Read Ngaju YOB 21 Bible Online

YOB 21 - Ngaju bible

YOB 21

¹Yob tombah, “Hining bua-buah, narai je akan ingotakku; baya jete ih aku balaku kilau ampong.

³Nyoho aku talinjam hakotak, limbah te tau keton mahina aku!

⁴Aku puna hasoal dengan olon, jadi dia narai-narai ih amon aku dia lalau sabar.

⁵Ite aku, maka keton akan hengan, keton jungon, balalu kilau oloh bisu.

⁶Amon aku manirok ampingku toh aku hagenjeh awi mangkarieng.

⁷Mbuhen oloh papa inenga umur panjang awi Hatalla tuntang ramon ewen sasar mandahang?

⁸Ewen belom sukup katahie sampai olih mite anak eson ewen jadi bujang.

⁹Huma serok ewen sanang landang; Hatalla dia mampadumah calaka akan ewen.

¹⁰Meto ain ewen manak-manaka, jaton ampin kahalie manak.

¹¹Kare anak oloh papa barakajok hanjak, kilau tabiri tabela je hanjak rantang.

¹²Impahayak auh tarabang, suling tuntang kacapi, ewen rami manyanyi hayak manari.

¹³Kare andaue impahapus hong kasanang, tuntang ewen matei huang kasanang bewei.

¹⁴Padahal ewen jari hamauh dengan Hatalla, “Keleh kejau bara ikei tuntang lius haguet! Ikei dia handak katawan tuntang dia handak maharati, tahiu kahandak Ayum dengan pambelom ikei!”

¹⁵Tirok ewen, “Manempo Hatalla jaton gunae, tuntang balakudoa manintu Ie jaton hasile.

¹⁶En dia awi kaabas itah bewei, itah mandino uras taloh je ingahandak itah?” Tapi aku samasinde dia manarima tirok itong je tumon te.

¹⁷En puji sumbon oloh papa imbelep, tuntang ewen buah calaka tuntang sial kawe? Puji Hatalla sangit dengan ewen, sampai ewen ihukum awie?

¹⁸En puji ewen kilau tampilai tuntang kawo je ihimun awi riwut barat tuntang awi riwut mahalau?

¹⁹Keton hamauh, “Anak ihukum awi dosan bapae.” Tapi koangku: Oloh je badosa je patut ihukum Hatalla, mangat ewen haratie je taloh te awi dosan ewen, maka Hatalla mangirim hukumae.

²⁰Nauhe oloh badosa mananggong dosae kabuat, nauhe ih ie mangkema kalait Hatalla Je Jaton Tikas Kuasae.

²¹Jaka olon lepah katikae hong kalunen, en ie magon mangenang kare keluargae je belom sanang?

²²En tau olon majar Hatalla, padahal Hatalla kabuat je mahakim kare kawan taloh belom hong sorga?

²³Aton oloh je barigas katahin pambelome; ie matei ombet huange tuntang salawah. Pampateie tadoh sanang marak bitie magon gancang.

²⁵Tapi aton kea je matei kontep kapehen atei, palus dia puji mangkeme kasanang.

²⁶Tapi hong kubur ewen sama-sama menter; ingarobut uret tuntang handalai.

²⁷Puna aku katawan taloh je inirok keton tuntang kare kapapa je irencana awi keton.

²⁸Pisek keton, “Hong kueh human oloh kuasa je mawi kadarhaka?”

²⁹En hindai keton misek kare oloh je rajin manamuei? En keton dia percaya kare auh ewen te?

³⁰Koan ewen, “Hong andau Hatalla mahukum, kare oloh papa akan inyalamat.”

³¹Jaton oloh je tau manyalan gawie; jaton oloh je tau mabaleh kapapae.

³²Ie iimbit akan kubur, tuntang inamean akan rombak kubur; balalu kubure injaga tuntang ihaga.

³³Bakoya-koyan oloh mananjong magah hantue; rangka-rangkah petak manawon hantue.

³⁴Jadi, ampong keton te jaton baguna tuntang kare panombah keton te uras auh tanjaro bewei!”