Read Ngaju YOB 18 Bible Online

YOB 18 - Ngaju bible

YOB 18

¹Maka tombah Bildad, “O Yob, hamparea ikau terai hakotak? Suni, tuntang hining toh ikei handak hakotak.

³Mbuhen ikau mitong ikei toh bureng, tuntang ikau maanggap ikei sama dengan sapi?

⁴Kasangitm baya mangapehe arepm. En patutkah tagal ikau petak nihau oloh melaie, tuntang kare bukit inindar bara ekae?

⁵ Sumbo ayun oloh papa musti imbelep; apuie dia puji tinai inotong.

⁶Kalawa hong kemahe jadi kawus; sumboe dia puji tinai manenga kalawa.

⁷Tanjonge je segah jadi ruyong-rayang; rencanae kabuat mawi ie tantarang.

⁸Ie mananjong manalih jarat, maka paie sangkawit.

⁹Takire leket awi jarat, palus ie inawan.

¹⁰Intu petak, basahokan talin jarat; hong jalan, inenan jabak tuntang pahapit.

¹¹Oloh papa inarewen awi taloh je bakaike-ikeh; dumah bara hete-hete; kikeh manuntut gagenep ingkange mije-mije.

¹²Bihin ie abas, toh ie asi-asi; calaka mampahayak ie intu hete-hete.

¹³Upak bitie kinan panyakit je paham; lengee tuntang paie maram hanana.

¹⁴Ie irunap bara kemahe, ekae mangkeme taduh sanai, palus injijit manaharep pampatei.

¹⁵Toh eweh bewei tau melai hong kemahe, tuntang intu hete imbowor barirang, hapa mampatei panyakite.[28]

¹⁶Kare uhate keang kambareut; kare patinge keang mangarusut.

¹⁷Ie dia ingasene tinai aloh intu luar atawa intu huang lewu; jaton ije biti oloh je mingat arae.

¹⁸Bara kalawa ie iharak akan kakaput; tuntang bara eka oloh belom ie iharak.

¹⁹Ie jaton bara anak tuntang jaton bara turonan; intu huma lewue ije biti mahin jaton tisae.

²⁰Oloh hong hila barat tarewen mahining kajariae, tinai oloh je melai hila timor hagenjeh awi kikehe.

²¹Kalote ampin kajarian oloh darhaka, ewen je dia paduli dengan Hatalla.”