Read Ngaju EKSODUS 31 Bible Online

EKSODUS 31 - Ngaju bible

EKSODUS 31

¹TUHAN hamuh dengan Moses,

²“Aku jari mintih Basaleel anak Uri, eson Hur bara suku Yuda,

³tuntang manenga akae kuasang-Ku.[32] Ie inengaku pangatawan, kataun tuntang kapintar hong kakare macam gawin seni:

⁴mangat mangarangka taloh je mamerlu kapintar hayak mawie bara amas, perak tuntang tambaga;

⁵masa batu permata je indu irasuk; mukir kayu tuntang kakare macam gawin seni je beken.

⁶Oholiab tuntang Ahisamakh bara suku Dan, jari intih-Ku kea mangat mandohop ie. Inenga-Ku kea kapintar je malabien akan kare tukang je pandai, mangat ewen olih mawi en bewei je irentah-Ku:

⁷kemah-Ku, Patin Janji, kakare pakakas kemah,

⁸iete meja tuntang pakakase, tantahan sumbo bara amas tulen tuntang pakakase, mesbeh eka mampui garo,

⁹mesbeh eka parapah je ingehu tuntang kare pakakase, bak danum dengan lapik pendae,

¹⁰pakaian sombayang akan Aron tuntang kare anake, je ihapan metoh ewen bagawi kilau imam,

¹¹minyak upacara, tuntang garo je mangat ewaue akan Kamar Ije Barasih. Kakare taloh te patut inampa ewen tumon atoh je inenga-Ku akam.”

¹²TUHAN marentah Moses mangat mansanan akan bangsa Israel, “Haga andau Sabat, andau je jari inukas-Ku kilau andau akan malayan. Palus katatahie andau te jadi pampingat akan keton dengang-Ku, mangat keton katawan je Aku toh TUHAN, tuntang je aku jari manampa keton bangsa ayung-Ku kabuat.

¹⁴ Andau malayan te musti ihormat kilau andau je Barasih. Keton inenga-Ku jahawen andau hapan bagawi, tapi andau je kauju jete andau hai je ingabeken akang-Ku. Eweh je dia mahormat jete, tapi bagawi hong andau te musti ihukum matei.

¹⁶Bangsa Israel musti mamesta andau te girir-manggirir kilau tanda andau janji.

¹⁷ Andau te iete andau pampingat je tetep ayun oloh Israel dengang-Ku. Awi Aku, TUHAN, jari manampa langit tuntang petak hong jahawen andau, tuntang hong andau je kauju Aku tende bagawi tuntang malayan.”

¹⁸Limbah jari hakotak dengan Moses intu hunjun Bukit Sinai, Hatalla manenga akae kadadue bindang batu je jari inyurat awi Hatalla dengan kare parentah Aie.