei. Parapah garo te ilalus harajur palus katatahie.

⁹Ela maluput intu hunjun mesbeh te garo je pali, parapah meto tuntang parapah taloh kinan; ela kea manusoh parapah danum anggor intu hunjue.

¹⁰Sinde ije nyelo Aron musti malalus upacara marasih mesbeh hapan cara mambirik epa-epat tandoke dengan dahan meto je iluput indu ampun dosa. Taloh te musti ilalus genep nyelo palus katatahie. Mesbeh te musti barasih urase tuntang ingabeken akang-Ku.”

¹¹TUHAN hamauh dengan Moses,

¹²“Metoh mawi sensus bangsa Israel, genep biti oloh bangsa Israel musti mambayar akang-Ku duit tewus bitie mangat ie dia buah calaka metoh sensus te ilalus.

¹³ Genep biti je tamput ireken intu sensus te musti mambayar duit je inukas karee tumon rega je inukas kemah-Ku kilau panenga je ngabeken akang-Ku.

¹⁴Genep biti je buah reken intu sensus te, iete genep biti oloh hatue je umure due puluh nyelo kahunjun, musti manenga panenga te.

¹⁵Oloh tatau dia tau mambayar labien tuntang oloh je belom susah dia tau mambayar kurang metoh ewen mambayar duit tewus te akan bitie.

¹⁶Duan duit te bara bangsa Israel, akan hapa sombayang intu kemah-Ku. Uras jete duit tewus akan bitin ewen; Aku harajur mingat jete hapa ngalindong ewen.”

¹⁷TUHAN hamauh dengan Moses,

¹⁸ “Tampa ije bak bara tambaga tuntang galang pendae tambaga kea. Andak bak te helat kemah dengan mesbeh, palus nyuang dengan danum.

¹⁹Danum te akan Aron tuntang kare anake mangat ewen tau menyau lengee tuntang paie,

²⁰helo bara ewen tame kemah atawa manokep mesbeh mangat mimbit parapah je ingehu. Ewen musti malalus jete mangat dia impatei. Atoran te musti inumon ewen tuntang turonan ewen palus katatahie.”

²² TUHAN hamauh dengan Moses,

²³“Duan rarampah je pangkahalape, jahawen kilo mur cair, telo kilo kayu manis, telo kilo tewu mangat ewaue, tuntang jahawen kilo jarangau.

²⁴Uras jete inimbang manumon timbangan je aton intu kemah-Ku. Dahang epat liter undus saitun,

²⁵tuntang tampa minyak upacara, je iewoi kilau minyak je mangat ewaue.

²⁶Hapan taloh ewoi te mangat maminyak Kemah-Ku, Patin Janji,

²⁷meja tuntang uras kare pakakase, mesbeh eka mampui garo,

²⁸mesbeh akan parapah je ingehu tuntang hapus pakakase, tuntang bak danum dengan lapik penda.

²⁹Hapan cara te ikau musti mangabeken kare ramo te akang-Ku, mangat kakare taloh te uras barasih. En bewei je buah mesbeh te inyarah akan TUHAN, tuntang eweh bewei je manigonge kareh mandino calaka tagal kaabas karasihe.[31]

³⁰Keleh maminyak kea Aron tuntang kare anake mangat ewen inahbis jadi imam indu mangat manguan gawi.

³¹Suman akan bangsa Israel je palus katatahie minyak upacara te ingabeken akang-Ku.

³²Minyak te dia tau inusoh akan hunjun oloh awam. Ela manampa minyak sama kilau jete mahapan campuran jete kea. Minyak te barasih tuntang musti itong kilau ramo barasih.

³³Oloh je manampa minyak kilau te, atawa mahapae akan oloh je dia imam, dia tinai itong kilau oloh ungkup-Ku.”

³⁴TUHAN hamauh dengan Moses, “Duan pire-pire rarampah je sama karee, iete gitan nyating, tutup kalisi, nyating baputi bahenda, tuntang garo tulen.

³⁵Hapan uras jete akam manampa garo iewoi je mangat ewaue. Dahang uyah mangat garo te tetep tulen tuntang tau ihapan akang-Ku.

³⁶Belah bara garo te inepe sampai halus. Imbit jete akan kemah-Ku tuntang buwor intu baun Patin Janji. Garo te itong kilau taloh barasih je tantai akang-Ku. Ela mawi garo iewoi dengan taloh je kilau te kea akam kabuat.

³⁸Eweh je mawi taloh mangat ewaue kilau te, dia tinai itong kilau oloh ungkup-Ku.”