Read Ngaju EKSODUS 33 Bible Online

EKSODUS 33 - Ngaju bible

EKSODUS 33

¹ TUHAN hamauh dengan Moses, “Lihi eka toh tutang lius dengan bangsa je imbitm bara Misir te akan tanah je injanji-Ku dengan Abraham, Isaak tuntang Yakob tuntang dengan turonan ewen.

²Aku kareh manyoho ije biti malekat uka magah keton. Aku kareh maharak bangsa Kanaan, Amori, Het, Peris, Hewi tuntang Yebusi.

³Keton manintu tanah je tatau tuntang basiwoh. Tapi Aku kabuat dia omba dengam, mangat ikau dia impatei-Ku intu benteng jalan, awi keton bangsa je badungil.”

⁴Limbah te TUHAN manyoho Moses mansuman akan bangsa Israel, “Keton bangsa je badungil. Amon Aku omba keton aloh hanjulo ih, tantu keton impatei-Ku. Engkak kare hiasan keton, maka Aku kareh manukas en je handak ilalus-Ku dengan keton.” Limbah mahining tingak TUHAN te, ewen paham pehe atei kilau oloh je manatum. Palus ewen mengkak hiasan ewen. Maka limbah malihi Bukit Sinai, bangsa Israel dia tinai mahapan hiasan.

⁷Sining katika amon bangsa Israel mampendeng kemah, Moses manduan kemah tuntang mampendenge kejau isut bara kemah ewen. Kemah te inyewut Kemah TUHAN, tuntang ewen je handak balaku tirok bara TUHAN, haguet akan hete.

⁸Amon Moses haguet akan kemah te, kare oloh bangsa Israel mendeng intu baun bauntonggang lawang kemah ewen tuntang nampayah Moses sampai ie tame.

⁹Limbah Moses tame, palus tihang baunandau tende intu bauntonggang lawang kemah. Bara baunandau te TUHAN hamauh dengan Moses.

¹⁰Hong katika oloh Israel mite tihang baunandau aton intu bauntonggang Kemah TUHAN, ewen samandiai harikas tuntang sontop manyembah intu bauntonggang kemah ayu-ayue.

¹¹TUHAN hakotak dengan Moses hataharep bau, kilau oloh hakotak dengan sobate. Limbah te Moses haluli akan kare kemah. Tapi Yosua anak Nun, ije biti oloh tabela pandohop Moses, tetep melai intu kemah te.

¹²Sinde andau Moses hamuh dengan TUHAN, “TUHAN, ikau marentah aku mamimpin bangsa toh akan lewu je injanji Awim. Tapi Ikau dia mansuman eweh je handak inyoho Awim mandohop aku. TUHAN, ikau hamauh je ikau kasene aku tuntang mangilak aku.

¹³Tagal te, keleh mansanan en kahandak Aim, TUHAN, mangat aku tau bagawi Akam tuntang tetep manyanang atei Aim. Ingat kea je bangsa toh jari intih Awim manjadi Ayum.”

¹⁴Koan TUHAN, “Keton kareh ingalindong-Ku mangat tau manguasa tanah je injanji-Ku.”

¹⁵Tombah Moses, “Amon TUHAN dia omba dengan ikei, ela manyoho ikei malihi eka toh.

¹⁶Kilen oloh kareh katawan je Ikau mangilak aku tuntang bangsa toh amon Ikau dia mandohop ikei? Pandumah Aim intu bentok ikei kareh mangabeken ikei bara kare bangsa beken hong kalunen.”

¹⁷Koan TUHAN dengan Moses, “Palakum inarima-Ku, awi Aku kasene Ikau tuntang Aku mangilak Ikau.”

¹⁸Palus Moses balaku, “TUHAN, parahan akangku kalawan pandumah Aim.”

¹⁹ Tombah TUHAN, “Aku kareh mahalau dengan salepah kahaing-Ku intu taharepm, hayak manyewut arang-Ku je barasih. Aku toh TUHAN, tuntang Aku mamparahan kataung-Ku tuntang asing-Ku akan kare oloh je intih-Ku.

²⁰Baung-Ku kareh dia imparahang-Ku akam, awi dia tau oloh mite Aku tuntang tetep belom.

²¹Intu hila silang-Ku toh aton bukit batu; ikau tau mendeng intu hete.

²²Metoh kalawan pandumah-Ku te mahalau, ikau inameang-Ku akan ije lowang intu lengeng-Ku sampai Aku jari mahalau.

²³Palus Aku manjijit lengeng-Ku mangat ikau tau mite Aku bara likut, tapi baung-Ku dia ikau mitee.”