Read Ngaju EKSODUS 9 Bible Online

EKSODUS 9 - Ngaju bible

EKSODUS 9

¹TUHAN hamauh dengan Moses, “Lius manaharep raja, sanan akae je TUHAN, Hatallan oloh Ibrani, hamauh: ‘Ela mangahana ungkup-Ku haguet mangat ewen tau manyembah Aku.

²Amon ikau dia maku malapas ewen,

³Aku kareh mampadumah panyakit je paham akan kakare meto, kuda, kalidai, onta, sapi tabiri tuntang kambing ayum.

⁴Aku kareh mangabeken meto ain oloh Israel bara meto ain oloh Misir. Bara meto ain oloh Israel ije kongan mahin jaton je matei.

⁵Aku, TUHAN, manukas andau jewu handak malalus taloh te.’ ”

⁶Andau jewue TUHAN malalus kilau je jari insanan Awie. Uras meto ain oloh bangsa Misir matei, tapi meto ain bangsa Israel ije kongan mahin jaton je matei.

⁷Raja misek en taloh je manjadi. Palus inyarita akae je kare meto ain oloh Israel ije mahin jeton je matei. Tapi raja badungil hayak dia maku malapas oloh Israel te haguet.

⁸TUHAN hamauh dengan Moses tuntang Aron, “Duan pire-pire karakup kawo bara dapur. Intu taharep raja, Moses balalu manawor kawo te akan hunjun.

⁹Palus kawo te kareh tayap intu hapus tanah Misir. Intu olon tuntang meto kawo te kareh mampalembut kare baluyong je pusit jadi buhit je hanana.”

¹⁰ Balalu Moses tuntang Aron manduan kawo, tuntang manaharep raja. Moses manawor kawo te akan hunjun. Intu olon tuntang meto palus lembut kare baluyong je mamusit jadi buhit hanana.

¹¹Kare tukang seher dia tau manaharep Moses awi hapus biti bereng ewen kontep baluyong sama kilau kare oloh Misir je beken.

¹²Tapi TUHAN mawi raja badungil. Kilau je jari insanan TUHAN, raja dia paduli auh Moses tuntang Aron.

¹³TUHAN hamauh dengan Moses, “Lius susong hanjewu jewu manaharep raja. Nyampai akae je TUHAN, Hatallan oloh Ibrani hamauh, ‘Lapas ungkup-Ku mangat ewen tau haguet manyembah Aku.

¹⁴Sinde toh Aku handak mawi calaka dia baya akan kare pagawai tuntang rayat, tapi akam kea, mangat ikau katawan je jaton tanding-Ku hong hapus kalunen.

¹⁵Amon Aku handak mahukum ikau tuntang rayatm hapan panyakit, tantu ikau jari binasa samasinde.

¹⁶ Tapi ikau nalua-Ku belom, mangat aku tau mamparahan kuasang-Ku akam, sampai arang-Ku basewut intu salepah petak.

¹⁷Aloh kalote, ikau magon kea gantong atei tuntang dia maku manyoho ungkup-Ku haguet.

¹⁸Hanjewu jewue, kilau toh, Aku mampadumah ujan es je paham, je hindai puji manjadi intu Misir bara bihin sampai toh.

¹⁹Keleh irentah mangat uras meto tuntang kare ramom je aton intu luar imbit akan eka kalindong. Uras olon tuntang meto je aton intu luar je dia tau bakalindong kareh matei intakan ujan es.’ ”

²⁰Pire-pire bara kare pagawai mikeh dengan auh TUHAN. Ewen mimbit kare jipen tuntang meto ain ewen tame akan huang huma mangat ingalindong.

²¹Tapi oloh awang beken dia paduli pampingat te hayak malihi kare jipen tuntang meto ain ewen intu padang oru.

²²Palus TUHAN hamauh dengan Moses, “Tajok lengem akan hunjun tuntang ujan es te kareh mohon intu hapus tanah Misir. Ujan te kareh mantakan olon, meto tuntang kare taloh imbul hong tana.”

²³Moses mantajok sokahe akan hunjun, palus TUHAN mampamohon nyaho tuntang ujan es, tuntang kilat manyambar akan petak.

²⁴ TUHAN mampadumah ujan es je paham impahayak awi nyaho kilat. Jete ujan es je paham toto tumon saritan oloh hong tanah Misir.

²⁵Hong hapus lewu ujan es te mampatei taloh samandiai intu tana, tamput kea olon tuntang meto. Uras pambulan rusak tuntang kare batang-kayu balihang.

²⁶Baya tanah Gosen, eka melai oloh Israel, dia buah ujan es.

²⁷Palus raja mantehau Moses tuntang Aron hayak hamauh, “Aku jari badosa. TUHAN te je bujur, aku tuntang rayatku jari basala.

²⁸Keleh balakudoa intu TUHAN; ikei jari sukop kapehe awi nyaho tuntang ujan es toh. Aku handak malapas keton haguet keton dia usah melai hetoh tinai.”

²⁹Koan Moses dengan raja, “Sana aku sampai intu luar lewu, aku kareh manggatang lengengku balakudoa intu TUHAN. Nyaho kareh tende tuntang ujan es kareh malayan, mangat Tuangku katawan je kalunen toh ayun TUHAN.

³⁰Tapi aku katawan je Tuangku tuntang kare pagawai hindai kea mikeh dengan TUHAN, Hatalla.”

³¹Kare batang-kayu, batang rami tuntang jelei lepah luyut, awi rami kanjerae mangambang, tuntang jelei kanjerae habawak.

³²Tapi gandom tuntang bawak paung taloh imbul dia rusak awi hindai haduring.

³³Palus Moses malihi raja tuntang haguet akan luar lewu. Hete ie manggatang lengee balakudoa manintu TUHAN. Hemben te kea nyaho, ujan, tuntang ujan es balalu terai.

³⁴Metoh raja mite taloh je manjadi, ie badosa tinai. Ie tuntang kare pagawai ayue tetep badungil.

³⁵Kilau je jari insanan TUHAN mahalau Moses, raja dia maku manyoho oloh Israel haguet.