Read Ngaju YOB 11 Bible Online

YOB 11 - Ngaju bible

YOB 11

¹Limbah te Sopar hamauh, “En diakah kamburau ayum te inombah? En patut oloh je pahabitak te imbujur?

³Yob, ikau manyangka ikei dia tau manombah auhm? Ikau manyangka ikei suni awi auh baka ayum te?

⁴Manumon tirokm auhm te dia sala; manumon pangkemem ikau barasih intu taharep Hatalla.

⁵Tapi, keleh Hatalla kabuat hakotak!

⁶Tuntang keleh Hatalla mansanan akam, je pangatawan tahiu kapintar kaharati te are panyarae, tuntang dia olih iharati awi olon. Awi te keleh ikau maharati tahiu kapehem te magon dia pire, amon inanding dengan hukum je puna patut ikau manarimae.

⁷En olih ikau manduga kandalem tirok atei Hatalla. En olih ikau mangasene kuasan Aie?

⁸Kuasan Aie labih gantong bara langit, dia olih ikau mambet manjapange? Kuasan Aie labih handalem bara lewun oloh matei; samasinde dia olihm maharatie.

⁹Kuasan Hatalla lombah bara kalunen, tuntang labih lombah bara tasik lombah.

¹⁰Amon Ie manyingkap tuntang mimbit ikau akan pengadilan eweh bahanyi mambalang gawin Aie?

¹¹Hatalla mangasene oloh je rajin mananjaro, kapapan ewen dia lapas bara tampayah Aie.

¹²Amon indu kalidai baliar manak kalidai balinek, harun oloh humong tau pintar harati.

¹³Yob, keleh mamparasih arepm tuntang manyasal! Keleh balakudoa manintu Hatalla.

¹⁴Nganan dosa bara ateim, tuntang ngejau kapapa bara humam!

¹⁵Maka ikau tau belom tanggar atei tuntang gagah; ikau akan mendeng segah tuntang dia usah balisah,

¹⁶sampai kapehem mahin dia hindai ikau mengenange; kilau danum soho je jari surut, ingalapean awi oloh.

¹⁷Pambelom ayum labih balawa bara kalawan andau, tuntang kare katika je kaput hong pambelom ayum sama kilau katarang andau hanjewu.

¹⁸Ikau dehen tuntang kontep kaharap; Hatalla akan mangalindong ikau, sampai ikau belom aman.

¹⁹Ikau dia akan mikeh dengan musoh; are oloh je handak balaku dohop dengam.

²⁰Tapi oloh papa akan manampayah taloh dia sanunoh; awi akan ewen jaton pandohop. Tikas ije ih kaharap ewen iete bajeleng matei.”