Read Ngaju YOB 12 Bible Online

YOB 12 - Ngaju bible

YOB 12

¹Yob tombah, “Punae, keton toh wakil oloh kalunen. Amon keton matei, kapintar tuntang kaharati akan matei kea.

³Aku kea olon je aton tirok itongku; uras taloh je ingotak keton te jari haratingku. Tinai, eweh je dia mangatawan uras taloh te? Jadi, ela manyangka arep keton labih bara aku!

⁴Aku inatawe awi kawal tuntang sobatku; tapi aku, oloh bujur tuntang dia bara kasalan. Bihin Hatalla manombah lakudoangku, amon aku mantehau balaku indohop.

⁵Keton manawah oloh calaka, tapi pambelom keton sanang mangat; oloh je handak balawo imukul awi keton.

⁶Pambelom kare parampok jaton je manderohe; tuntang kare oloh je malawan Hatalla belom sanang mangat. Ewen mampaandal dewa, baya mahapan kaabase kabuat bewei.

⁷Keleh misek burong tuntang meto je beken, maka keton akan inenga auh ajar awi ewen.

⁸Laku katarangan bara taloh belom hong kalunen tuntang hong tasik, te ewen kareh tau manarang akan keton.

⁹Eweh bara kakare ewen te je dia katawan je manampa ewen te iete Hatalla kabuat?

¹⁰Ie mator pambelom kare kawan taloh belom je aton; Ie manguasa hambaruan genep bitin olon.

¹¹Kilau jelangku je rajin mangkeme panginan je mangat, kalote kea pindingku rajin mahining auh kotak.

¹²Koan oloh, pangatawan tahiu kapintar kaharati aton intu oloh je bakas umure, tapi pangatawan tahiu kapintar kaharati tuntang kaabas, baya aton hong Hatalla bewei. Koan oloh, kaharati te aton intu oloh je bakas umure, tapi aloh kalote kaharati tuntang kuasa malalus taloh handiai baya aton intu Hatalla kea!

¹⁴Narai taloh je jari ingarak Awie dia olih imangun tinai, eweh je inawan Awie dia olih bebas haluli.

¹⁵Amon Ie manabat danum, maka taloh handiai palus keang kamahau; Ie mampaluae mahasor, maka danum soho manyangkulep petak.

¹⁶Hatalla te abas, dia taralawan, tuntang tamam! Oloh je manipu tuntang je buah tipu aton intu penda kuasan Aie.

¹⁷Ie manduan kare pangatawan tahiu kapintar kaharati bara kare oloh kuasa je marentah, tuntang Ie mawi kare pamimpin akan jadi tatawen oloh.

¹⁸Ie mampalongkang kare raja tuntang manawan ewen;

¹⁹Ie mamparanadah kare imam tuntang kare oloh basewut.

²⁰Ie mampabenyem kare oloh je apik bapander, Ie manduan kare pangatawan tahiu kapintar kaharati bara kare oloh bakas.

²¹Ie mampahawen kare oloh basewut, Ie manduan kuasa bara oloh je marentah.

²²Ie mampalawa kare eka je derem, Ie manyingah kare kangkalingen je kaput pijem.

²³Kare bangsa impamaju Awie tuntang inenga Awie kasanang belom, palus imbinasa Awie ewen sampai hancor.

²⁴Ie mawi kare pamimpin jadi oloh je nihau pikir akale, sampai ewen manamuei jaton bara tujuan.

²⁵Ewen gaya-gayap huang kakaput, tuntang ruyung-rayang kilau oloh babusau taloh ihop.