Read Ngaju YOB 1 Bible Online

YOB 1 - Ngaju bible

YOB 1

¹Intu tanah Us[1] aton ije biti oloh hatue je bagare Yob Ie manyembah Hatalla tuntang baketep intu Ie. Ie oloh je bahalap ateie tuntang dia puji samasinde malalus kapapa.

²Yob aton anake uju biti hatue tuntang telo biti bawi.

³Beken bara te ayue are jipen, 7.000 kongan tabiri, 3.000 kongan onta, 1.000 kongan sapi, tuntang 500 kongan kalidai. Hong katika te, Yob oloh je pangkatataue hong marak kare oloh je melai hong tanah hila timor.

⁴Uras anak hatue ain Yob je uju biti toh, patuh mawi pesta hagilir hong genep humae kabuat. Hong pesta te uras anak bawi ain Yob je telo biti irawei kea, palus ewen haya-hayak kuman mihop.

⁵Limbah gagenep pesta jari hapus, Yob harajur misik hanjewu tuntang maluput parapah akan genep anake mangat ewen iampun awi TUHAN. Awi Yob manirok; mikeh kare anake te jari badosa tuntang tantai ihat manawah Hatalla.

⁶ Hong sinde andau kare kawan taloh belom hong sorga[2] manaharep TUHAN, tuntang setan[3] aton kea marak ewen.

⁷TUHAN misek dengae, “Bara kueh ikau?” Setan tombah, “Rewarm dumah bara jalanan manamuei akan hete-hete tuntang mangumbang hapus kalunen.”

⁸Palus TUHAN misek, “En jari ikau manantuani rewar-Ku Yob? Intu hapus kalunen jaton oloh je kalote kaketepe tuntang kahalap budi basarae kilau ie. Ie manempo Aku tuntang dia samasinde mawi kapapa.”

⁹ Tapi Setan tombah, “Batantu bewei Yob manempo Ikau awi ie manarima upah.

¹⁰Ie, hapus keluargae tuntang kare panataue harajur ingalindong Awim. Gawie imberkat tuntang inenga Awim akae are meto, sukop akan mangontep hapus petak danum.

¹¹Tapi jaka kare panataue te induan Awim, batantu ie kareh balalu manyapa Ikau!”

¹²Koan TUHAN dengan setan, “Yoh, lalus narai bewei kahandakm dengan hapus panatau Yob, asal ela ikau mangapehe ie!” Palus setan harikas bara taharep TUHAN.

¹³Pire-pire katahie limbah te, kare anak Yob malalus pesta intu human kaka ewen je tambakas.

¹⁴Salenga ije biti sarohan dumah dari-dari akan human Yob tuntang mansanan, “Tuan, oloh Seba[4] jari dumah manyarang ikei metoh kare sapi kanjerae maluku tana tuntang kare kalidai kanjerae mambawau tokepe. Ewen jari marampas kare meto te, tuntang mampatei kare rewar Tuan je aton intu hete. Baya ije rewarm toh ih je liwus sampai tau mansanan taloh toh akan Tuan.”

¹⁶Metoh ie magon hakotak, aton dumah rewar je kadue balalu hamauh, “Kare tabirin tuan tuntang kare sakatik jari inyambar kilat sampai matei urase. Baya rewarm toh kabuat ih je liwus sampai tau mansanan akan Tuan.”

¹⁷Metoh ie hindai lepah hakotak, dumah tinai rewar je katelo mansanan, “Telo kawan parampok Kasdim[5] jari marabut kare onta ain Tuan tuntang mampatei kare rewar Tuan. Baya rewarm toh ih je liwus sampai tau mansanan te akan Tuan.”

¹⁸Metoh ie magon hakotak, dumah tinai rewar beken je mimbit kabar, “Kakare anak Tuan kanjerae malalus pesta intu human anak Tuan je tambakase.

¹⁹Salenga riwut barat dumah bara hila padang pasir tuntang mamok huma te sampai baderep tuntang mampatei uras anak Tuan. Baya rewarm toh ih je liwus sampai tau mansanan akan Tuan.”

²⁰Palus Yob mendeng tuntang marabit pakaiae tanda kapehen ateie. Ie manggundul takoloke, palus sontop manyembah,

²¹tuntang hamauh, “Aku inakan jaton mimbit taloh en-en, tuntang aku kareh matei jaton mimbit taloh en-en kea. TUHAN jari manenga tuntang TUHAN kea jari manduae. Tara akan aran Aie!”

²²Jadi, aloh Yob mangkeme kajake te, ie dia mawi dosa tuntang dia manyalan Hatalla.