Read Ngaju EKSODUS 38 Bible Online

EKSODUS 38 - Ngaju bible

EKSODUS 38

¹Besaleel manduan kayu panaga palus manampa mesbeh akan parapah je ingehu. Mesbeh te lapak epat, kapanjang tuntang kalombahe sama iete 2,2 meter, tuntang kagantonge 1,3 meter.

²Intu genep puting hunjue inampa tandok je leket dengan mesbeh te. Uras jete ingalukop hapan tambaga.

³Inampae kea kare ketel kawo, sendok kawo, kare sangko, garpu tuntang dadupa. Uras pakakas te inampa bara tambaga.

⁴Inampae jawet kawat bara tambaga je ililit intu mesbeh hila pendae, kamboe saparo bara kambun mesbeh.

⁵Palus inampae epat galang akan epat kayu pikul intu kaepa-epat puting pendae.

⁶Kayu pikul te inampae bara kayu panaga je ingalukop hapan tambaga.

⁷Palus kadue-due kayu pikul te inamean huang kare galang intu kadue-due dinding mesbeh te. Mesbeh te inampa bara papan je buang hila huange.

⁸ Besaleel manampa bak tambaga dengan lapik tambaga. Tambaga te bara kare saramin ayun kare oloh bawi je bagawi intu bauntonggang Kemah TUHAN.

⁹Besaleel mangarambang parantaran Kemah TUHAN hapan dinding bara benang baputi halus. Intu hila salatan, kapanjange 44 meter,

¹⁰inahan awi due puluh tihang tambaga, je uras ilapik hapan tambaga, dengan kawit tuntang ekae sangkawit uras bara perak.

¹¹Intu hila utara inampa kalote kea.

¹²Intu hila barat impendeng dinding 22 meter kapanjange, dengan sapuluh tihang dengan sapuluh lapik; kawit tuntang kawit hapa manontonge inampa bara perak.

¹³Intu hila timor je aton bauntonggange, kalombah dindinge 22 meter kea.

¹⁴Intu sambil gantau bauntonggang te imasang dinding je kapanjange uras 6,6 meter dengan telo tihang tuntang telo lapike.

¹⁶Uras dinding je hakaliling parantaran te inampa bara benang baputi halus.

¹⁷Lapik kare tihange inampa bara tambaga, kawit, tontonge tuntang lawin tihang te inampa bara perak. Uras tihang tokep parantaran te hatontong hapan kawit perak.

¹⁸Dinding benang lawang parantaran te inampa bara benang baputi halus je inantang hapan wol biru, ungu tuntang bahandang hayak imbungas ihias hapan sulaman. Kapanjange jalatien meter tuntang kagantonge due meter, sama dengan dinding parantaran.

¹⁹Benang bauntonggang te inahan awi epat tihang dengan epat lapik tambaga. Uras kawit, tutup lawie tuntang eka manyangkawite inampa bara perak,

²⁰tapi kare pasak akan kemah tuntang akan karambange inampa bara tambaga.

²¹Jetoh daptar logam je ihapan huang Kemah TUHAN, eka due batu je basuang Sapuluh Parentah Hatalla te iingkes. Daptar te inampa tagal parentah Moses tuntang inampa awi kare oloh Lewi je bagawi imimpin awi Itamar, anak Imam Aron.

²²Besaleel anak Uri, eson Hur bara suku Yuda, malalus kare taloh je irentah TUHAN.

²³Oloh je mandohop iete, Aholiab tuntang Ahisamakh bara suku Dan, iete tukang ukir, tukang marancang, tuntang manantang benang lena baputi halus dengan wol biru, ungu tuntang bahandang.

²⁴Amas je inenga intu taharep TUHAN akan Kemah Barasih samandiai aton sakoyan kilo, inimbang manumon timbangan je aton intu Kemah TUHAN.

²⁵ Perak je dinon bara cacah bangsa Israel aton 3.430 kilo inimbang manumon timbangan je aton intu Kemah TUHAN.

²⁶ Kare taloh te sama dengan taloh je imbayar awi uras oloh je indaptar huang cacah te. Genep biti mambayar rega je inukas, inimbang manumon timbang je aton. Intu sensus te indaptar 603.550 oloh hatue je umure due puluh nyelo kahunjun.

²⁷Bara perak te, 3.400 kilo ihapan akan mawi saratus lapik tihang Kemah TUHAN tuntang benang bauntonggange. Genep lapik ehate 34 kilo.

²⁸Bara tisan perak te, 30 kilo karee, Besaleel mawi kare taloh je hapa manontong kare kawit akan kare tihange, hayak tutup lawin kare tihang te.

²⁹Tambaga je inyarah akan TUHAN samandiaie aton 2.425 kilogram.

³⁰Tambaga te ihapa uka manampa lapik bauntonggang Kemah TUHAN, mesbeh tuntang daren kawat bara tambaga kakare pakas mesbeh,

³¹lapik dinding benang hakaliling parantaran tuntang bauntonggang lawange, kakare patok Kemah tuntang parantaran hakalilinge.