Read Ngaju EKSODUS 39 Bible Online

EKSODUS 39 - Ngaju bible

EKSODUS 39

¹Besaleel tuntang Aholiab manampa pakaian sombayang bara wol biru, ungu tuntang bahandang akan kare imam ihapan metoh ewen bagawi intu Kamar Ije Barasih. Pakaian imam akan Aron inampa kilau je irentah TUHAN dengan Moses.

²Epod inampa bara benang lena baputi halus, wol biru, ungu tuntang bahandang, tuntang lawai amas.

³Ewen mampakasak amas sampai habintap palus inete-netek jadi lawai banipis balalu inantang dengan benang lena baputi halus tuntang wol biru, ungu tuntang bahandang.

⁴Limbah te inampa due tali hunjun baha je mameteng epod iitor intu sarae.

⁵Peteng kahang benang halus inampa bara benang je sama tuntang iitor intu epod te sampai leket kilau je irentah TUHAN dengan Moses.

⁶Ewen masa batu dalima balalu mamasange huang bingkai amas. Hapan kare kaapike ewen maukir aran due walas anak Yakob intu kare batu te.

⁷Palus kare batu te imasang intu talin baha epod kilau tanda pampingat dengan due walas suku Israel, kilau je irentah TUHAN dengan Moses.

⁸Besaleel tuntang Aholiab manampa tutup usok bara benang je sama dengan epod, tuntang sulame kea sama.

⁹Tampae lapak epat je ilipet due, kalombah tuntang kapanjange sama iete 22 sentimeter.

¹⁰Intu tutup usok te imasang epat baris batu permata. Intu baris ije solake batu dalima, topas tuntang baiduri.

¹¹Intu baris kadue, jamrut, nilam tuntang intan.

¹²Intu baris katelo lasuardi, akik tuntang kacubung.

¹³Intu baris kaepat pirus, yakut tuntang ratna campaka. Due walas permata te imeteng hapan amas.

¹⁴Intu genep permata iukir aran ije bara duewalas anak Yakob kilau tanda pampingat akan kare suku bangsa Israel.

¹⁵Palus inampa due rantai bara amas tulen je injalin kilau tali.

¹⁶Inampa kea due galang amas je imasang intu kadadue lawin tutup usok te.

¹⁷Palus kadadue rantai amas te inamean akan huang kare galang te,

¹⁸tuntang kadadue tapakan je beken imeteng intu kadadue bingkai, sampai tutup usok te tau inontong dengan hila baun tali baha epod.

¹⁹Palus inampa due galang amas tinai je imasang intu tutup usok te, intu tapakan pendae hila huange je buah epod.

²⁰Limbah te inampa due galang amas je imasang intu hila baun kadadue talin baha epod, tokep tontong itore penda isut, intu hunjun peteng-kahang benang halus.

²¹Tumon parentah TUHAN dengan Moses, galang tutup usok inontong dengan tali biru intu galang epod, sampai tutup usok te tetep aton intu hunjun peteng-kahang hayak dia tau balekak.

²²Jubah je ihapan intu hunjun epod, uras inampa bara wol biru.

²³Tatas uyate indehen hapan pita benang je inantang mangat dia purah barabit.

²⁴Intu hakaliling saran pendae inampa hiasan bua dalima bara benang lena baputi halus tuntang wol biru, ungu tuntang bahandang, inyangkelang dengan garanohing amas, kilau parentah TUHAN dengan Moses.

²⁷Ewen manampa kameja akan Aron tuntang kare anake,

²⁸tinai saruban, salawar pandak bara benang lena baputi,

²⁹tuntang peteng-kahang bara benang baputi halus, wol biru, ungu tuntang bahandang, ihias hapan sulam, kilau je irentah TUHAN dengan Moses.

³⁰Inampa kea hiasan bara amas tulen, tanda je ewen jari ingabeken akan TUHAN. Intu hiasan te aton iukir bawak kotak “Ingabeken tantai akan TUHAN.”

³¹Hiasan te imasang intu saruban hila baue, kilau parentah TUHAN dengan Moses.

³²Kajariae uras gawi mawi Kemah TUHAN te hapus. Oloh Israel jari mawi taloh handiai kilau je irentah TUHAN dengan Moses.

³³Ewen mimbit akan Moses kemah dengan kare pakakase, kare kawite, kare kayu hamparang, kare tihang tuntang lapike,

³⁴tutup bara upak kambing hatue je impahandang, tutup bara upak lamos, benang tutupe.

³⁵Patin Janji je basuang due kabindang batu dengan kayu pikul tuntang tutupe,

³⁶meja dengan uras pakakase dengan rote parapah,

³⁷tantahan sumbo bara amas tulen, kare sumboe tuntang uras pakakase, minyak akan sumbo,

³⁸mesbeh bara amas, minyak upacara, garo mangat ewaue, dinding benang bauntonggang kemah,

³⁹mesbeh tambaga dengan jawet kawat bara tambaga, kayu pikul tuntang kare pakakase; bak eka menyau dengan lapike,

⁴⁰kare dinding akan parantaran tuntang kare tihang dengan lapike, dinding benang lawang parantaran dengan kare talie, kare pasak kemah; uras ramo je ihapan intu huang kemah,

⁴¹tuntang pakaian sombayang akan kare imam metoh ewen bagawi intu Kamar Ije Barasih, tuntang pakaian je ingabeken akan Aron tuntang kare anake.

⁴²Oloh Israel jari malalus uras gawi te kilau je irentah TUHAN akan Moses.

⁴³Moses mariksa urase tuntang mite je ewen jari mawie puna kilau je irentah TUHAN. Palus Moses mamberkat ewen.