Read Ngaju YOB 31 Bible Online

YOB 31 - Ngaju bible

YOB 31

¹Hapan sumpah aku jari hajanji uka matangku dia sala amon manampayah bawi tabela.

²Narai je ilalus Hatalla akan itah? Kilen ampie Hatalla mambaleh gawin olon?

³Calaka tuntang kasial impadumah Awie akan oloh je mawi kapapa.

⁴Hatalla katawan kakare taloh gawingku; tuntang Ie mite kare tanjong teteiku.

⁵Aku bahanyi sumpah, basa aku hindai puji malalus gawi katulas, tuntang dia puji kea manipu oloh.

⁶Keleh Hatalla manimbang aku hapan timbangan ije bujur, maka Ie akan katawan aku puna jaton bara kasalan.

⁷Jaka ih aku jari mahiwang bara jalan je bujur, atawa ateiku marajin taloh papa, amon lengengku imapa awi dosa,

⁸keleh oloh beken ih kuman taloh je inawor awiku, tuntang hasil tanangku lepah rusak.

⁹Jaka ih aku puji nahuang dengan sawan oloh je humae hadarah dengangku, tuntang suni-suni aku manangkilik ie hong balikat bauntonggang,

¹⁰maka keleh sawangku barapi akan oloh beken; tuntang keleh ie menter hong sasuro ain hatue beken.

¹¹Jaka dosa je eka kajilek te ilalus awiku, aku patut manarima hukuman.

¹²Dosa te mambinasa kilau apui naraka, kare taloh je ayungku ingehue sampai lepah.

¹³Katika rewarku bakotok awi hak ayue induangku, maka aku mahining auhe tuntang maharago ie dengan katoton atei.

¹⁴Amon dia tumon te, kilen ampie aku manaharep Hatallangku? Narai panombahku hong katika ie dumah mamutus perkarangku?

¹⁵En dia Hatalla je manjapa aku, manjapa kea kare rewarku te?

¹⁶Hindai puji aku dia mandohop oloh je asi-asi, atawa manalua kare balo belom nihau kaharape.

¹⁷Hindai puji aku manalua anak nole balau, padahal aku kabuat sukop panginan.

¹⁸Bara kakorike ewen ihaga awiku; hapus pambelomku aku mangagalan ewen.[49]

¹⁹Jaka gitangku oloh je bara katapas, awi kasusahe sampai dia olih mamili pakaian,

²⁰ingalasutku ie hapan benang wol bara bulun tabiringku kabuat, palus ie manara aku hapan salepah ateie.

²¹Jaka ih aku puji mahenyek anak nule, awi percaya aku akan manang hong parkarangku,

²²nauhe kadadue lengengku bapelek sampai balekak bara bahangku.

²³Aku dia akan mawi taloh kalote, awi hukuman Hatalla paham mampikeh aku.

²⁴Dia puji aku tama-tamam tagal panatauku,

²⁵atawa mampaandal kare ramongku.

²⁶Dia puji aku manyembah matanandau je paham kalawae, atawae bulan je bungas kalawae.

²⁷Dia puji ateiku taliok dengae, atawa manyium lengengku mahormat ie.

²⁸Dosa je macam te patut mandino hukum matei, awi Hatalla Je Jaton Tikas Kuasae jari ilawae.

²⁹Dia puji aku hanjak awi musohku kapehe, atawa hanjak awi ie buah calaka.

³⁰Aku dia balakudoa akan pampatei musohku, dia puji aku mawi dosa kilau te.

³¹Kare oloh je bagawi akangku katawan, iete eweh bewei impakanangku intu humangku.

³²Humangku habangah akan oloh je halisang; dia puji aku manalua ewen baramalem intu jalan.

³³Oloh beken manyahokan kare dosae, tapi aku dia puji mawi gawi kilau ewen.

³⁴Aku dia mikeh kare auh oloh tuntang dia paduli auh oloh je manawah, Dia puji aku mambenyem arep intu huma baya awiku mikeh inawah oloh.

³⁵En jaton oloh nahuang mahining kare auhku? Aku sumpah je taloh handiai te toto. Keleh Je Jaton Tikas Kuasae tombah auhku. Jaka ih auh dawa bara musoh akangku inyurat urase sampai aku olih mitee,

³⁶maka aku tau tama-tamam aku mangkepae hong hunjun bahangku; tuntang kilau makota aku mampalekete intu takolokku;

³⁷Aku akan mansuman uras taloh gawingku akan Hatalla, tuntang dengan katamam aku jaton bara kikeh manaharep Ie.

³⁸Jaka petak je iluku awiku petak takau, tuntang irabut awiku bara je puna tempoe,

³⁹jaka hasile lepah kinangku, tuntang oloh pamalan je mimbule inaluaku balau,

⁴⁰keleh taloh je beken bara jelei tuntang gandom bewei je belom intu tana, malengkan anak duhi tuntang tingen.” Tikas te kare auh Yob