Read Ngaju YOB 13 Bible Online

YOB 13 - Ngaju bible

YOB 13

¹Uras taloh te puji aku mitee tuntang mahininge kabuat, tuntang toto-toto aku maharatie.

²Narai je ingatawan keton, katawangku kea; ela manyangka aku kalah bara keton.

³Tapi aku handak hakotak dengan Je Jaton Tikas Kuasae; aku handak mambela pakarangku intu taharep Hatalla.

⁴Awi keton mangalindong kasalan keton hapan tipu, jaton kabekee bara kare tabit pananjaro.

⁵Jaka keton dia hakotak, puna tau keton inyangka pintar harati.

⁶Awi te hining auh panombah aingku; tuntang nyeneh auhku mambela arepku.

⁷En tau keton mananjaro tagal Hatalla? En tau keton mamunga tagal Hatalla?

⁸En tau keton omba hila Hatalla, tuntang mandohop Ie kilau pengacara?

⁹Amon Hatalla mariksa keton, en hasile batantu bahalap? En olih keton manipu Ie kilau manipu olon?

¹⁰Amon keton mamihak aloh suni-suni, keton akan ihukum Awie hapan katulas.

¹¹En kahain Hatalla dia manarewen hambaruam? En katamam Ayue dia mampakorik atei keton?

¹²Kare nasehat keton kilau kawo je jaton baguna, auh keton mambela sama kilau petak karitip murah bapusit.

¹³Awi te keleh suni, nauhe aku je hakotak! Aku dia paduli aloh kilen ampin kajariae.

¹⁴Aku[24] manyadia arepku akan pampatei!

¹⁵Aku selang awi kaharapku jari nihau! Jaka Hatalla handak mampatei aku, aku manyarah arepku, tapi aku akan mambela kare gawingku intu taharep Ie.

¹⁶Eweh katawae mikeh awi kahanyingku te aku salamat, awi oloh papa akan dia bahanyi manaharep Hatalla!

¹⁷Toh, hining bua-buah auhku; tuntang nyeneh taloh je inarang awiku.

¹⁸Aku jari manatap pakarangku uka imutus, aku mangkeme dia olih aku inyalan!

¹⁹TUHAN, amon Ikau dumah tuntang mandawa aku, aku baya suni tuntang mentai pampateiku.

²⁰Baya tenga due taloh je ilakuku toh, uka aku bahanyi manaharep Ikau tinai:

²¹keleh terai mangapehe aku, tuntang ela mantakan aku hapan kapaham kahain kuasa Aim.

²²Keleh hakotak, maka aku akan manombahe, Atawa nauh aku hakotak, palus keleh Ikau tombah auhku.

²³Kilen karee kasalangku tuntang dosangku? Sewut akangku kare pelanggaran je iawiku!

²⁴Mbuhen Ikau mahakan tuntang mangejau arep bara aku? Narai bukue Ikau mitong aku kilau musoh Ayum?

²⁵Aku kilau dawen je baduroh awi riwut je mahalau, lalehan Ikau mampagaer aku! Aku baya tampilai je keang tuntang balayu, narai gunae Ikau manggoang aku.

²⁶Ikau manukas kajarian belom je bapait akangku; Ikau mambaleh kasalangku je iawiku metoh aku tabela.

²⁷ Paingku imeteng Awim hapan rantai sanaman; Ikau manantuani kare tanjong teteiku. Sampai tatap paingku dia lapas bara tampayah Aim.

²⁸Aku jadi rebok kilau kayu je maram, kilau benang je kinan gagat.