Read Ngaju YOB 22 Bible Online

YOB 22 - Ngaju bible

YOB 22

¹ Palus Elipas hamauh, “Bara marak kare olon, ije mahin jaton je baguna akan Hatalla. Oloh je aton kapintar tuntang kaharatie, baya baguna akae kabuat.

³En aton gunae akan Hatalla amon ikau malalus kahandak Aie? En aton kaontong Akae amon pambelom ayum tinduh barasih?

⁴Dia ie awi kikehm dengan Hatalla, ikau indawa tuntang itong sala,

⁵malengkan awi kapaham dosam, tuntang awi kapaham kapapan gawim tuntang hadat dasarm.

⁶Amon paharim dia olih bayar utange, irabutm urase kare pakaiae.

⁷Oloh je heka dia ikau mampihope, je balau dia ikau manenga panginan.

⁸Pangkat tuntang kuasa, ihapam marampas hapus petak.

⁹Ikau dia baya dia mandohop kare balo, tapi kare anak nole ihenyekm kea.

¹⁰Awi te kare jabak aton hahaliling ikau, balalu manyalenga ateim inyangkulep kikeh.

¹¹Andau sasar kaput, sampai ikau dia olih mite taloh en-en, ikau leteng awi kadaras danum soho.

¹²En dia Hatalla melai hong langit je pangkagantonge, tuntang manampayah akan penda, akan kare bintang je gantong haliai?

¹³Tapi ikau misek, “Narai kea taloh je ingatawae? Ie melai intu hunjun baunandau tuntang dia olihe mamutus perkaran itah.”

¹⁴En ikau manyangka tampayah Aie inutup baunandau tuntang Ie mananjong baya intu helang langit dengan petak?[33]

¹⁵En ikau tetep handak mahoroi jalan je intih kare oloh papa?

¹⁶Ewen irunap helo bara katika ewen matei; tuntang impahanyut awi danum soho je manarepa.

¹⁷Ewen te bahanyi manolak Je Jaton Tikas Kuasae, tuntang manyangka Ie dia olih mawi taloh en-en dengan ewen.

¹⁸Padahal Hatalla je mampatatau ewen! Toto, aku dia harati tirok oloh darhaka.

¹⁹Oloh je bujur bahalap, tatawe awi kahanjake, amon mite oloh papa buah hukum.

²⁰Kare taloh handiai je ain oloh papa lepah binasa, tuntang apui mengehu lepah en bewei taloh je magon batisa.

²¹Toh, Yob, keleh hakabuah dengan TUHAN, uka ikau mandino kasanang. Amon ikau malalus te batantu ikau kareh mandino ontong.

²²Keleh ikau manarima taloh je iajar TUHAN akam, ingkes taloh handiai te intu huang ateim.

²³Keleh ikau haluli manalih TUHAN dengan karandah atei,[34] tuntang keleh terai malalus gawi papa intu humam.

²⁴Nganan amas ayum je paling bahalap; jakah akan palempang sungei je jaton bara danum.

²⁵Nauhe Je Jaton Tikas Kuasae manjadi amas akam, tuntang perak ayum je paham barega.

²⁶Maka ikau tau percaya dengan Hatalla harajur, tuntang mangatawan baya Ie bewei je batang kasanangm.

²⁷Amon ikau balakudoa, Ie tombah auh palakum; tuntang ikau olih malalus kakare janjim.

²⁸Kare satiarm harajur mandino hasil, tinai kalawa akan mampalawa pambelom ayum.

²⁹TUHAN mamparandah oloh bajoho,[35] tapi Ie manyalamat oloh je randah ateie.

³⁰Hatalla mandohop ikau amon ikau jaton bara kasalan, tuntang amon ikau malalus kahandak Aie.”