Read Ngaju YOB 2 Bible Online

YOB 2 - Ngaju bible

YOB 2

¹Kare kawan taloh belom hong sorga haluli manaharep Hatalla. Kalote kea setan Je Paningkes te aton marak ewen te.

²Maka TUHAN misek ie, “Bara kueh ikau?” Koan Je Paningkes te tombah, “Bara tanjong tetei, mangaliling hete-hete, mangumbang kare kaleka hapus kalunen.”

³Te koan Hatalla misek tinai, “En ikau jari manantuani rewar-Ku Yob? Intu hapus kalunen jaton oloh je kalote kahalap ateie tuntang kabujur ateie je kilau ie. Ie manyembah Aku tuntang samasinde jaton puji malalus kapapa. Ie baketep manempo Aku aloh ikau mucok Aku mawi calaka akae aloh jaton bara buku sabab.”

⁴Balalu setan Je Paningkes te tombah auh Hatalla, “Tahaseng tuntang karigas bereng labih barega bara panatau kalunen. Olon hakon manganan kare panataue asal ie tetep belom.

⁵Amon bitie ingapehe Awim, batantu ie akan manyapa Ikau!”

⁶Maka Hatalla hamauh dengan Je Paningkes, “Buah, lalus narai bewei kahandakm dengae, asal ela ikau mampatei ie.”

⁷Balalu Paningkes te harikas bara taharep Hatalla, tuntang ie mawi buhit buei intu hapus bitin Yob bara tatap paie palus hunjun takoloke.

⁸Balalu Yob mondok tokep tuyok taloh papa tuntang manduan kiwak kasa hapae manggarus biti berenge.

⁹Sawae hamauh dengae, “Mbuhen ikau magon tetep manempo Hatalla? Ayo, nyapa Ie, keleh palus matei.”

¹⁰Tombah Yob, “Ikau bapander kilau oloh bureng! Mbuhen itah baya handak manarima narai je bahalap bewei bara Hatalla, tapi je dia bahalap itah manolake?” Jadi aloh Yob mangkeme kare kajake te, ie dia mampalua kotak je malawan Hatalla.

¹¹Kajake je buah Yob jari ihining awi telo biti sobate, iete Elipas bara lewu Teman, Bildad oloh Suah tuntang Sopar oloh Naama. Ewen hapakat handak manyengok tuntang mampong ie.

¹²Tapi metoh ewen manampayah ie, ewen handak dia kasene ie tinai. Ewen manangis hai auhe hayak marabit pakaiae tuntang manawor kawo akan hunjun udara tuntang akan hunjun takoloke.

¹³Uju andau uju alem ewen mondok intu petak, hadarah dengan Yob, tuntang jaton mampalua ije kabawak kotak, awi ewen mite ampin kapaham kapehe je inyarenen awi Yob.