Read Ngaju YOB 17 Bible Online

YOB 17 - Ngaju bible

YOB 17

¹Pampateiku jari tokep, tahasengku handak bageto; baya kubur bewei je batisa akangku.

²Oloh manjadian aku tantai akan ihalalea; gitangku lalehan ampin ewen manyindir aku.

³Aku toh bujur ateiku, o Hatalla. Keleh percaya ih dengangku! Eweh hindai je tau mandehen auhku?

⁴Ikau manutup atei ewen sampai ewen dia haratie; ela sampai ewen mampakalah aku wayah toh.

⁵Manumon auh tampengan, eweh je mangadu sobate awi handak mandino ontong, te kare anake kabuat akan manarima balehe.[26]

⁶Toh aku inyindir hapan tampengan te; ewen dumah maluja baungku.

⁷Matangku kawos awi kapehe atei, hapus bitingku ringkong-rio.

⁸Oloh je barasih tarewen hayak heran; oloh je jaton kasalae, mitong aku dia bara TUHAN.

⁹Oloh bahalap tuntang dia bara kasalan, sasar percaya ampin pambelome ingilak Hatalla.

¹⁰Tapi jaka keton uras dumah akan hetoh, ije biti mahin jaton aku sondau oloh je pintar harati bara marak keton.

¹¹Kare andauku jari mahalau, uras jaton hasil kare rencana aingku; uras nihau kare kakenang ateiku.

¹²Tapi kare sobatku hamauh, ‘Alem te handau tuntang kalawa handak dumah.’ Tapi aku katawan bara huang ateiku, je ampin pambelomku tetep huang kakaput.

¹³Baya lewun pampatei ih je iharapku, hete aku batiroh hong kakaput.

¹⁴Kuburku inggareku “Bapaku”, tuntang kare handalai je kuman bitingku inyewutku “Induku”, tuntang “Betauku”.

¹⁵Hong kueh kaharap akangku? eweh je mite aton kasanang akangku?

¹⁶Amon aku[27] mohon akan eka kare liau oloh matei, aku dia bara kaharap tinai.”