Read Ngaju EKSODUS 40 Bible Online

EKSODUS 40 - Ngaju bible

EKSODUS 40

¹TUHAN hamauh dengan Moses,

²“Pendeng Kemah-Ku intu tanggal ije bulan ije.

³Namean akan huange Patin Janji je basuang Sapuluh Parentah tuntang masang benang hapa manutupe intu baue.

⁴Andak meja dengan pakakase. Namean kea tantahan sumbo tuntang masang sumboe.

⁵Andak mesbeh amas eka mamapui garo intu baun Patin Janji tuntang koak dinding benang intu bauntonggang Kemah.

⁶Andak mesbeh akan parapah je ingehu intu baun bauntonggang kemah.

⁷Andak bak danum helang kemah tuntang mesbeh te, palus nyuang dengan danum.

⁸Limbah te masang dinding hakaliling parantaran kemah, koak dinding benang lawang parantaran.

⁹Kemah tuntang hapus pakakase musti iluputm akang-Ku, dengan cara maminyake hapan minyak upacara; urase te ingabeken tantai akang-Ku.

¹⁰Luput mesbeh dengan hapus pakakase hapan cara jete, mangat urase ingabeken tantai akang-Ku.

¹¹Awi kalote kea dengan bak danum tuntang lapike.

¹²Limbah te, soho Aron tuntang kare anake dumah akan bauntonggang Kemah tuntang menyau mamparasih arep.

¹³Masang pakaian imam intu Aron; tuntang minyak ie mangat ie ingabeken akan bagawi tantai akang-Ku kilau imam.

¹⁴Palus soho kare anake manokep, tuntang masang kameja intu ewen.

¹⁵Palus minyak ewen kilau ikau maminyak bapa ewen, mangat ewen kea tau bagawi tantai akangku kilau imam. Dengan upacara minyak te, suku ewen gilir manggilir mimbing gawin imam.”

¹⁶Moses malalus kare taloh handiai kilau je irentah TUHAN.

¹⁷Palus hong tanggal ije bulan ije nyelo kadue limbah bangsa Israel malihi Misir, Kemah TUHAN te impendeng.

¹⁸Moses mandak kare lasehe, mampendeng kare bangkare, mamasang kare kayu hamparang, tuntang mampendeng kare tihange.

¹⁹Palus imbirange sapau kemah dengan tutup hila luar, hunjue, kilau je irentah TUHAN.

²⁰Palus kadadue batu te inameae akan huang Patin Janji. Balalu Moses mamasang tutup pati te, tuntang manamean kayu pikule akan huang galange.

²¹Palus ie mingkes Pati te intu huang kemah tuntang mangkoak benang hapa manutupe intu baun, kilau je irentah TUHAN akae.

²²Limbah te Moses mingkes meja intu huang kemah, intu hila utara hila luar benang.

²³Palus intu hunjun meja te iandake rote parapah.

²⁴Pain sumbo iandake intu huang kemah, intu hila salatan, hataharep dengan meja te.

²⁵Balalu kare sumbo te inutonge intu taharep TUHAN.

²⁶Mesbeh amas iandake intu huang kemah, intu baun benang.

²⁷Palus imapuie garo mangat ewaue kilau je irentah TUHAN dengan Moses.

²⁸Moses mangkoak dinding benang bauntonggang kemah.

²⁹Intu baun bauntonggang te iandake mesbeh akan parapah je ingehu. Intu hunjun mesbeh te ilupute parapah je ngehu tuntang parapah panginan.

³⁰Bak tambaga iandake helat kemah tuntang mesbeh, palus inyuange dengan danum.

³¹Moses, tuntang kare anak ewen menyau lenge tuntang pain ewen intu hete,

³²sasining ewen tame akan huang Kemah TUHAN atawa manokep mesbeh.

³³Intu hakaliling kemah tuntang mesbeh te Moses mampendeng dinding; palus ie mangkoak dinding benang lawang parantaran. Maka uras gawi te hapus.

³⁴ Limbah te baunandau palus mohon manutup Kemah TUHAN. Kemah te kontep dengan kalawan pandumah TUHAN.

³⁵Tagal te Moses dia tau tame akan huang kemah te.

³⁶Sasining baunandau te mandai bara hunjun Kemah TUHAN, bangsa Israel mungkar kemah ewen palus mindah akan eka beken.

³⁷Tapi amon baunandau te dia mandai, ewen dia haguet bara hete.

³⁸Katahin bangsa Israel manamuei, TUHAN aton intu kemah te huang ampin baunandau amon handau tuntang huang ampin apui amon hamalem.