Read Ngaju YOB 20 Bible Online

YOB 20 - Ngaju bible

YOB 20

¹Palus Sopar tombah, “O Yob, aku aton pangkeme dia sanang tagal auhm, toh aku handak manombah auhm.

³Auhm te paham manawah aku, tapi aku katawan kilen auh panombahe.

⁴En katawam je bara jaman horan, manampara bara olon je solake ina hong kalunen toh,

⁵kahanjak oloh papa baya hanjulo bewei, tuntang kasanang oloh darhaka baya ije kapijep mate?

⁶Aloh kahaie sampai akan langit, sampai takoloke tempe baunandau,

⁷tapi ie akan nihau katatahie, lilap bara kalunen dengan cara je paling asi-asi. Kare oloh je puji kasene ie, akan misek, “Hau, akan kueh pangguete?”

⁸Ie akan nihau kilau kangkalingen nupi, lilap bara tampayah kilau paite hong hamalem.

⁹Ie dia gitan tinai awi mate, ie jaton melai hong ekae.

¹⁰Taloh je inakaue bihin bara oloh je belom susah, musti ingganti awi kare anake.

¹¹Aloh ie tabela tuntang kanjeran kagagahe, tapi dia tahi tinai ie akan jadi kawo bewei.

¹²Lalehan kamanis kapapa intu nyamae! Sayang angate amon balalu manele; awi te ie mingkese hong penda jelae, mangat tahi ie mangkeme kamangate.

¹⁴Tapi panginan te hobah huang kanai, jadi pulih bapait je mimbit pampatei.

¹⁵Kare ramon takau je inelee, tarapaksa ie mutae; Hatalla mampaluae bara huang kanaie.

¹⁶Kare oloh papa mihop pulih je mimbit calaka, ia akan matei awie sama kilau inotok handipe tada.

¹⁷Ie dia akan mangkeme kamangat minyak saitun je hakutoh[32] atawa kea susu tuntang mado je are sampai mamurai.

¹⁸Uras kaontonge iliae; kare hasil gawie dia ie mangkeme kamangate.

¹⁹Awi ie jari mahenyek tuntang manalua oloh je belom susah, ie jari marabut human oloh je dia ie mamangue.

²⁰Awi kakohoe je jaton tikase, maka dia puji ie mangkeme taloh je sukup.

²¹Amon ie kuman, uras taloh kinan impalepahe, awi te angat kasanange dia bunggut.

²²Metoh ie hong sakalepah kasanange, kasusah tuntang kapehe salenga dumah mantakan ie.

²³Metoh ie deroh manyuang kanaie, Hatalla palus sangit toto tuntang mahukum ie.

²⁴Amon ie mahakan bara padang waja, ie akan impahimang awi panah tambaga.

²⁵Ie buah panah palus bahimang; tapakan panah je ngila-ngilat menembus bitie, balalu kikeh malambon ateie.

²⁶Lepah hancor kare panatau je ingkese; ie hayak hapus keluargae kinan apui je dia inotong awi olon.

²⁷Langit mamparahan kapapae, tuntang petak harikas malawan ie.

²⁸Uras kare panataue lepah lingis, awi kapaham kasangit Hatalla.

²⁹Kalote ampin kajarian oloh darhaka; kajarian je inukas awi Hatalla akae.”