Read Ngaju YOB 14 Bible Online

YOB 14 - Ngaju bible

YOB 14

¹Bara katika inakan olon te balemo, jaton bara kaabas; pambelome pandak hayak kontep kapehe.

²Ie lembut tuntang balayu kilau kambang; lilap kilau kakanglingen, balalu nihau.

³O Hatalla, lalehan Ikau maku mite aku, tuntang mampataharep aku intu pengadilan!

⁴En olih olon je badosa mampalembut taloh je tinduh?

⁵Hasean umur olon jari inukas Awim; tuntang hasean kare bulan, jari inantu Awim; Ikau jari manatap tikas pambelome; dia tau ie mahalaue.

⁶Nauh ie malayan kahekae, ela manderoh ie; mangat ie tau mangkeme pambelome sampai lepah gawie.

⁷Magon aton kaharap akan batang je ineweng; ie akan manyalundik tinai palus lembut edae.

⁸Aloh hong petak uhate rebok, tuntang tunggule matei awi maram,

⁹tapi amon buah danum ie tumbo tinai, sama kilau taloh imbul je mangor, kare salundike manyuloh haluli.

¹⁰Tapi amon olon matei, lepah saritae; olon bageto tahasenge, ie malihi kalunen palus akan kueh darie?

¹¹Sama kilau danum mamaus bara huang talaga, sama kilau sungei teah sampai lepah danume,

¹²kalote kea olon je jari matei: ie dia akan belom haluli. Ie dia akan misik, katahin langit magon aton, ie dia puji misik bara tirohe.

¹³Nyahokan aku hong eka kare liau oloh matei; ngalindong aku sampai kasangit Aim terai. Tapi nukas katika uka aku mingat arepku.

¹⁴Basa, amon olon matei, en olih ie belom haluli? Genep andau aku mentai sampai wayah kapehengku toh mahalau.

¹⁵Maka Ikau akan mantehau aku, palus aku tombah auh Aim; Ikau akan sayang dengangku, taloh belom je injapan Awim.

¹⁶Palus Ikau manantuani genep tanjong teteiku, tapi ikau dia manantuani dosangku.

¹⁷Dosangku akan iampun tuntang inganan Awim, kasalangku bihin akan ingabus Awim.

¹⁸Tapi kare bukit akan baduroh tuntang inaboran, tuntang bukit batu je segah tindar bara ekae.

¹⁹Danum je paham badehes mangikis kare batu; ujan je labat mampahanyut kare petak. Kalote Ikau mampahancor kaharap olon.

²⁰Ikau mampakalah ie sampai katatahie; Ikau manyoho ie haguet tuntang ikau mobah ampin baue.

²¹Kare anake jadi oloh basewut, tapi ie dia mangatawae. Tuntang amon ewen manjadi oloh je inawah, jaton oloh je mansanan akae.

²²Baya angat kanyilo biti bereng je ingkemee; baya kapehen atei je inyarenae.”