Read Ngaju EKSODUS 37 Bible Online

EKSODUS 37 - Ngaju bible

EKSODUS 37

¹Basaleel manampa Patin Janji bara kayu panaga, kapanjange 110 sentimeter, kalombahe tuntang kagantonge 66 sentimeter.

²Hila huang ingalukop hapan amas tulen, palus inampa bingkai amas kalilinge.

³Limbah te inampa epat galang amas akan kayu pikule tuntang imasang intu kaepa-epat pain pati te, due galang intu genep dindinge.

⁴Inampae kea pikule bara kayu panaga, tuntang ngalukope hapan amas;

⁵palus kayu pikule inameae akan huang galang intu genep dinding pati te.

⁶Limbah te inampae ije tutup bara amas tulen, kapanjange 110 sentimter tuntang kalombahe 66 sentimeter.

⁷Inampa kea due kerub[40] bara amas masak,

⁸ije intu genep tapakan tutup te. Due-due kerub te leket intu tutupe

⁹tuntang inampa hataharep, dengan palapas je hambirang matep tutup pati te.

¹⁰Basaleel mawi meja bara kayu panaga, je kapanjange 88 sentimeter, kalombahe 44 sentimeter tuntang kagantonge 66 sentimeter.

¹¹Meja te ingalukop hapan amas tulen tuntang hakalilinge imasang bingkai amas.

¹²Palus ie manampa saran meja 7,5 sentimeter kalombahe, saran meja te inampae bingkai amas hakalilinge.

¹³Inampae epat galang akan kayu pikul, palus ingkepae intu kaepa-epat puting pain meja.

¹⁴Galang hapa manahan kayu pikule, imasang tokep saran meja.

¹⁵Kayu pikul te inampa bara kayu panaga je ingalukop hapan amas.

¹⁶Ie kea manampa kare piring, kare sangkir kare kandi tuntang kare mangkok akan parapah danum anggor. Uras pakakas meja te inampae bara amas tulen.

¹⁷Besaleel mawi tantahan sumbo bara amas tulen. Lapik tuntang tantahae inampa bara amas masak. Kambang hiasan, tamput kudop tuntang dawen kambange, impahinje dengan tantahae.

¹⁸Intu tantahan sumbo te inampae jahawen cakang, telo cakang hasansila.

¹⁹Intu genep cakange inampa hiasan kilau telo kambang kanari dengan kudop tuntang dawen kambange.

²⁰Intu tantahae inampa hiasan kilau epat kambang kanari dengan kudop tuntang dawen kambange.

²¹Intu penda genep kapasang cakang te inampa ije kudop.

²²Uras pain sumbo te dengan kare kudop tuntang kare cakange inampa bara ije kabutop amas masak tulen.

²³Intu pain sumbo te inampa uju sumbo dengan taloh hapa marasih hampulor sumbo tuntang sangkulepe bara amas tulen.

²⁴Akan manampa pain sumbo tuntang pakakase ihapan 35 kilogram amas tulen.

²⁵Besaleel manampa bara kayu panaga ije mesbeh akan eka mamapui garo. Mesbeh te lapak epat; panjang tuntang kalombahe sama iete 45 sentimter tuntang kamboe 90 sentimter. Intu kaepa-epat puting hunjue inampa tandok je leket dengan mesbeh te.

²⁶Hila hunjun, kaepa-epat dinding tuntang kare tandoke ingalukop hapan amas tulen tuntang hakalilinge inampa bingkai amas.

²⁷Inampae kea due galang intu penda bingkai amas hong due dindinge akan manahan kayu pikul mesbeh te.

²⁸Kayu pikul te inampa bara kayu panaga je ingalukop hapan amas.

²⁹ Besaleel kea manampa minyak upacara tuntang garo tulen je mangat ewaue, iewoi kilau minyak mangat ewaue.