Read Ngaju YOB 16 Bible Online

YOB 16 - Ngaju bible

YOB 16

¹Tapi Yob tombah, “Aku rancak jari mahining auh kalote; auh ampong baya taloh manyiksa.

³Hamparea keton terai mangamburau? Narai je mawi keton handak toto manenga panombah?

⁴Jaka keton toh aku, tuntang aku toh keton, aku mahin olih bapander sama kilau te. Aku mameda belai keton hapan pander; tuntang aku manggiling-giling takolokku.

⁵Aku tau mampaabas atei keton hapan nasehat, kare kotakku akan manenga ampong.

⁶Amon aku hakotak, kapehengku dia nihau; amon aku suni, narai kea gunae?

⁷Hatalla mawi aku pahalau heka; hapus keluargaku jari imbinasa.

⁸Ie malawan tuntang manyingkap aku. Toh bitingku paringkong bario, tuntang akan are oloh jete tandae je aku puna badosa.

⁹Hayak kasangite Hatalla mamisak bitingku; hayak hasep kasingi Ie manampayah aku.

¹⁰Kare oloh mahalalea aku hapan nyamae nganga-nganga; aku ingarobut tuntang pipingku inampare.

¹¹Hatalla manyarah aku akan oloh darhaka; aku injakahe akan lengen oloh papa.

¹²Bihin aku belom sanang mangat, tapi Hatalla manyarang aku manyalenga. Tekokku inyingkape tuntang aku injakah; Ie mawi aku akan hapa balatih.

¹³Hayak jaton angat asi Ie raju-rajur, mamanah aku, sampai bula-bular bajakah kanaingku.

¹⁴Ie manyarang aku kilau ije biti pejuang, tuntang mampahimang aku jua-juan.

¹⁵Aku mahapan kampil tanda kapehen atei, tuntang mondok intu kawo tanda aku kalah.

¹⁶Baungku bahandang awi tangisku; upak matangku kembang hayak biru.

¹⁷Tapi aku dia malalus katulas; puna dengan katoton atei aku balakudoa manintu TUHAN.

¹⁸O petak, ela manyahokan kapapa je mawi aku, ela mambenyem kariakku balaku kaadilan.

¹⁹ Aku katawan pandohop ayungku aton hong sorga, Ie manyaksi aku je puna dia badosa.

²⁰Aku ihababaka tuntang inatawe awi kare sobatku; sambil manangis aku manaharep Hatalla balaku dohop.

²¹Toh, keleh Hatalla kabuat je mambela aku intu taharep Ie, sama kilau ije biti oloh je pahias mambela sobate.

²²Kare andau umurku je batisa dia are hindai; dia tahi tinai aku akan haguet tuntang dia baka buli haluli.