Read Ngaju EKSODUS 36 Bible Online

EKSODUS 36 - Ngaju bible

EKSODUS 36

¹Besaleel, Aholiab, tuntang uras tukang je mandino kaapik tuntang pangatawan bara TUHAN, katawan cara malalus uras taloh je ihapan akan mawi Kemah TUHAN. Ewen musti manampa kakare taloh kilau je jari irentah TUHAN.”

²Moses mantehau Besaleel, Aholiab tuntang kare oloh je mandino pangatawan bara TUHAN tuntang je pahias ateie mandohop, palus manyoho ewen manampara.

³Moses manenga akan ewen kakare taloh je inenga oloh Israel akan gawi mamangun Kemah TUHAN. Tapi bangsa Israel tetep manenga panenga akan Moses sining hanjewu.

⁴Palus kare tukang je kanjerae bagawi

⁵mansanan akan Moses, “Kare ramo je inenga awi kare oloh te jadi labih bara je ihapan akan gawi je inyoho awi TUHAN.”

⁶Moses mansanan akan kakare oloh intu hapus kemah tahiu kare panenga je hapa mamangun Kemah TUHAN jari sukop; awi te kakare oloh te dia usah mimbit taloh en-en tinai.

⁷Kare ramo je jari inenga ewen labih bara sukop hapa mampajadi uras kare gawi te.

⁸Limbah te je paling apik bara marak kare tukang te manampa Kemah TUHAN. Kemah te iawi ewen bara sapuluh katetek benang baputi je halus tuntang wol biru, ungu tuntang bahandang, palus inyulam gambar kerub.[38]

⁹Genep katetek sama ukurae; kapanjange due walas meter, tuntang kalombahe due meter.

¹⁰Lime katetek benang inontong jadi ije dinding, tuntang lime katetek je beken iawi kalote kea.

¹¹Intu saran due-due dinding te inampa hapa manyangkawite bara benang biru;

¹²lime puluh eka manyangkawit intu genep dinding, sampai jadi ije kapasang.

¹³Palus inampa lime puluh kawit amas akan mampahinje kadadue dinding te.

¹⁴Limbah ewen mawi sapau kemah te bara sawalas katetek benang bara bulun kambing.

¹⁵Genep katetek sama ukurae, kapanjange telo walas meter tuntang kalombahe due meter.

¹⁶Lime katetek inontong jadi ije dinding, tuntang jahawen katetek je beken inampa kalote kea.

¹⁷Lime puluh eka manyangkawite je imasang intu saran benang dinding je solake tuntang lime puluh eka manyangkawite intu saran dinding benang je kadue.

¹⁸Palus inampa lime puluh kawit bara tambaga je mampahinje due-due dinding te jadi sapau kemah.

¹⁹Limbah te inampa due tutup, ije bara bulun tabiri hatue je impahandang, tuntang je beken bara upak halus.

²⁰Limbah te ewen manampa kare karangka Kemah je mendeng bujur bara kayu akasia.

²¹Kagantong genep karangka te epat meter tuntang kalombahe jahawen puluh jahawen sentimeter.

²²Intu genep karangka te imasang due patok je ije kakambar sampai kakare karangka te tau hatontong sama arepe.

²³Akan Kemah je hila salatan, inampa due puluh karangka,

²⁴je inampa lapike epat puluh karee uras bara perak, jadi genep karangka aton due lapike akan kadadue patok te.

²⁵Akan Kemah je hila utara inampa due puluh karangka,

²⁶je inampa lapike epat puluh karee uras bara perak, jadi genep karangka aton due lapike.

²⁷Akan kemah je hila likut, iete kemah je hila barat, inampa jahawen karangka

²⁸tuntang due karangka akan putinge.

²⁹Kare karangka je manampa puting te palus ihubung dengan paie tarus nyaroroi akan bagian hunjun. Kadadue karangka je manampa puting te inampa hapan cara jete.

³⁰Jadi samandiaie aton hanya karangka tuntang jahawen walas lapik perak, due intu penda genep karangka.

³¹Palus ewen manampa lime walas kayu hamparang bara kayu panaga, lime akan kare rangka intu ije dinding kemah.

³²Lime akan dinding je beken tuntang lime tinai akan likut kemah hila barat.

³³Kayu hamparang je intu bentok, imasang kagantong satengah rangka, bara tapakan akan tapakan kemah te.

³⁴Rangka kemah tuntang kare kayu hamparang te ingalukop dengan amas, palus imasang kare galang amas hapa manahan kare kayu te.

³⁵Ewen kea manampa benang bauntonggang bara benang baputi halus je inantang hapan wol biru, ungu tuntang bahandang, palus inyulam dengan gambar kerub.[39]

³⁶Eka mangkoak benang te inampa epat tihang bara kayu panaga je ingalukop amas dengan kawit amas tuntang imasang intu hunjun epat lapik perak.

³⁷Palus inampa dinding benang akan bauntonggang kemah bara benang baputi halus je inampa mahapan wol biru, ungu tuntang bahandang tuntang imbungas hapan sulam.

³⁸Akan benang bauntonggang inampa lime tihang je inontong dengan kare kawit. Kare tapakan tuntang kare taloh je hapa manontong kalime-lime tihang te ingalukop hapan amas; lime lapike inampa bara tambaga.