Read Ngaju YOB 29 Bible Online

YOB 29 - Ngaju bible

YOB 29

¹Yob manontong kotake, koae,

²“Jaka pambelomku tau kilau bihin tinai, metoh Hatalla mangalindong aku.

³Aku harajur inenga Awie pandohop, Ie manyingah aku katika mananjong hong eka kakaput.

⁴Jete kare andau kamanang ayungku, katika kataun Hatalla mangalindong humangku.

⁵Metoh te Je Jaton Tikas Kuasae magon mampahayak aku, tuntang kare anakku aton hakaliling aku.

⁶Meto aingku mahasil are toto susu. Are undus ihasil awi kare batang saitun ayungku, aloh iimbul intu petak habatu.

⁷Amon kare bakas lewu mondok, tuntang aku kea mondok marak ewen,

⁸kare oloh tabela uras manyare, sana ewen mite aku. Kalote kea kare oloh bakas mendeng hayak marawan; uka manenga hormat.

⁹Kare oloh hai mahin tende hakotak,

¹⁰tuntang oloh basewut dia bapander.

¹¹Oloh eweh bewei gagum amon mahining tahiu aku; eweh je mite aku manara kataun pandohopku;

¹²Awi aku mandohop oloh je belom susah je balaku awat, tuntang mandohop anak nule je inalua awi oloh.

¹³Aku inara awi oloh je paham susah, aku mandohop kare balo sampai ewen mangkeme sanang.

¹⁴Gawingku bujur jaton bara kasalan; aku harajur mahaga kaadilan.

¹⁵Akan oloh babute, aku jadi matae, akan oloh batimpang, aku jadi paie.

¹⁶Akan oloh je belom susah, aku jadi bapa; akan oloh bara bangsa beken aku jadi pambela.

¹⁷Tapi kuasan oloh tulas, imelek awiku; tuntang oloh je ingurban ewen inyalamat awiku.

¹⁸Kaharapku aku olih manyampai umur panjang, tuntang matei dengan kasanang huang humangku kabuat.

¹⁹Aku kilau batang kayu je tumbo bajewung, uhate sukup danum, tuntang ambon mambisa edae.

²⁰Aku harajur inara awi kakare oloh, kaabasku dia puji rusut.

²¹Kare oloh uras suni amon aku manenga nasehat; kare auhku ihining ewen dengan bahimat.

²²Limbah aku hakotak, jaton ije je handak bapander tinai; kare auhku misap hong ewen, kilau pantis andau ujan.

²³Uras oloh manarima auhku dengan kahanjak, sama kilau oloh pamalan manambang ujan hong wayah taloh mangambang.

²⁴Aku ngumi-ngumi intu taharep ewen metoh nihau kaharape; ampin baungku je kilau oloh sanang mandahang kahias atei ewen.

²⁵Aku je jadi pamimpin, tuntang aku je manduan kaputusan. Aku mamimpin ewen kilau raja hong bentok pasukae, tuntang aku mampong ewen hong kapehen ateie.