Read Ngaju YOB 24 Bible Online

YOB 24 - Ngaju bible

YOB 24

¹Mbuhen Hatalla dia manukas andau mamutus, mangat oloh je kasene ie mandino kaadilan.

²Aton oloh je manindar tanda helat, mangat petake jadi lombah. Ewen manakau kawan tabiri, tuntang manguronge huang kandang tabirin ewen.

³Ewen mimbit hadari kare kalidai ain anak nole; sapi ain ije biti bawi balo irabut akan jadi sanda.

⁴Ewen maharak oloh je belom susah je handak mandino bagin aie, balalu mawi oloh je susah tarapaksa manyahokan arepe.

⁵Jadi, oloh belom susah kilau kalidai baliar, je manggau panginan intu parak baho; baya intu kare eka te aton panginan akan kare anake.

⁶Ie tarapaksa manggawi tanan oloh beken;[37] tuntang mamumpong bua anggor ain oloh papa.

⁷Ie jaton bara kahuwot tuntang pakaian hapan mangalasut bitie amon hamalem.

⁸Ie bisa awi ujan labat intu bukit, palus mahupi bukit batu uka bakalindong.

⁹Oloh papa mahajipen anak oloh je jaton bara indu bapa, tuntang manduan awau ain oloh je belom susah je butang dengae.

¹⁰Oloh je belom susah haguet jaton bara pakaian; marak kanaie balau ie manggetem gandom hong tana.

¹¹Bara saitun ie manampa undus, tuntang bara bua anggor, manampa taloh ihop, tapi ie kabuat paham teah belaie.

¹²Hong kare lewu tarahining tarahing oloh je handak mahotus, kare oloh bahimang mantehau balaku inatamba, tapi Hatalla dia mahining lakudoan ewen; Ie dia handak paduli.

¹³Aton kare oloh je manolak kalawa tuntang jadi musohe, ewen dia mangasene ie tuntang dia manuntut jalae.

¹⁴Hong tampalawei oloh pamuno misik bara tirohe, balalu balua mampatei oloh je belom susah, tuntang marak andau hindai hanjewu, ie sele-selek kilau maling.

¹⁵Oloh pahabandong manunggo andau sanja, ie manyandurong baue, mangat oloh dia kasene ie.

¹⁶Oloh panakau mungkar huma metoh hamalem; katika handau ie mahakan kalawa balalu manyahokan arepe.

¹⁷Akae, hanjewu paham mampikeh, tapi taloh kaput pijem, manyanang ie.”

¹⁸Palus koan Sopar,[38] “Oloh papa bahantong tamput danum soho, petak ayue inayapa awi Hatalla; kabon anggore benyem tunis; jaton je bagawi intu hete tinai.

¹⁹Kilau salju nihau buah pandang matanandau, tumon te oloh badosa inelen tame akan eka kare liau oloh matei.

²⁰Indue kabuat mangalapean ie, tuntang handalai kuman bitie. Arae jaton akan ingenang; ie imbinasa kilau batang kayu je balihang.

²¹Taloh handiai te manjadi awi ie mahenyek kare balo, tuntang paham tulas mawi oloh bawi je jaton anake.

²²Tapi Hatalla dengan kuasan Aie maharak oloh gagah, Hatalla mahukum, maka oloh darhaka matei.

²³Hatalla manenga akae kasanang belom, tapi Ie manantuani oloh te harajur.

²⁴Hanjulo ih ie mangkeme kasanang, tapi limbah te haguet palus katatahie. Ie balayu kilau oru je dia baguna; kilau pating parei je inetek bara batange.

²⁵Eweh je tau malawan katoton auh te, atawa mambantah katoton auhku?”