Read Ngaju YOB 10 Bible Online

YOB 10 - Ngaju bible

YOB 10

¹Aku peda tuntang bajilek dengan pambelomku, maka aku mampalua angat kapehen hambaruangku.

²O Hatalla, ela Ikau manyalan aku; sanan bukue mbuhen Ikau malawan aku.

³Narai kaontonge amon Ikau mahenyek aku kilau toh, tuntang manganan kare hasil gawingku kabuat? Narai kaontonge amon Ikau mandohop tirok tuntang rencana ain kare oloh papa?

⁴Tirok Ayum dia sama dengan tirok olon

⁵tuntang umur Ayum dia tumon kapandak umur oloh kalunen.

⁶Amon kalote mbuhen Ikau manggau kare dosangku? Mbuhen Ikau manggoang aku tagal kasalangku?

⁷Ije katotoe Ikau katawan toto, je aku toh puna dia sala, tapi bujur. Ikau katawan ije biti mahin dia olih, manyalamat aku bara lengen Aim.

⁸Aku toh inampa awi lengen Aim, lalehan kea katika toh[21] Ikau handak mambinasa aku?

⁹Keleh mingat tahiu aku toh inampa Awim bara petak liat![22] Dia badai Ikau haluli manampa aku bara kawo.

¹⁰Ikau manenga kaolih akan bapaku manampa aku tuntang Ikau mampahai aku huang kanain induku.

¹¹Bitingku imangun dengan karangka tuntang uhat; Ikau manenga isi tuntang upak hapa mambabat tulangku.

¹²Ikau manenga akangku pambelom; Ikau sinta aku, hambaruangku injaga Awim dengan pahagan Ayum.

¹³Tapi toh katawangku katahin te, suni-suni Ikau marencana calaka akangku.

¹⁴Ikau manantuani aku mikeh mawi kasalan mangat Ikau dia manenga ampun.

¹⁵Amon aku badosa, puna calaka akangku! Tapi amon gawingku jaton bara kasalan, tetep aku iitong badosa. Dia bahanyi aku manggatang takolokku, awi aku badosa tuntang jaton barega.[23]

¹⁶Jaka aku dinon hasil, aloh dia are, Ikau manggoang aku kilau singa. Tuntang Ikau mamparahan haluli kuasan Aim, baya hapa mampikeh aku.

¹⁷Harajur Ikau mimbit saksi malawan aku; tuntang sasar paham kasangit Aim dengangku. Ikau mirak pasukan taheta mangat manyarang tuntang mamarang aku.

¹⁸Mbuhen Ikau manalua aku inakan akan kalunen? Labih bahalap aku matei ih sahelo bara gitan olon!

¹⁹Maka kila-kilau jaka aku dia puji inakan, awi bara huang kanai balalu ingubur.

²⁰Dia tahi tinai aku akan matei, nalua aku kabuatku, mangat aku tau mangkeme kamangat hong pembelom je magon batisa toh.

²¹Dia tahi tinai aku haguet tuntang dia haluli, akan lewu je kaput tuntang kawos toto,

²²lewu je kaput, kontep kangkalingen tuntang taloh je kacau, hong hete kalawa sama kilau kakaput.”